Wutuluce 39

Wunoze we vivwalo so Wakohani

(Wut 28:1-14)

1Wakahona vivwalo vyo wulenzi, vyo kwitumamilwa ne wakohani, lono wakwitumama i hanhu hono helile. Na mu wuhone wayo, waketumamila bafuta ye liwala lye buluu, ne liwala lyo lugandu, ne liwala lidunghu. Wakamuhonela Haluni vivwalo vyono vyelile, nha vyono Muwaha Mulungu yamulajiliza Musa.

2Ne cifuko ca ha mhambaga naco, wakacihona ne bafuta swanu, mbote. 3Wakayityana zahabu, wakayihebenha muno muno, wakayisapa yikawa mhuti sisili, wakazitumamila zimhuti zizo, kuzihoneleza hamonga ne bafuta ye liwala lye buluu, ne liwala lyo lugandu, ne liwala lidunghu, hamonga ne bafuta swanu, mbote, ko wunghula muno. 4Nayo efodi, wakayihoneleza hamonga ne misipi yayo myejete, ya mu mawega, yono milunzwe ku zimhelo zayo zinyejete. 5U musipi wono wali muhonwe kwa zahabu ne bafuta ye liwala lye buluu, ne liwala lyo lugandu, ne liwala lidunghu, hamonga ne bafuta swanu, mbote, nawo wakawulunza hamonga ne efodi, nha vyono Muwaha Mulungu yamulajiliza Musa.

6Hanyuma wakasola vibwe vya salidoniki, vyono vyali vikakate nha muhuli, i matagwa yikumi na mejete ge wana wa Yakobo. Wakayisola zahabu wakayijidila mu mulya mu wukakate we matagwa ge wana yikumi na wejete wa Yakobo. 7Wakaviwopeleza vibwe vivyo mu misipi ya mu mawega, yono yibate efodi, viwe vibwe vyo wukumbucize we milango yikumi na myejete ye Waisilayeli kuli Muwaha Mulungu, nha vyono Muwaha Mulungu yamulajiliza Musa.

Wunoze we cifuko ca ha mhambaga

(Wut 28:15-30)

8Wakanoza ne cifuko ca ha mhambaga ko wunghula muno muno, wakacinoza nha vyono wayinoza efodi. Wakacinoza kwa zahabu, ne bafuta ye liwala lye buluu, ne liwala lyo lugandu, ne liwala lidunghu, hamonga ne bafuta swanu, mbote. 9Ne cifuko cico cikawa ciling'aniye kose kose wutali no wugazi waco, cono casumikaga kupetyeka. Wutali waco, wukawa sentimita makumi mejete na nyejete, no wugazi wayo nawo, sentimita makumi mejete na nyejete. 10Naco cikawa cihambwe micilili mine ye mabwe go wuguzi wukamu. Mucilili mulongozi wali wa mabwe ga akiki, topazi, na alimasi ye liwala lidunghu. 11No mucilili we kejete nawo, wali wa mabwe ga zumalidi, yakuti samawi, na alimasi. 12Mucilili we kadatu, wali na mabwe ga yasinito, akiki ndunghu, hamonga na amesisito. 13No mucilili we kane, nawo wukawa ne vibwe vya zamalajadi, salidoniki na yasipi. Ne vibwe vivino vyose, vikazubujizwa mu mulya mono wali wahimbile vikombo vye matagwa, wakawa kuvinamatiza kwa zahabu. 14Holeka hakawa na vibwe yikumi na vyejete, vyono vyali vikakatigwe litagwa limonga limonga, mu matagwa yikumi na mejete ge wana we cilume wa Yakobo, nha vyono yinha milango yose ye wana wa Isilayeli. 15Wakacinozeza mikufu miswanu muno, i cifuko cico ca ha mhambaga. 16Kanyhi wakanoza ne viwicilo vyejete vya zahabu nengu, hamonga na nyamwidole nyejete za zahabu. Nazo wakaziwicila mu mamhembo gayo vyono mejete, ga kucanyha ye cifuko cico. 17Ne mikufu yiyo ye zahabu, wakayinaniciza mu zinyamwidole zizo. 18Ne visonje vyejete vye mikufu yiyo ya zahabu, wakaviwicilila vivilya viwicilo vyejete. Na mu nzila yiyo, wakatuga nzila yo kuvibatiza viwicilo vivyo, mu misipi ye efodi ya mu mawega, ku lubavu lwa kono mwande. 19Wakanoza kanyhi nyamwidole zinji nyejete za zahabu. Nazo wakaziwicila mu mamhembo mejete ga kono sika, ge cifuko ca mu mhambaga, na kusi yayo, vikawa vili behi ne efodi. 20Wakanoza kanyhi nyamwidole zinji nyejete za zahabu, nazo wakaziwicila kono mwande, mu mamhembo mejete ga kusika ge efodi, hanhu hono musipi wu wulya wono muhone ko wunghula muno, vyali vilunzize ne efodi. 21Wakawa kuviwopeleza hamonga, i cifuko ca ha mhambaga hamonga ne efodi, mu nzila yo kuyihanza hamonga, ko mulejehe we liwala lye buluu, zinyamwidole za mu efodi ne zinyamwidole za mu cifuko ca ha mhambaga. I cifuko ho cikame nzii, hacanyha yo musipi wuwulya muhone ko wunghula, cilece hamba kuhogoha, nha vyono Muwaha Mulungu yamulajiliza Musa.

Wunoze we Vivwalo vinji kanyhi vye Cikohani

(Wut 28:31-43)

22Yakanoza ne kanzo ye liwala lye buluu, yo kuvwala kusi ye efodi. 23Nayo kanzo yiyo, yali yina no wukozo wo mutwe haciligati yayo. Nayo yakayihonela ne lipindo lyayo wuwo wukozo wo mutwe, ho kanzo yilece kudemuka. 24Ne lipindo lya hasi lye kanzo, wakalihoneleza wihambo we makomamanga ge bafuta ye liwala lye buluu, ne liwala lyo lugandu, ne liwala lidunghu, ne bafuta swanu, mbote. 25Hanyuma, wakanoza vinyanjili vya zahabu, navyo wakaviwicila mwi 'pindo lya kusika ye kanzo. Wakawa wakuwicila yikomamanga hanyuma cinyanjili, hanyuma yikomamanga hanyuma cinyanjili. 26Na vyo yali, nha vivyo, viketyatya yikomamanga hanyuma cinyanjili, sunga lipindo lyose lye kanzo wakalipilimya makomamanga hamonga ne vinyanjili, nha vyono Muwaha Mulungu yamulajiliza Musa.

27Hanyuma kanyhi, wakawahonela Haluni hamonga ne wanagwe, shati za bafuta swanu. 28Hamonga no mukumbo wa bafuta swanu, ne zikofiya ze bafuta swanu, hamonga ne zikaputula ze bafuta swanu, mbote. 29Hamonga ne misipi ye bafuta swanu, mbote, ne bafuta ye liwala lye buluu, ne liwala lyo lugandu ne liwala lidunghu. Kanyhi zikawa honwe viswanu muno, nha vyono Muwaha Mulungu yamulajiliza Musa.

30Wakanoza cibati ca zahabu swanu, ku so mukumbo wono welile, naco wakacandika mucanyha yayo kotya muhuli, nghani zono zikutya “Welile kuli Muwaha.” 31Hanyuma, wakawa kuciwopeleza mu mukumbo, he handa lyo wusu, ko mulejehe we liwala lye buluu, nha vyono Muwaha Mulungu yamulajiliza Musa.

Wumalile wo Mulimo

(Wut 35:10-19)

32Mulimo wo wunozi we Lihema lyono lyelile, nhondo wukawa wamalika. Wanhu wa Isilayeli, wakanoza zose nha vyono Muwaha Mulungu yamulajiliza Musa. 33Wakawa kumuletela Musa Lihema lyono lyelile, hamonga ne vitumamilwa vyayo vyose, nha cinji, zinyamwidole zayo, ne mabici gayo, ne mahapa gayo, ne masumbili gayo, ne matende gayo. 34Ligubiko lye zinguwo ze zinduwilu ne zimhene, yitajilwe lanji ndunghu. Ne lipaziya lyo kuwicila i Hanhu hono helile helile muno. 35Ne Lisanduku lye Cilagane, ne mabici gayo go kulidinghulila, ne Ligoda lyo Lusungu. 36Ne meza, hamonga ne vitumamilwa vyayo vyose, nha cinji, mikate yono milavywe kuli Mulungu. 37Hamonga no wuwiko we zitala, wunoze ne zahabu nengu, ne zitala zayo, ne vitumamilwa vyayo vyose, hamonga ne mafuta go kwasiza zitala zizo. 38Ne cikumbicilo ca zahabu, ne mafuta go witile, no wuvumba we mhunjile swanu, hamonga ne lipaziya lya ha mulango we Lihema. 39Ne cikumbicilo ce shaba, hamonga no lwavu lwayo lwe shaba, ne mabici gayo go kucidinghulila cikumbicilo, hamonga ne vitumamilwa vyayo vyose. Bakuli, ne ciya co wizuguzizo, hamonga ne litende lyayo. 40Ne myenda misimye ye luwa, ne masumbili gayo gose, hamonga ne matende gayo. Ne lipaziya lya ha mulango we luwa, ne milejehe yayo, ne zimambo zayo, hamonga ne vitumamilwa vyayo vyose, ho vitumamilwe mu mulimo wo wunoza Lihema lyono lyelile. 41Ne vivwalo vyose vyono vyali vihonwe viswanu, so witumamilwe wa mu mulimo we hanhu hono helile, nha cinji vivwalo vyono vyelile vya Haluni mukohani, hamonga ne wanagwe, so mulimo wo wukohani. 42Wanhu wa Isilayeli wakavinoza vinhu vyose, nha vyono Muwaha Mulungu yamulajiliza Musa. 43Nayo Musa yakavilanga vinhu vyose, yakawona vyono wavinozize viswanu, nha vyono Muwaha Mulungu yali yalajilize. Nayo Musa yakawalugutiza.

Currently Selected:

Wutuluce 39: LLKWW

Highlight

Compare

Copy