Wutuluce 38

Wunoze we cikumbicilo ce vilavywa vinyanywe

(Wut 27:1-8)

1Yakanoza kanyhi ne cikumbicilo co mubici wo mukambala ce cilavywa cinyanywe. Naco cikumbicilo cikawa ciling'aniye mbavu zose. Wutali wayo, mita nyejete na lobo, no wugazi wayo nawo, mita nyejete na lobo. Wima wayo, mita monga na lobo. 2Yakawicila ne viwoko vyayo vyo kucidinghulila, yakavityaniliza mu zinhuzi zose ze cikumbicilo vyono yine. Yakacihiliwa shaba cose. 3Yakanoza ne vitumamilwa vyose vye cikumbicilo, nha cinji, vyungu, koleyo, mabeseni, vicinyilo, hamonga ne visahani vyo kupalila moto. Nayo yakavinoza vinhu vivi vyose vya shaba. 4Yakanoza no lwavu lwa shaba, yakulusopeceza haciligati ye cikumbicilo. 5Hanyuma, yakanoza ne zinyamwidole yine, yakaziwicila mu zinhuzi zose ze cikumbicilo vyono yine, ku soko yo kucidinghulila. 6Yakanoza ne mabici go mukambala, go kucidinghulila cikumbicilo, yakagahiliwa shaba. 7Yakagatunjila mabici ga galya, mu zinyamwidole zizilya zono zali mbicile mu zimbavu ze cikumbicilo, ho cisume kudinghulwa. Yakacinoza cikumbicilo cico kwe mabici, naco cikawa cikombwe mugati yayo cinye matuli.

Wunoze we ciya ca Shaba co wizuguzizo

(Wut 30:18)

8Hanyuma yayo, yakanoza ciya ca shaba, hamonga ne litende lyayo lya shaba, ku wulawa mu vilole vye shaba vyo kwilanjila, vye wetumami we cicekulu, wono wetumamilaga ha mulango we Lihema lyono lyelile.

Luwa ye Lihema lyono lyelile

(Wut 27:9-19)

9Hanyuma kanyhi, yakalinozeza luwa, Lihema lyono lyelile. Luwa yiyo, yayinoza kwa candaluwa ca bafuta swanu muno, mbote. Vyandaluwa vyo lubavu lwa kutakama, vyali na wutali wa mita makumi mane na yine. 10Navyo vikawa vibatilizwe mu masumbili makumi mejete ga shaba, gono gena ne matende gayo makumi mejete nago ga shaba. Ninga zinyamwidole ze masumbili gago, hamonga ne vinanicizo vyayo, avyo langa vyali vya fweza. 11Nalo lubavu lwa kusumuka, candaluwa cayo, cali na wutali wa mita makumi mane na yine, hamonga ne masumbili gayo makumi mejete ga shaba. Ninga zinyamwidole ze masumbili gago, hamonga ne vinanicizo vyayo, vyali vya fweza. 12No lubavu lwa kumwezi nako, kwali na candaluwa co wutali wa mita makumi mejete na nyejete, ne masumbili yikumi, hamonga ne matende gayo yikumi. Zinyamwidole za mu masumbili hamonga ne vinanicizo vyayo, vyose vivyo vikawa vya fweza. 13No lubavu lwa kucilima kono kwali ko wuli mulango we Lihema, kwali no wugazi wa mita makumi mejete na nyejete.

14Ne vyandaluwa i vyejete, vyono vyali vitumbikwe ku lubavu kono kwali kowuli no mulango we Lihema, cimonga cali na wutali wa mita mutandatu na nusu. Navyo vikatumbikwa cimonga ku mhelo ayino yo mulango, ne ciyagwe naco ku mhelo nzagwe. Hamonga ne masumbili gayo madatu ne matende gayo nago madatu. 15Ne candaluwa co lubavu lulo luyagwe, naco cali cina wutali wa mita mutandatu na nusu, hamonga ne masumbili gayo madatu, ne matende gayo nago madatu. 16Ne vyandaluwa vyose vyono vyali vipilimywe luwa, vyali vinoze na bafuta swanu, mbote. 17Ne matende gose ge masumbili, gali ga shaba, ninga zinyamwidole ze masumbili gayo, hamonga ne vinanicizo vyayo, avyo vyali vya fweza. Ne masumbili gayo gose gali makoweleze na sito za fweza. 18Langa lipaziya lya ha mulango we luwa, alyo likanozwa kwa bafuta ye liwala lye buluu, ne liwala lyo lugandu, ne liwala lidunghu. Lyanozezwa bafuta swanu, mbote, kanyhi yihonelwe viswanu ne maluwa mucanyha yalyo. Nalyo likawa na wutali wa mita yicenda, no wugazi wa mita nyejete, nha vyono vinha vyandaluwa vye luwa yose. 19Nalyo likawa litumbikwe mu masumbili mane, ne matende gayo mane ga shaba. Langa zindobogo zayo, ne mitwe ye masumbili, hamonga ne vinanicizo, vyose vyali vya fweza. 20Sunga ne zimambo zose ze Lihema, ne zimambo zose ze luwa mu mhelo ye Lihema, zose zali za shaba.

Vitumamilwa vye Lihema lyono lyelile

21Nalyo ali, lyo liwalo lye viya vyono vyetumamilwa mwi 'Hema lyono lyelile, nha cinji, Lihema lye Cilagane. Ne liwalo lili, lyanozwa ko wutonji wa Itamali mwana wo mukohani Haluni, nha vyono Musa yalajiliza.

22Nayo Bezaleli mwana wa Uli, u mwizukulu wa Huli, wo mulango wa Yuda, yuyo yo yovinoza vinhu vyose nha vyono Musa yalajilizwa no Muwaha Mulungu. 23Nayo Oholiyabu mwana wa Ahisamaki wo mulango wa Dani, mono yamutazaga Bezaleli, yuyo yali yo munghula muno, wo mulimo wo wukakati no wucolaji, hamonga no mulimo wo wuhoneleza maluwa, ne zimhuti ze bafuta ye liwala lye buluu, ne liwala lyo lugandu, ne liwala lidunghu ne bafuta swanu.

24Ne zahabu yose yono wamulavizya Muwaha Mulungu ku soko yo wuzenji we Lihema lyono lyelile, yali yificile wuzito wa kilo magana munana na makumi mupunghati na mupunghati na gulamu magana madatu, nha vyono vinha vipimo vye Lihema lyono lyelile. 25Ne fweza yono yakongholwa, mu nghango ye liwalo lye wanhu we mhuga zose, mu wuwalwe wawo, yali yificile wuzito wa kilo elufu yidatu na yikumi na mupunghati na gulamu magana mupunghati na makumi mahano, nha vyono vinha vipimo vye Lihema lyono lyelile. 26Ne liwalo lilino, wo wutowelele we fweza yose yono yalavywa ne wanhu wose, wono wali wakondya kwandikwa, mwi'pango lyo wuwale we wanhu. Nawo wakawa kulavya mu nghango yono yasakwaga. Nayo yikapimwa kwe vipimo vye zifweza ze Lihema lyono lyelile. Kwali na walume, elufu magana mutandatu ne 'datu, na magana mahano, na makumi mahano. Wono wali waficile myaka makumi mejete no kuciza, wono wali wakondya kwandikwa mwi 'walo lilyo lye wanhu walavyaga munhu monga fweza gulamu yihano. 27Na mu fweza yiyo, kilo elufu yidatu, zetumamilwa mu wunoza matende yigana limonga ge Lihema lyono lyelile, hamonga ne lipaziya. Na mu matende gose, limonga liketumamila kilo makumi madatu za fweza. 28Na azilya zi kilo ze likumi na mupunghati na gulamu makumi mupunghati ne 'hano za fweza zono zali zisigaye, Bezaleli yakanoza vidobogo vye masumbili, na mu wuhiliwe we mitwe ye masumbili no kunoza vinanicizo. 29Nayo shaba yono wamulavizya Muwaha Mulungu, yali yificile wuzito wa kilo elufu nyejete ne 'gana limonga na makumi mejete na yine. 30Nayo Bezaleli, yakayitumamila shaba yiyo, mu wunozeza matende go mulango we Lihema lyono lyelile, ne cikumbicilo ce shaba, hamonga no lwavu lwayo lwa shaba, ne vitumamilwa vyose vye cikumbicilo. 31Hamonga ne matende gose ge luwa, yono yali yipilime Lihema lyono lyelile, hamonga ne matende go mulango we luwa yiyo. Ne zimambo zose ze Lihema lyono lyelile, hamonga ne zimambo ze luwa yose.

Currently Selected:

Wutuluce 38: LLKWW

Highlight

Compare

Copy