Wutuluce 37

Wunozi we Lisanduku lye Cilagane

(Wut 25:10-22)

1Bezaleli yakalinoza Lisanduku lye Cilagane ko mubici wo mukambala, wutali walyo wukawa sentimita yigana limonga ne kumi, ne cipinga calyo, sentimita makumi mutandatu na mutandatu, no wima walyo sentimita makumi mutandatu na mutandatu. 2Yakalihiliwa zahabu nengu, kunze yalyo na mugati yalyo, kanyhi yakaliwicila no mugo wa zahabu mbavu zose. 3Yakalinozeza kanyhi ne zinyamwidole yine za zahabu zo kulidinghulila, yakaziwicila monga monga mu zinhuzi zalyo. 4Yakalinozeza ne mabici go mukambala, go kulidinghulila Lisanduku, yakagahiliwa nago zahabu. 5Yakagatunjila mu zinyamwidole zono zili mu zimhelo ze Lisanduku, so kulidinghulila. 6Yakanoza ne ligoda lyo lusungu lya zahabu nengu, no wutali walyo, sentimita yigana limonga ne 'kumi, ne cipinga calyo, sentimita makumi mutandatu na mutandatu. 7Yakanoza kanyhi ne cihwani ce makelubi mejete ga zahabu nhyane. 8Yakagawicila mucanyha ye ligubiko lye Lisanduku, limonga akuno, ne liyagwe ku lubavu luyagwe, gakawa malunzizwe lukulu hamonga ne ligubiko lye Lisanduku. 9Nago makelubi gago, yakagawicila gedomile, gagoloye ne mabawa gayo, galigubice ligoda lyo lusungu.

Meza ye mikate yono milavywe kuli Mulungu

(Wut 25:23-30)

10Yakanoza kanyhi meza ko mubici wo mukambala, wutali wayo, sentimita makumi munana na munana, no wugazi wayo, sentimita makumi mane na yine, no wima wayo, sentimita makumi mutandatu na mutandatu. 11Nayo yakayihiliwa zahabu nengu, yakayiwicila no mugo wayo wa zahabu. 12Hanyuma, yakawicila ciciwizizo ce cibawo, co wugazi wa milimita makumi mupunghati ne 'hano, cipilime mucanyha ye meza, yakaciwicila no mugo wa zahabu. 13Yakanoza ne zinyamwidole yine za zahabu, yakaziwicila monga monga mu migulu ye meza ha kacanyha yayo. 14Zinyamwidole zo kugatunjila mabici go kuyidinghulila meza yiyo, yakaziwicila ha kacanyha behi ne ciciwizo ce meza. 15Hanyuma, yakanoza ne mabici mejete go mukambala, go kuyidinghula meza yiyo, nago yakagahiliwa zahabu. 16Yakanoza ne viya vya zahabu nengu, vyo kwitumamila baho ha meza yiyo. Yakanoza sahani zayo hamonga ne zi sahani zi ndodo ndodo so wuvumba, hamonga ne vikombe, ne vidumu vyayo, so cilavywa ce cing'wegwa.

Wunoze wo wuwiko we zitala

(Wut 25:31-40)

17Yakanoza no Wuwiko we zitala wa zahabu nengu. Litende lyayo, no wibato wayo wa haciligati yayo, ne vikombe vyayo ne zimhimbili zayo hamonga, kwa cuma ca zahabu, cikawa co cinhu cimonga du. 18Manhambi mutandatu gakawa galawiye mu mbavu zo wuwiko we zitala, manhambi madatu ku lubavu aluno, ne manhambi madatu nago, ku lubavu luyagwe. 19Na mu manhambi gose, linhambi limonga, lyali lina vikombe vidatu, vyono vihwanile kotya nhe liluwa lyo mulozi, cikombe ne zimhimbili zayo ne liluwa lyayo. 20Na mwi'bici lyayo lya haciligati yayo, hakawa na vikombe vine vyono vihwanile kotya nhe liluwa lyo mulozi, hamonga ne zimhimbili zayo ne maluwa gayo. 21Ne hanhu hono getang'aniliye i manhambi gayo go mutandatu, hali hawiciywe linhambi na hundo yayo. 22Ne zihundo zizo, hamonga ne manhambi gayo, vyose vikawa vilunzwe hamonga no wuwiko wuwo we zitala. Navyo vyose, vikawa vityanwe na zahabu nengu. 23Yakanoza zitala zayo mupunghati, hamonga ne mibato yayo, hamonga ne viwicilo vyayo vya zahabu nengu. 24Yakawunozeza wuwo wuwiko we zitala vitumamilwa vyayo vyose kwa kilo makumi madatu na yihano za zahabu.

Wunoze we cikumbicilo co kufusiza wuvumba

(Wut 30:1-5)

25Yakanoza cikumbicilo co kufusiza wuvumba ko mubici wo mukambala. Ne cikumbicilo cico, cikawa ciling'aniye mbavu zose, u wutali wayo sentimita makumi mane ne'hano, u wugazi wayo, sentimita makumi yicenda. Ne mahembe ge cikumbicilo cico, gakawa malunzizwe lukulu hamonga ne cikumbicilo.

26Yakacihiliwa cose zahabu nengu, mucanyha yayo sunga na mu zimbavu zayo zose, mu mhelo yayo, sunga na mu mahembe gayo. Yakacinozeza no mugo wayo wa zahabu. 27Yakanoza nyamwidole nyejete za zahabu, yakazinamatiza ha kasika yo mugo wayo, mu mbavu zose vyono nyejete, yakaziwicila zidomile, nazo ziketumamilwa so kutunjila mabici go kucidinghulila cikumbicilo. 28Yakanoza mabici mejete go mubici wo mukambala, go kucidinghulila cikumbicilo, yakagahiliwa zahabu.

Wunoze we Mafuta go witile, hamonga no wuvumba

(Wut 30:22-38)

29Yakanoza ne mafuta gono gelile go witile, hamonga no wuvumba, wono wina mhunjile swanu muno muno, wono wuhanzahanze kotya manukato.

Currently Selected:

Wutuluce 37: LLKWW

Highlight

Compare

Copy