Wutuluce 36

1“Nayo Bezaleli na Oholiyabu, hamonga ne wanhu wose we cilume, wono Muwaha Mulungu yawapelile mahala no wizuce, wo kumanya kwituma mulimo wose wo wuzenji we Lihema lyono lyelile, yiwanojeye wetume mulimo wuwo wuwe winha nha vyono Muwaha Mulungu yalajiliza.”

Wanhu wakuleta vilavywa ko winji muno

2Musa yakawacema Bezaleli na Oholiyabu, hamonga ne wanhu wose wono wapejigwe wizuce no Muwaha Mulungu, wono wali wendile weneco mu nhumbula zawo kuwituma mulimo wuwo. 3Nawo wakavibocelela kulawa kuli Musa i vinhu vyose vyono vyali vyalavywa ne wanhu wa Isilayeli na nhumbula nzelu, ku soko yo mulimo we Lihema lyono lyelile. Ne wanhu wa Isilayeli, wakajendelela nhondo zose hakali mitondo, kumuletela Musa vilavywa vyawo na nhumbula nzelu. 4Ne wanhu wose wono wali wena wizuce, wono wetumaga milimo ye hayo hayo, yo kuzenga Lihema lyono lyelile, 5wakamubitila Musa, wakamulonjela wakutya, “Alu wanhu nha wa kuleta vinhu vinji muno, kuciza nghango yono yikusakwa so mulimo wono yacilajiliza Muwaha Mulungu ciwitume.” 6Nayo Musa yakalajiliza yakatya, “Aluno munhu wo wose hodu yalece kujendelela kuleta vilavywa kanyhi, ku soko ye Lihema lyono lyelile.” Hodu, wanhu wakawa kuleka kujendelela kuleta vinhu kanyhi. 7Hambi i vinhu vivyo vyono wali wakondya kuvileta, nha vyali vikondizye kuwumala mulimo wose no kusigala.

Wunoze we Lihema lyono lyelile

(Wut 26:1-37)

8Walume wose wono wali wena wizuce, wakalinoza Lihema lyono lyelile kwe mapaziya yikumi, gono gali mahonwe kwe bafuta yono mbote, na kwe bafuta ye liwala lye buluu, na ye liwala lyo lugandu, na ye liwala lidunghu, yina ne cihwani ce makelubi. 9No wutali we mapaziya, limonga lyali lina wutali wa mita yikumi na nyejete, no wugazi wa mita nyejete. Ne mapaziya gose gakawa gena cipimo cimonga du.

10Wakagalunza hamonga mapaziya mahano mahano. 11Kanyhi wakanoza ne vinanicizo vye liwala lye buluu, mwi'pindo lye lipaziya lya ku mhelo, lya mwi'fungu lilongozi. Ne vinanicizo vinji navyo, wakaviwicila mwi'fungu lye kejete. 12Wakawicila vinanicizo makumi mahano mwi 'paziya lilongozi lye lifungu lilongozi, na vinanicizo vinji kanyhi mwi 'paziya lye kejete lye lifungu lye kejete, ne vinanicizo vyose vikawa viyidomile. 13Hanyuma wakanoza vidobogo makumi mahano vya zahabu, ho visume kugalunza hamonga gagalya mafungu mejete ge mapaziya. Na mu nzila yiyo, Lihema likawa lyakondya kuwa lyo limonga.

14Kanyhi wakanoza mapaziya yikumi na limonga, go wukunzeje we zimhene, gono gokwitumamilwa kugubika mucanyha ye Lihema, liwe lye'tembe lyalyo. 15No wutali we mapaziya, limonga likawa no wutali wa mita yikumi na yidatu, no wugazi wa mita nyejete. Ne mapaziya gose yikumi na limonga, gakawa gose gena cipimo cimonga du. 16Wakagalunza hamonga mapaziya mahano. Na agalya go mutandatu nago, wakagalunza hamonga. 17Hanyuma wakawa kuviwicila vinanicizo makumi mahano mwi 'mhembo lye lipaziya lya ku mhelo, mwi'paziya lye lifungu lilongozi, na vinanicizo vinji kanyhi makumi mahano, navyo wakaviwicila mwi 'mhembo lye lifungu lye kejete. 18Hanyuma kanyhi, wakanoza vidobogo makumi mahano vya shaba, ho wagalunze gagalya mafungu mejete ge mapaziya, ho walinoze liwe lipaziya limonga du so Lihema. 19Wakanoza ne cigubiko ca nguwo za nduwilu, na mucanyha yayo kanyhi, wakanoza cigubiko ca nguwo swanu.

20Hanyuma, yakanoza mabici go mukambala, go kusimya wima ku soko ye Lihema. 21Ne mabici gose gakawa, limonga lina wutali wa mita yine, no wugazi wa sentimita makumi mutandatu na mutandatu. 22Mabici gose, limonga likawa lina manghwasa go kulunziza. Ne mabici gose ge Lihema, yaganoza gena manghwasa. 23Mabici gago ge Lihema, yaganoza nhavi, mabici makumi mejete, gakawa ku lubavu lwa kutakama, 24hamonga ne matende gayo makumi mane, gono gakawikwa hasi ya gago mabici makumi mejete ge manghwasa. Yikawa matende mejete ne 'bici lyayo, i manghwasa ga galya mejete, ho gajelekwe mumo mu matende gago mejete. 25Na ku lubavu lwa kusumuka lye Lihema, nako yakakunozeza mabici makumi mejete nhavivyo. 26Hamonga ne matende gayo makumi mane ga fweza, matende mejete hasi ye libici limonga. 27Na ku mhilimo yayo, nha cinji kumwezi ye Lihema, ako yakakunozeza mabici mutandatu. 28Yakanoza na mabici mejete kanyhi, go kuwika mu zinhuzi ze Lihema, ku mhilimo yayo. 29Ne mabici gago ga mu mhelo yayo, gali malunzwe hamonga ku wulawilila hasi sunga ko kucanyha. Ne mabici ga galya nago i mejete mejete, gono gawicilwa mu zinhuzi zayo zinyejete, nago gali malunzwe nhavivyo. 30Na mu nzila yiyo, holeka kukawa na mabici munana, hamonga ne matende gayo ga fweza, nago gali gali yikumi na mutandatu, nha cinji matende mejete hasi ye 'bici limonga.

31Yakanoza ne mahapa go mukambala. Mahapa mahano ku so mabici go lubavu lumonga lwe Lihema. 32Ne mahapa mahano ganji ku so lubavu luyagwe nalo lwe Lihema. Ne mahapa mahano ganji kanyhi, ku so mabici gono gali ku lubavu lwa ku mhilimo ye lihema, nha cinji kumwezi yayo. 33Yakawunoza mucici wa mugati, wukole haciligati ye zimbawo, wulawe ku nhuzi monga sunga ko ku nhuzi nzagwe. 34Ne mabici gose, yakagahiliwa zahabu. Kanyhi, yakanoza ne zinyamwidole za zahabu zono zokwibatiliza mahapa gago, nazo zinyamwidole, yakazihiliwa zahabu.

35Yakanoza ne lipaziya lye zimhuti ze liwala lye buluu, ne liwala lyo lugandu, ne liwala lidunghu, hamonga ne bafuta swanu; mbote. Ne lipaziya lilyo, likahonelwa cihwani ce makelubi mucanyha yayo, ko wunghula wuwaha muno. 36Yakanoza kanyhi masumbili mane go mubici wo mukambala, yakagahiliwa zahabu, yakawicila ne vidobogo vyayo vya zahabu. Yakaganozeza ne matende gayo mane ga fweza. 37Kanyhi yakanoza ne lipaziya lyono likangaye muno, kwa mhuti ze liwala lye buluu, na ze liwala lyo lugandu, na ze liwala lidunghu. Yakalinoza kwa bafuta swanu, mbote, ku so yo mulango we Lihema. Nalyo lipaziya likawa yihonwe viswanu muno muno. 38Ne masumbili mahano ge lipaziya, nago yakagawicila vidobogo vihiliwe zahabu. Yakanoza hamonga ne matende gayo mahano ga shaba, ku soko ye masumbili gago.

Currently Selected:

Wutuluce 36: LLKWW

Highlight

Compare

Copy