Wutuluce 35

Wulajilize we Sabato

1Musa yakawakonghola hamonga mhuga yose ye wanhu wa Isilayeli, yakawalonjela yakatya, “Azi zo nghani zono Muwaha Mulungu yakumulajilizenyi mwitume. 2Mu vilo mutandatu, mowa kwituma milimo yenyu. Ninga lizuwa lyo mupunghati, lyo lizuwa lyono lyelile kuli Muwaha Mulungu. Holeka munhu wo wose mono kokwituma mulimo mwi'zuwa lilyo, yimunojeye yuyo yawulagwe. 3Mulece hamba kupemba moto mu wikalo wenyu mwi'zuwa lye Sabato.”

Vilavywa ku so Lihema lyono Lyelile

(Wut 25:1-9)

4Nayo Musa yakawalonjela wose we mhuga ye wanhu wa Isilayeli, yakatya, “Ayi yo nghani yono Muwaha Mulungu yalajilize muyitume. 5Mumulavizye Muwaha Mulungu vinhu vyono vikulawa mu zisawo zenyu. No munhu wowose mono yena nhumbula nzelu, yamulavizye Muwaha Mulungu zahabu, fweza, shaba. 6Bafuta ye liwala lye buluu, na ye liwala lyo lugandu, na ye liwala lidunghu, hamonga ne bafuta swanu, mbote, hamonga no wukunzeje we zimhene. 7Ne zinguwo ze zinduwilu zono zowa nhajilwe lanji ndunghu, kanyhi ne zinguwo ze zimhene, hamonga ne mabici go mukambala. 8Hamonga ne mafuta ge zitala. Kanyhi hamonga ne vinhu vyo kuhanziliza mu mafuta go witile, na ku so wuvumba we mhunjile swanu. 9Kanyhi ne vibwe vya salidoniki hamonga ne vibwe vinji vyo kuwicila wihambo mu efodi hamonga ne cifuko cayo.”

Vitumamilwa vya mwi 'Hema lyono lyelile

(Wut 39:32-43)

10“No munhu wo wose wa muli nyenye, mono kowa yamanyile kuwituma mulimo wo wose, ale, yaze ho yanoze vinhu vyose vyono yavilajilize Muwaha Mulungu. 11Nha cinji, kunoza Lihema lyono lyelile, ne ligubiko lyayo, ne lipaziya lyayo, ne vidobogo vyayo, ne mahapa gayo, hamonga ne matende gayo. 12Ne Lisanduku lye Cilagane, hamonga ne mabici go kulidinghulila. Kanyhi ne ligoda lyo lusungu, ne lipaziya lyono lyotemanula i Hanhu hono helile muno. 13Hamonga ne meza, ne mabici gayo go kuyidinghulila, ne vitumamilwa vyayo vyose. Ne mikate milavywe kuli Muwaha Mulungu. 14Kanyhi no wuwiko we zitala, ne vitumamilwa vyayo vyose, hamonga ne zitala zayo, ne mafuta gayo. 15Ne cifusizo co wuvumba hamonga ne mabici go kucidinghulila. Ne mafuta go witile no wuvumba we mhunjile swanu muno, ne lipaziya lya ha mulango we Lihema lyono lyelile. 16Kanyhi ne cikumbicilo ce vilavywa vinyanywe no lwavu lwa shaba, ne mabici go kucidinghulila, hamonga ne vitumamilwa vyayo vyose. Ne ciya co wizuguzizo hamonga ne litende lyayo. 17Kanyhi ne vyandaluwa vya mu luwa ne masumbili gayo hamonga ne matende gayo, ne lipaziya lyo mulango we luwa. 18Ne zimambo zo kukomela Lihema lyono lyelile, hamonga no luwa, ne milejehe yayo. 19Kanyhi ne vivwalo vyono vihonwe viswanu muno ku so witumami we Hanhu hono helile, nha cinji vivwalo vyono vyelile vya Haluni mukohani hamonga ne vivwalo vye wanagwe, ku soko yo witumami wawo wo wukohani.”

Wanhu wakuleta vilavywa vyawo

20Ale, mhuga yose ye wanhu wa Isilayeli, wakawa kuwuka hali Musa. 21Nawo, muli wose mono yali yendile, wakawa kuza yumonga yumonga no kumulavizya Muwaha Mulungu vinhu ku soko ye Lihema lyono lyelile, hamonga ne visakwa vyayo vyose, ne vivwalo vyayo vyono vyelile. 22Nayo vyo yikawa, wanhu wose we nhumbula nzelu, walume hamonga ne wacekulu, wose wakaleta wihambo we vipini, hamonga ne zi heleni, ne zinyamwidole ze citanjilo, ne mikufu, hamonga ne mawala gose ge viya vye zahabu. 23Ne wanhu wose munhu na lwakwe, yakaleta cinhu co cose du cono yali yena naco, nha vyono lunji bafuta ye liwala lye buluu, hamba ye liwala lyo lugandu, hamba ye liwala lidunghu, hamba bafuta swanu, hamba wukunzeje we zimhene, hamba nguwo ya ngholo yono yitajiywe lanji ndunghu. 24No munhu wo wose mono yasuma kuleta fweza hamba shaba, yamuletela Muwaha Mulungu, cikawa co cilavywa cakwe kuli Mulungu. No munhu wo wose mono yali yena mabici go mukambala, gono gali gakwiliye mulimo wo wose wa mu mulimo wuwo, nayo yakagaleta nhavivyo. 25Ne wacekulu wose wono wali wena wumanye wo kuhona, nawo wakaleta vinhu vyono wahonaga vye bafuta ye liwala lye buluu, na ye liwala lyo lugandu, na ye liwala lidunghu, hamonga ne bafuta swanu, mbote. 26Nawo wono wali wamanyile kubota wukunzeje we zimhene, wakabota wakaleta. 27Walongola nawo, wakaleta vibwe vya salidoniki hamonga ne vibwe vinji vyo kuwicila mu efodi, hamonga na mu cifuko ca ha mhambaga. 28Wakaleta kanyhi sunga ne vinhu vyo kuhanziliza, hamonga ne mafuta ge zitala, hamonga ne mafuta go witile, no wuvumba we mhunjile swanu. 29Ne wanhu wose wa Isilayeli, walume ne wacekulu, wono zinhumbula zawo, zikawa zendile kulavya cinhu co cose, ku soko yo mulimo wo Muwaha Mulungu. Mulimo wono Mulungu yali yamulajiliza Musa witumwe. Nawo wavileta vinhu vivyo kwa nhumbula nzelu, wakavileta viwe vyo vilavywa vyawo kuli Muwaha Mulungu.

Wanghula wo kulizenga Lihema lyono lyelile

(Wut 31:1-11)

30Musa yakawalonjela wanhu wa Isilayeli yakawatya, “Lanjenyi ta, Muwaha Mulungu kamuhagula Bezaleli mwana wa Uli, mwizukulu wa Huli, wo mulango wa Yuda. 31Kanyhi kamumemya no Muhe wakwe, kamupela no wizuce ne mahala no wumanye hamonga no wunghula. 32Ho yasume kutula milimo yo wunghula, yawe munghula wo kwituma mulimo wo kutyana zahabu, fweza na shaba. 33Kanyhi yakakate ne mabwe go wihambo, hamonga ne mabici, gono gokwitumamilwa mu milimo yinji yose yo wunghula. 34Kanyhi Muwaha Mulungu kamuwika mwene hamonga na Oholiyabu, mwana wa Ahisamaki wo mulango wa Dani, ho wawejize na wanji mulimo wo wunghula. 35Kawapela no wizuce wo kwituma milimo yose yo wunghula hamba yo wukakati, na yo wunghula wo kuhona mu bafuta ye liwala lye buluu, hamba liwala lyo lugandu, ne liwala lidunghu, hamonga ne bafuta swanu, mbote, mu nzila yo wunghula du we liwala lyo lyose.

Currently Selected:

Wutuluce 35: LLKWW

Highlight

Compare

Copy