Wutuluce 34

Vibawo vinji kanyhi vipya vye Cilagane

(Kum 10:1-5)

1Muwaha Mulungu yakamulonjela Musa yakatya, “Wusese kanyhi vibawo vyejete vya mabwe, viwe vinha nhe vibawo vilongozi, nane nokwandika nghani zizilya, zono zali zandicigwe mu vibawo vilongozi vyono wavitula. 2Holeka wiwikanizaje, mitondo hakali mitondo, nhondo wuze ciwone nane mwi'tunda lya Sinayi. 3Ninga wulanjilile, wulece kuzana na munhu wo wose, hamba munhu wo wose yalecele lukulu kwijela mwi'tunda. Sunga ne zingholo ne zing'ombe zose, zilece kudimila he'tunda lilyo.” 4Nayo Musa yakawa kuvisesa vibawo vyejete vya mabwe vinha ivilongozi. Yakawa kwilawa hakali mitondo kubita kwi'tunda lya Sinayi, nha vyono Muwaha Mulungu yamulajiliza, yena ne vibawo vivilya vyejete vye mabwe mu muwoko wakwe.

5Muwaha Mulungu yakatima mwi'vunde, yakema na Musa, yakanza litagwa lyakwe, “Muwaha Mulungu.” 6Muwaha Mulungu yakapuluta ha mwande ya Musa, akuno yakwanza yakutya, “Ane no Muwaha Mulungu, yo nene no Muwaha Mulungu mono nina nheto no lusungu, kanyhi singholwaga ne likuwo mbela, kanyhi nina wendo wuwaha no wihuwilwa. 7Nane nghuwawonela lusungu wanhu maelufu, no kuwanenela wavu wawo no wusutye wawo, hamonga no wubi wawo. Ninga hamba nhavivyo, nowalipiciza wana hamonga ne wezukulu, sunga ko ku lulelo lwe kadatu na lwe kane, ku soko yo wubi we walezi wawo.”

8Nayo Musa ho baho yakenama no kumuhemba Muwaha Mulungu. 9Hanyuma Musa yakawa kutya, “Gwe go Muwaha Mulungu, alu vyono wakondya kumhela lihewa lyako, nane lu nghukunena, wujendane hamonga nase. Hambi wanhu wawa nha wasina cihuliko. Ninga hamba nhavivyo, wucinenele wavu wetu hamonga no wubi wetu. Nagwe wucibocele du nha wanhu wako go mweneco.”

I Cilagane cikunozwa wupya

(Wut 23:14-19; Kum 7:1-5; 16:1-17)

10Muwaha Mulungu yakamulonjela Musa yakatya, “Alu, nghunoza cilagane hamonga ne wanhu wa Isilayeli. Nane nokwituma mapoto hali wene, mapoto gono gakali hamba sinetumwa mono'nze yose, hamba mwi'kungugo lyo lyose. Ne wanhu wose wono kowezana nawo, wogawona metumo gangu nene no Muwaha Mulungu. Hambi nha nonoza nghani yo wizine, nayo noyinozeza muli gwegwe.

11“Holeka mugakamisaje malajilizo gono nghumupelenyi izuwali. Nane nghuwawinga hali'nye, Waamoli, Wakanani, Wahiti, Wapelizi, Wahivi, sunga ne Wayebusi. 12Ninga langa, mwilanjilile, mulece kwilumbaniza ne wanhu wono mowagana, i wekazi wa mu yisi yiyo, yono nanye mukubita. Hambi nghani yiyo, nha yowa nha mutego kuli'nye. 13Langa kolo mwafika kuko, muvimwagulaje vikumbicilo vyawo, hamonga ne masumbili gawo, ne vihwani vyawo vyo mulungu we cicekulu Ashela. 14Kanyhi mulecele lukulu kuhemba mulungu yunji, hambi ane no Muwaha Mulungu, nha nyhemwaga, ‘Mono nili wivu,’ nili Mulungu wo wivu. 15Kanyhi mulece kwilumbaniza ne wekazi wa mu yisi yiyo mu nghani yo yose, ho walece kumukwejelezenyi mu wuhembi wawo wo wusenyha, ho yilece kuwa, lono wakuyihemba milungu yawo yo wulambi no kuyikumbika, wamulalicenyi nanye sunga mulye vye makumbiko gawo, 16no kuwatoza wana wenyu we cilume kuli wana wawo we cicekulu. Hambi nha wowajiliza no kuwanoza wawe si wehuwilwa kanyhi kuli'ne, wawe kuhemba ne milungu yawo yo wulambi.

17“Mulece kwinozeza hamba kuyihemba milungu myenjedulwe. 18Muyikamisaje sikukuu ye mikate yono yisina cisase. Na mu vilo mupunghati, mwi'daha lyono lyawikwa, mu mwezi wa Abihu, mweze kulya mikate yono yisina cisase, nha vyono namulajilizenyi. Hambi mu mwezi wuwo, nha wo mwezi wono mwawucila mu yisi ya Misili.

19“Holeka mwana we cilume mulelwa mulongozi, ayo kowa wangu nene, hamonga ne nyana zindelwa zinongozi ze mitugo zako zose, nyana ze zing'ombe ne nyana ze zingholo. 20Langa nyana ye ndogowe, ayo koyikomboza ko kundavizya ngholo. Na hono wulece kusuma kuyikomboza, hodu wuyibenaje singo yayo. Sunga ne wana wenyu we cilume wose i walelwa walongozi, nawo nhavivyo mowa kuwakomboza.

“Ninga munhu wo wose yalece kunyiziza yali mawoko yasina cilavywa. 21Ale, mwina vilo mutandatu vyo kwitumila milimo yenyu, ninga mwizuwa lyo mupunghati munojeye mucehe. Hamba yiwe mu vilo vye lilima, hamba vye mhwanga. 22Muyikamisaje sikukuu ye malimbuko, lono mweza kwanza kududula wuhemba wa mu migunda yenyu, kanyhi, muyikamisaje ne sikukuu ye ndudula, lono mwakondya, ha ndumilizo yo mwaka. 23Na we cilume wose, yiwanojeye kadatu mu mwaka, wekongholele hali'ne no Muwaha Mulungu, mono nili Mulungu wa Isilayeli. 24Nane nogawinga makungugo ganji hali'nye, kanyhi noyigazimhya ne mipaka ye yisi yenyu. Na hasina munhu wo wose, mono koyisulumila no kuyizumhila yisi yenyu, mu mapango lono anye mwekongholela hali'ne, muli zizo zinghanghulo yidatu ho muhembe, ane no Muwaha Mulungu mono nili Mulungu wenyu.

25“Na lono mweza kundavizya likumbiko, mulece kuhanzahanza sakami ye likumbiko lyangu hamonga no mukate wono wina cisase. Nalyo likumbiko lya mwi'zuwa lye Pasaka, lilece kulekwa ligone sunga wele mitondo yaco. 26Ne malimbuko ga mu'si yenyu, mugaletaje mu kaya yangu ane no Muwaha Mulungu, mono nili Mulungu wenyu. ‘Mulecele lukulu kuyitelecela nyhinda hamba nyana ye ngholo mu mele ge nyina.’ ”

27Muwaha Mulungu yakamulonjela Musa yakatya, “Ale, wuzandikaje zinghani zizi, hambi mu zinghani zizi, nha mo nghunozeza cilagane na gwegwe, hamonga ne wanhu wa Isilayeli.” 28Nayo Musa yakawa kuko kwi 'tunda hamonga no Muwaha Mulungu, vilo makumi mane misi ne cilo, hamba si yalizaga cinji hamba kung'wa malenga. Nayo yakazandika zinghani zose ze cilagane, hamonga na gagalya malajilizo yikumi.

Musa yakutima ku wulawa mwi'tunda lya Sinayi

29Nayo Musa lono yatimaga yakulawa mwi'tunda, yena ne vibawo vyejete mu mawoko gakwe, vyono vyandicigwe zinghani ze Cilagane, hamba si yamanya vyono wusu wakwe wang'alalaga ku soko yo wuduwane no Mulungu. 30Nayo Haluni hamonga ne wanhu wose wa Isilayeli, wali weza kumuwona Musa, wakogopa hamba no kumusejelela behi, hambi wusu wakwe nha wang'alalaga muno. 31Ninga mwene Musa yakamucema Haluni, hamonga ne walongola wose we wanhu wa Isilayeli, wamubitile, nayo yakaduwana nawo. 32Na hanyuma yayo, wanhu wose wa Isilayeli wakamusejelela behi, nayo yakawalajiliza zose zono Muwaha Mulungu yamulonjela mwi'tunda lya Sinayi. 33Nayo Musa yali yeza kukondya kulongana ne wanhu, yakawugubika wusu wakwe ne citambala. 34Ninga yikawa lono Musa yabitaga kulongana no Muwaha Mulungu mwi 'Hema lyono lyelile, yaciwusaga cigubiko mu wusu wakwe, sunga kolo yakulawila kunze. Na lono yalawilaga kunze, yawalonjelaga wanhu wa Isilayeli, zose zono yalajilizwa no Mulungu. 35Nawo wanhu wa Isilayeli wawuwonaga wusu wakwe wukung'alala. Nayo Musa kawa kuwugubiciza wusu wakwe kwe citambala, sunga mwi'daha lono yabitaga kuduwana no Muwaha Mulungu kanyhi.

Currently Selected:

Wutuluce 34: LLKWW

Highlight

Compare

Copy