Wutuluce 33
33
Muwaha Mulungu yakuwalajiliza Waisilayeli wawuce he'tunda lya Sinayi
1Muwaha Mulungu yakamulonjela Musa yakatya, “Wuwuce baha, mujendelele ku mwande, gwegwe hamonga ne wanhu wono wawawusa mu yisi ya Misili. Sunga mufice ku yisi yono namwilahila Abulahamu, na Isaka na Yakobo, yono natya vyono, ‘Nolowapela zindelo zako yisi yiyi.’ 2Nane notuma malayika yamulongolelenyi. Nowawinga Wakanani, ne Waamoli, ne Wahiti, ne Wapelizi, ne Wahivi, sunga ne Wayebusi. 3Mubite ku yisi yiyo swanu, yono yina moso mwinji. Ninga lu, vyono nanye muli wanhu mono musina cihuliko, holeka nane hamba si cojendana nanye ho ndece kumongomezezenyi mu nzila.”
4Nawo wanhu wali weza kuzihulika zinghani zizo, wakalila muno muno. Hasina kanyhi hamba munhu mono yasulumila kuvwala wihambo wakwe. 5Nawo wanoza nhavivyo, hambi Muwaha Mulungu nha yali yakondya kumulonjela Musa vyono, “Walonjele wanhu wa Isilayeli wutye nhavi, ‘Anye muli wanhu mono musina cihuliko, nane hono nitye cijendane nanye, hamba mu cidaha cidodo du, ane nomongomezenyi. Holeka alu, hambulenyi wihambo wenyu, nane ho manye yono nomutendelenyi.’ ” 6Nawo wanhu wa Isilayeli, wakehambulila wihambo wawo, he 'tunda lya Holebu lyono likucemwa Sinayi, hamba si wehamba kanyhi.
Lihema lyono lyelile
7Nayo Musa, lono wanhu wa Isilayeli, ho hose hono wayisitaga nghambi, yali yena moto wo kulidinghula Lihema lililya no kulikoma kunze kutali hadodo ne nghambi. Ne Lihema lilyo, yakalipela litagwa yakalitya. “Lihema lyono lyelile.” No munhu wo wose mono kosaka wutonji kuli Muwaha Mulungu, yabitaga kuko kwi Hema lyono lyelile kunze ye nghambi. 8Nayo Musa nhondo zose lono yenjilaga kwi 'Hema, wanhu wose, munhu he 'hema lyakwe, wenukaga wakwima wima mu milango ye mahema gawo, wawa wamulanjiliye Musa lono yakubita kwinjila kwi 'Hema, sunga kolo yenjila mwi 'Hema. 9Nayo Musa kolo yakwinjila mwi 'Hema, livunde lyatimaga lipalinjile nhe lisumbili, liwa kwima wima ha mulango we Lihema. Nayo Muwaha Mulungu viwa kuduwana na Musa. 10Nawo wanhu wose, lono waliwonaga lisumbili lye livunde limile ha mulango we Lihema, nawo wemaga no kuhemba, munhu ha mulango we lihema lyakwe. 11Na mu nzila yiyo, vyo Muwaha Mulungu yasuma kuduwana na Musa wedomile, nha vyono wenha munhu na mwendece wakwe. Nayo Musa lono yawukaga mwi 'Hema, yakuwuya kwi hema lyakwe, muzelelo Yoshuwa u mwana wa Nuni, mono yali yo mutazi wakwe, ayo langa si yawuka mumo mwi 'Hema.
U Muwaha Mulungu, yakwihuwiza vyono kowa hamonga ne wanhu wakwe
12Musa yakamulonjela Muwaha Mulungu yakatya, “Gwe go Muwaha Mulungu, yo gwegwe mono wanonjela wukatya, ‘Wuwatongaje wanhu wawa.’ Ninga wukali si nanonjela munhu mono wukumutuma mu mulimo wuwu, mono kowa yali hamonga nane. Hamba nhavivyo, agwe wukutya vyono ane wumanyile, kanyhi na vyono wendezwe nane. 13Holeka nane luno, nghukunena nghutya, vyono, hono yiwe ane nendezwe nagwe, ale wundajile zinzila zako. Nane ho nyhile kukumanya gwegwe go Muwaha Mulungu wangu. Ho nhuje wendezwe hali 'gwe. Kanyhi wukumbucile nha vyono likungugo lili, wo wanhu wako.” 14Nayo Muwaha Mulungu yakamulonjela Musa, yakatya, “Lanje Musa, ane no mweneco nowa nili hamonga nagwe, kanyhi nokusindamika.” 15Musa nayo yakapitula yakatya, “Hono agwe wuwe si kosuma kuwezana nase, hodu wulece kuciwusa bahano. 16Hambi ho yomanyika wule vyono nina wendezwe hali'gwe, ane hamonga ne wanhu wako? Ninga hono wuwe wuli hamonga nane, hamonga ne wanhu wako, ale, baho langa, ho yomanyicila vyono, ase cili wanhu mono cisimajiye muli wanhu wose wa mono'nze.”
17Muwaha Mulungu yakamulonjela Musa yakatya, “Alu vyono wakondya kutuga wendezwe hali'ne, na vyono nane nghumanyile ne litagwa lyako, holeka nghani yiyi yono wuyilonjile, ale, nane noyituma.” 18Nayo Musa yakapitula yakatya, “Ale, nghukunena wundajile lukumyo lwako.” 19Muwaha Mulungu yakamupitula Musa yakamutya, “Ane, nokola ha mwande yako, no wuswanu wangu wose, kanyhi nolyanza litagwa lyangu hali'gwe, litagwa lyo ‘Muwaha Mulungu.’ Nane nghuwa kumuwonela lihewa mono nene nyendile kumuwonela lihewa, nomuwonela lusungu mono nene nyendile kumuwonela lusungu. 20Ninga agwe si kosuma kumbonela lukulu wusu wangu, hambi nha hasina munhu wo wose, mono kosuma kuwuwona wusu wangu yekale mumi.” 21Hanyuma kanyhi Muwaha Mulungu yakamulonjela Musa yakatya, “Ahano behi nane, ho hali hanhu, hono agwe kokwima mucanyha ye libwe. 22No lukumyo lwangu kolo lweza lukupuluta baho, ane nokwinjiza agwe mumo mwi'zatu lye libwe lilyo, nghugubice ko muwoko wangu, sunga kolo nakondya kupuluta. 23Hanyuma ho nowuwusa muwoko wangu, nagwe kosuma kumbona ku mugongo wangu du, ninga wusu wangu si kuwuwona yaye.”
Currently Selected:
Wutuluce 33: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
