Wutuluce 32

Ndama ya zahabu

(Kum 9:6-29)

1Nawo wanhu wali weza kuwona vyono Musa yacela muno kuko mwi'tunda, hamba si yakuwuya mbela ku wulawa mwi'tunda, hodu, wakawa kwikongholela hali Haluni, wakawa kumutya, “Gwe Haluni! Ale wucinozeze milungu yono yocitonga, hambi nha si cimanyile yono yimutujile yuyo Musa mono yaciwusa ku yisi ya Misili.”

2Nayo Haluni yakawapitula yakawatya, “Ale, musole wihambo we zahabu wono wavwalile mu makutu wagolece zenyu, ne wana wenyu, we cilume na we cicekulu, mundetele.” 3Hobaho wanhu wose, wakawa kuwopola wihambo wawo we zahabu mu makutu gawo, wakawa kumuletela Haluni. 4Nayo Haluni yali yeza kuvibocela, yakawa kuvyenjedula, yakanoza ndama nyenjedulwe. Nawo wanhu wali weza kuyiwona, wakawa kuzoza wakutya, “Gwe Isilayeli, ayu yo mulungu wetu mono yaciwusa mu yisi ya Misili!”

5Nayo Haluni yakayizenjela ndama yiyo cikumbicilo, hanyuma, yakawa kuwalonjela wanhu yakatya, “I mitondo, howa na sikukuu ku soko yo Muwaha Mulungu.” 6I mitondo yaco, wanhu wakelawa kwinuka hakali mitondo muno, wakalavya mitugo so vilavywa vinyanywe, hamonga ne vilavywa vyo mulamu. Wanhu wakekala hasi, wakalya no kung'wa ko wubugu, sunga wakagala no kwinjila mu wusenyha.

7Muwaha Mulungu yakamulonjela Musa yakatya, “Ale, wutime hasi wulanje, hambi wanhu wako wono wawawusa mu yisi ya Misili, nha weyihodanga. 8Hambi nha wapatuka, wayileka lwa kamonga i nzila yono nawalajiliza. Alu wene wenozeza ndama nyenjedulwe, wakuyihemba no kuyilavizya zahabu, akuno wakulonga wakutya, ‘Gwe Isilayeli, ayu yo mulungu wetu mono yaciwusa mu yisi ya Misili! 9Nane niwawene wanhu wawa, vyono wasina cihuliko. 10Holeka Musa, wulece kunyimila. Ndekaje niwongomeze kwe likuwo lyangu liwaha. Ninga hanyuma nokunoza gwegwe hamonga ne wanago, wuwe yikungugo yiwaha.’ ”

11Ninga Musa yakamunena Muwaha Mulungu, u Mulungu wakwe, yakatya, “Gwe go Muwaha Mulungu, alo nhawule likuwo lyako, likwaka muno kuli wanhu wako, wono wawawusa gwegwe mu yisi ya Misili, kwe vilungo viwaha, hamonga no wusume wuwaha? 12Alo socici lo wuwapele Wamisili cilejeho, watye wawawusa wanhu wako ku wulawa ku yisi ya Misili, ho wuwawulajile mu matunda no kuwongomezeza lukulu? Nghukunena, wulece kukolwa ne likuwo, dedede wupitule wuhile wako, wulece kuwuleta wongomezwe wuwu muli wanhu wako. 13Gwe Muwaha Mulungu, wukumbucile za Abulahamu na Isaka na Yakobo i wetumami wako, wono gwegwe go mweneco wawelahiza wukutya, ‘Nokwinjifya zindelo zenyu nhe zinyelezi za ku wulanga cibitilila.’ ” 14Nayo Muwaha Mulungu hodu yakawa kuleka, si yawuleta wongomezwe wuwo muli wanhu wakwe.

15Musa yakawa kutima ku wulawa mwi'tunda, akuno yebate ne vibawo vyejete, vyono vyandicigwe i malajilizo mbavu zose vyono nyejete. 16Mulungu mweneco yo yavinoza vibawo vivyo, yakawa kwandika ne malajilizo mucanyha ye vibawo vivyo. 17Nayo Yoshuwa yali yeza kulihulika lizozo lye wanhu, yakamutya Musa, “Gwe Musa, lizozo lilyo likulajila nhe zozo lya wulugu.” 18Ninga Musa yakamupitula yakatya, “Gwe Yoshuwa, lizozo lilyo, si yizozo lya wusume hamba si yizozo lya wusumwe, langa lizozo lilyo lyono ane nane nghulihulika, nghuwona nhe zozo lye wanhu wono wakwimba.” 19Nawo wali weza kuyisejelela nghambi, wakayiwona yiyilya ndama, ne wanhu nawo wakuvina. Hobaho likuwo lya Musa likawa kwaka nha moto, yakawa kuvigumila hasi ye litunda vibawo vivilya, yakavitula. 20Yakawa kuyisola ndama yiyilya, yakayitakamiza mu moto, hanyuma yakawa kuyitindya yikawa wusaje. Yakawusola wusaje wuwo we ndama, yakawukologa mu malenga. Yakawa kuwadindimiza wanhu wa Isilayeli wang'we.

21Musa yakamuwuza Haluni yakamutya, “Alu gwe Haluni, wanhu wawa wakunoza nhawule, sunga nagwe kuwa kuwaletela wubi wono winha wuwu?” 22Nayo Haluni yakapitula yakatya, “Gwe Musa, nghukulomba wulece kungholelwa likuwo, ane no mwitumami wako. Hambi nha wuwamanyile wanhu wawa vyono wali dindimila ku wituma zo wubi. 23Wo weneco wono wanonjeye wakutya, ‘Haluni, wucinozeze milungu yono yocitonga, hambi nha si cimanyile yono yimwagane yuyo Musa mono yaciwusa ku yisi ya Misili. 24Holeka nane niwa kuwalonjela vyono, munhu wo wose mono yena wihambo wa zahabu yalavye. Nawo wawa kundetela, nane niwa kuvyenjedula mu moto, ne ndama yiyi vyo yinozigwe.’ ”

25Musa yakawona vyono Haluni yo yawasutizye wanhu, holeka wetuma zono wakusaka no kwiletela cevu hali walugu wawo. 26Hodu Musa yakawa kwima ha mulango we nghambi yakawuza yakutya, “Ati, nye wayangu, nani mono yali ku lubavu lo Mulungu? Ale yuyo mono yali ku lubavu lo Mulungu, yaze yeme akuno kono kwangu.” Nawo wana wose wa Lawi wakekongholela hali Musa. 27Nayo Musa yakawalonjela wawo wana wa Lawi yakatya, “U Muwaha Mulungu, u Mulungu we Waisilayeli yakutya nhavi, ‘Wanhu wose mwiwopaje mimaje yenyu mu viwino, nanye munhu na lwakwe, yapilime-pilime mono nghambi, ku wulawilila kono mulango awuno sunga ko ku mulango muyagwe, nayo mu wupilime wuwo, yawulaje nduguye we cilume, no mwendece wakwe we cilume, hamonga no mwikalani muyagwe we cilume.’ ” 28Nawo i wana wa Lawi waketuma nha vyono walajilizwa na Musa. Na mwi'zuwa lilyo, wakawulaga wanhu nha kotya elufu yidatu. 29Nayo Musa yakawalonjela Walawi yakawatya, “Alu langa izuwali, mwiyisiwanulila kuli Mulungu nyo weneco, ko witumami wo kumwitumamila Muwaha Mulungu, mu mulimo wo wukohani, mu nzila yo kuwawulaga wana wenyu we cilume hamonga ne wandugu zenyu we cilume, u Mulungu nayo kamupelenyi wumoteswe izuwali.”

Musa yakuwalombela wanhu wa Isilayeli

30Wali weza kwela mitondo yaco, Musa yakawalonjela wanhu yakatya, “Anye, mwituma wubi muno. Holeka alu nomubitila kanyhi Muwaha Mulungu kuko kwi'tunda, lunji nosuma kumunozezenyi wilamule ku soko yo wubi wenyu.” 31Ale, Musa yakawa kumubitila kanyhi Muwaha Mulungu, yakawa kumutya, “Gwe go Muwaha Mulungu, ane nghukalala muno muno, vyono wanhu awa wetuma wubi muno, hambi nha wenozeza weneco milungu yo wulambi ya zahabu. 32Ninga aluno go Muwaha Mulungu, ane nghukunena, wuwanenele wubi wawo. Na hono wulece kuwanenela, ale, nghukunena ciba nane wumhate mu citabu cako cono wuwandice wanhu wako.” 33Ninga Muwaha Mulungu yakamutya Musa, “Ane mu citabu cangu, nomupata munhu mweneco du mono yasutizye nene. 34Ninga aluno, hodu wubite wukawatonje wanhu sunga hanhu hono nghulonjeye. Ninga lanje, malayika wangu kokulongolela. Hamba nhavivyo, nane mwi'zuwa lyono nolomuzizenyi, ale, nolowalipiciza ku soko yo wubi wawo.” 35Muwaha Mulungu yakawagumilila matamwa mabi muno muno, ku soko vyono wamudindimiza Haluni, yawanozeze yiyilya ndama ya zahabu.

Currently Selected:

Wutuluce 32: LLKWW

Highlight

Compare

Copy