Wutuluce 31

Wanghula wo kulinozeleza Lihema lyono lyelile

(Wut 35:30–36:1)

1Muwaha Mulungu yakamulonjela kanyhi Musa yakatya, 2“Langa ta, Ane nimuhagula Bezaleli u mwana wa Uli, mwizukulu wa Huli wo mulango wa Yuda. 3Nayo nimumemya no Muhe wangu. Kanyhi nimupela wumanye no wizuce, mahala no wunghula. 4Ho yasume kutula milimo yo wunghula, ho yasume kwituma milimo yo kutyana zahabu, fweza, na shaba. 5Kanyhi nimupela wizuce wo wukakata mabwe go kuhamba, hamonga no wusesi we zimbawo, hamonga no wizuce we mawala gose go wunghula. 6Kanyhi nimuhagula Oholiyabu u mwana wa Ahisamaki, wo mulango wa Dani, nayo wetumane milimo hamonga na Bezaleli. Hamonga na zizo, niwapela wizuce wuwaha wanhu we hayo hayo, ku so milimo ye hayo hayo. Ho wasume kunoza vitumamilwa vyose vyono ndajilize vinozwe. 7Wo wutya, Lihema lyono lyelile, Lisanduku lye Cilagane ne ligoda lyo Lusungu, lyono lili mucanyha ye Lisanduku, hamonga ne vitumamilwa vyayo vyose. 8Kanyhi, ne meza, hamonga ne vitumamilwa vyayo, no wuwiko we zitala, hamonga ne vitumamilwa vyayo, ne cikumbicilo co kufusiza wuvumba. 9Kanyhi, hamonga ne cikumbicilo ce cilavywa cinyanywe, hamonga ne vitumamilwa vyayo. Ne ciya co wizuguzizo hamonga ne litende lyayo. 10Hamonga ne vivwalo vyono vyelile vyo mukohani Haluni hamonga ne wanagwe, wono wokwituma mulimo wo wukohani. 11Kanyhi, ne mafuta go witile, no wuvumba we mhunjile swanu, so hanhu hono helile. Nawo wavinoze vinhu vivyo vyose nha vyono nakulajiliza.”

Sabato lizuwa lyo wucehe

12Muwaha Mulungu yakamulonjela Musa yakamutya, 13“Wuwalonjele wanhu wa Isilayeli wuwatye nhavi, ‘Mweze kuzikamisa Sabato zangu mu zindelo zenyu zose, nha cinji i vilo vyo kuceha.’ Hambi zi Sabato zizo, nha co citanjilo hagati yenyu na nene. Vyono yo nene no mweneco du, mono nosuma kumwezenyi. 14Holeka muyikamise Sabato, hambi nha lyo lizuwa lyono lyelile kuli'nye. No munhu wo wose mono koyiviza, yimunojeye yawulagwe. No munhu wo wose mono kokwituma mulimo mwizuwa lilyo, kotemanulilwa lukulu kuli wanhu wakwe. 15Munojeye mwitume milimo yenyu mu vilo mutandatu, ninga lizuwa lyo mupunghati, lyo lizuwa lye ciwene lyo kuceha, lyo lizuwa lyangu lyono lyelile. No munhu wo wose mono kokwituma mulimo mwizuwa lilyo, yimunojeye yawulagwe. 16Nawo wanhu wa Isilayeli walikamise lizuwa lye Sabato mu zindelo zawo zose, ciwe citanjilo ce cilagane ce cibitilila. 17Ne nghani yiyi, cowa citanjilo ca nhondo zose muli wanhu wa Isilayeli na nene no mweneco. Hambi ane no Muwaha Mulungu, nha nawuwumba wulanga ne yinze mu vilo mutandatu, ninga lizuwa lyo mupunghati, si netuma mulimo wunji wo wose, langa nghaceha du.”

18Nayo Muwaha Mulungu yali yeza kukondya kulongana na Musa mwi'tunda lya Sinayi, Muwaha Mulungu yakamupela Musa vibawo vyejete vye mabwe, vyono mweneco Muwaha Mulungu yavyandika malajilizo mucanyha yavyo kwe cidole cakwe mweneco.

Currently Selected:

Wutuluce 31: LLKWW

Highlight

Compare

Copy