Wutuluce 30

I cikumbicilo co mulimo wo kufusiza wuvumba

(Wut 37:25-28)

1“Wunoze ne cikumbicilo co kufusiza wuvumba, ninga wucinoze ko mubici wo mukambala. 2Ne cikumbicilo cico, wucinozaje ciwe ciling'aniye wutali no wugazi wayo, wutali no wugazi wayo weze sentimita makumi mane ne 'hano kose kose, no wima wayo weze sentimita makumi 'cenda. Ne mahembe gayo geze malunze hamonga ne cikumbicilo ceneco. 3Naco cikumbicilo cico wucihiliwe ne zahabu nengu, mucanyha yayo, na mu zimbavu zayo zose mu mhelo yayo, sunga na mu mahembe gayo. Kanyhi wucinozeze no mugo wayo wa zahabu. 4Wunoze nyamwidole nyejete za zahabu, wuzinamatize ha kasika yo mugo wayo, ninga wuziwicile akuno na akuno ziwe zidomile. Ne zinyamwidole zizo, zosuma kusopekwa libici lyo kucidinghulila cikumbicilo lono cikudinghulwa. 5Nago mabici gago go kucidinghulila, wuganoze ko mubici wo mukambala, wugahiliwe ne zahabu. 6Ne cikumbicilo cico wuciwice kunze ye lipaziya lyo mwenda, lyono litemanuye hono holili Lisanduku lye Cilagane, hanhu hono ane nowa kwitang'anila nagwe. 7Nayo Haluni nhondo zose lono yakuhelela mugati ha wunozeleza zitala zono zili baho, kosuma kufusa wuvumba mucanyha ye cikumbicilo cico, wono wina mhunjile swanu.

8“Hanyuma kanyhi, kofusa wuvumba mu cipango ce cinyamihe lono yakukoleleza zitala. Ne cilavywa cicino co wuvumba, cowa kulavywa nhondo zose hamba kulecelela yaye, mu zindelo zenyu zose. 9Kanyhi, mulecele lukulu kufusa wuvumba wono si welile mu cikumbicilo cico, hamba kulavya cilavywa cinyanywe, hamba cilavywa co wusaje, hamba kujidila mucanyha yayo cilavywa ce cing'wegwa. 10Nayo Haluni yimunojeye yawe kunozeza wilamule mu mahembe gaco, mu mwaka kamonga. Nayo konozeza wilamule mu nzila ye sakami ye cilavywa co wubi, mu mwaka kamonga, mu zindelo zenyu zose. Ne cikumbicilo cico kuli'ne, cowa celile muno muno, ane no Muwaha Mulungu.”

Kodi so Lihema lyono lyelile

11Muwaha Mulungu yakamulonjela Musa yakamutya, 12“Mu madaha gogose lono wakuwawala wanhu wa Isilayeli, yiwanojeye munhu wowose yawe kulavya kuli'ne yikombo so wumi wakwe mweneco. Ho yalece kugwilwa ne litamwa libi mwi'pango lono wakuwalwa. 13No munhu wo wose mono kowalwa, yimunojeye yalavye mu nghango ye mapesa gono gosakwa, mu mapesa gono gakwitumamilwa mwi Hema lyono lyelile. Na cico co cilavywa cakwe cono kondavizya. 14No munhu wo wose mono yanojeye yawalwe, yeze mono yaficile myaka makumi mejete no kuciza, kanyhi yo yanojeye yandavizye ne cilavywa cico. 15Nawo lono wakulavya cilavywa co wilamule ku soko yo wumi wawo, u munhu mugoli yalece kulavya yacize, hamba munhu muciwa nayo yalece kulavya zicepuce si nha liwalo lyono likusakwa. 16Nagwe wubocele zipesa zizo zo wilamule ku wulawa kuli wanhu wa Isilayeli. Wuzitumamile so milimo ya mwi 'Hema lyono lyelile. Ne mapesa gago, gonoza nane niwakumbucile no kuwadima.”

Ciya ca shaba co wizuguzizo

17Muwaha Mulungu yakamulonjela kanyhi Musa yakatya, 18“Ale, wunoze ciya ca shaba cono cowa cina ne litende lyayo lya shaba, so wizuguzize. Wuciwice haciligati ye Lihema lyono lyelile ne cikumbicilo. Wucitajile ne malenga. 19Nayo Haluni hamonga ne wanagwe, wogetumamila malenga gago so wizuguze mu miwoko ne migulu yawo. 20Na lono wakali si nenjila mwi 'Hema lyono lyelile, na lono weza kusejelela ha cikumbicilo ho walavye cilavywa cinyanywe, yiwanojeye wezuguze mu malenga gago ho walece kufwa. 21Yiwanojeye wezuguze miwoko ne migulu yawo ho walece kufwa. No wutemye wuwu, yiwanojeye wawukamise mu zindelo zawo zose, sunga cibitilila.”

Mafuta go witile

22Muwaha Mulungu yakamulonjela Musa yakatya, 23“Ale, wulondole vihatilwa avino vye mhunjile swanu muno muno: Manemane ge malenga gawe kilo mutandatu, mudalasini nawo we mhunjile swanu, wuwe kilo yidatu, magaji ge mhunjile swanu, gawe kilo yidatu. 24No mudalasini we liwala linji, nawo wuwe kilo mutandatu. Ne vipimo vivyo vyose, viwe nha vyono vinha vipimo vya mwi Hema lyono lyelile. Wusole kanyhi na lita yine za mafuta go muzeyituni. 25Na mu wulawa mu vinhu vivyo, wunoze mafuta gono gelile go witile, so mulimo wo wusiwanule. Wuvihanzahanze vivyo vyose hamonga kotya manukato. 26Hanyuma, wulijidile Lihema lyono lyelile mafuta gago, hamonga ne Lisanduku lye Cilagane, 27ne meza hamonga ne vitumamilwa vyayo, ne cikumbicilo co kufusiza wuvumba, 28ne cikumbicilo ce vilavywa vinyanywe, hamonga ne vitumamilwa vyayo vyose, ne ciya co wizuguzizo hamonga ne litende lyayo. 29Na vivino vyose wuvisiwanule, navyo vyowa vyelile muno muno. Ne cinhu co cose cono covipamiza vitumamilwa vivyo, naco cowa cezwa. 30Hanyuma, wumwitile mafuta Haluni hamonga ne wanagwe, wuwasiwanule ho wanyitumamile mu witumami wo wukohani. 31Wuwalonjele wanhu wa Isilayeli wutye nhavi, ‘Ago gowa go mafuta gangu gono gelile go witile, so wusiwanule mu zindelo zenyu zose. 32Ne mafuta gaga, galece kujidilwa kuli munhu yunji wo wose mono si mukohani, hamba galece kunozwa mafuta ganji gehwananizwe na gagano. Vyono mafuta gaga gono mahanzahanzwe, go mafuta gono gelile. 33No munhu wo wose mono kokwiga, yanoze mafuta gono genha gaga, hamba hono mafuta gaga yagetile muli munhu mono si yanojeye, munhu yuyo kotemanulilwa lukulu muli wanhu wakwe.’ ”

Wuvumba

34Muwaha Mulungu yakamulonjela kanyhi Musa yakamutya, “Ale, wusole vipimo vyono viling'aniye, vye hati ye mhunjile swanu, nha vyono nhavi, natafi, na shekeleti, na kelibena, hamonga no wuvumba we mhunjile swanu. 35Nagwe witumamilaje vinhu vivyo, wunoze wuvumba wuhanzahanze nhe manukato, wuwutajile no mwino ho wuwe wuswanu kanyhi welile. 36Hanyuma yayo, wusagaje wunji wuwe wusaje wono wutibuce, wuwinjize mwi Hema lyono lyelile, wuwuwice he Lisanduku lye Cilagane, i hanhu hono nowa kwitang'anila nagwe. No wuvumba wuwo wowa welile muno kuli'nye. 37Nanye, mulecele lukulu kunoza wuvumba wunji, wono wihwanile wuvumba wuwu, so vitumamilwa vyenyu nyo weneco. Hambi wuvumba wuwu nha wowa welile hali'ne. 38No munhu wo wose mono kokwijelela yanoze wuvumba wono winha wuwu, yawitumamile kotya manukato kwe visakwa vyakwe mweneco, munhu yuyo kotemanulilwa lukulu muli wanhu wakwe.”

Currently Selected:

Wutuluce 30: LLKWW

Highlight

Compare

Copy