Wutuluce 29

Wulajilize wo kumusiwanulila Haluni hamonga ne wanagwe, mu mulimo wo Wukohani

(Lawi 8:1-36)

1“Azi nazo zo wuwanozezaje Haluni hamonga ne wanagwe, ho wuwasiwanule wanyitumamile mu mulimo wo wukohani. Sole nzeku monga, hamonga na nduwilu nyejete zono zisina cilema, 2hamonga ne mikate yono yisina cisase, ne maandazi gono gasina cisase, gono gatiwigwe hamonga ne mafuta, hamonga ne capati zono mbakwe mafuta. Na vivi vyose wuvinozaje ko wusaje we ngano wono wunamuce muno muno. 3Hanyuma wuyitajile mikate yiyo mu nhoto, wundavizye vyose hamonga, lono wukundavizya cilavywa ce nzeku, hamonga ne zinduwilu zizo zi nyejete.

4“Na hanyuma yayo, wumusole Haluni hamonga ne wanagwe, wuwalete ha mulango we Lihema lyono lyelile, wuwazuguze migulu yawo. 5Wusole vivwalo vivilya vye cikohani wumuvwice Haluni, nha cinji, shati, kanzo, efodi, ne cifuko ca ha mhambaga, wumuwope no musipi wuwulya wono wuhonigwe ko wunghula muno. 6Wumuvwice ne kofiya mu mutwe wakwe. Ne cibati cicilya cono candicigwe ‘Welile kuli Muwaha’ wuciwopeleze naco mucanyha ye kofiya he handa lyo musu wakwe. 7Na kolo wakondya kuzinoza zizo zose, wusole mafuta gagalya go kusiwanulila, i mafuta go witile, wumujidile Haluni mu mutwe wakwe, no kumubaka mafuta so wusiwanulwe wakwe.

8“Hanyuma wuwasole nawo wanagwe, nawo wuwavwice zi shati. 9Wuwawope ne misipi mu viwino vyawo, no kuwavwika ne zi kofiya zawo. Mu nzila yiyi yo kowasiwanulila Haluni hamonga ne wanagwe, no wukohani wowa muli wene hamonga ne zindelo zawo ko wutemye we cibitilila.

10“Na kolo zakondya zizo, ale wuyilete nzeku yiyilya he Hema lyono lyelile. Nayo Haluni hamonga ne wanagwe, wayijelece miwoko yawo mu mutwe, 11hanyuma nagwe wuwe kuyiwulajila hali Muwaha Mulungu, baho ha mulango we Lihema lyono lyelile. 12Wuwe kusola sakami ndodo no kuyibaka mu zinhuzi ze cikumbicilo kwe cidole cako, ne sakami yose yono yosigala, wuyimwagaje baho hasi ye cikumbicilo. 13Kanyhi wusole mhama yose yono yifunicize wutumbu, ne nhandamala yono yili mwi'toga, hamonga ne zifigo zi nyejete, hamonga ne mhama yayo. Na vivyo vyose wuviticimizize mucanyha ye cikumbicilo. 14Ninga i nyama ye nzeku yiyo, ne nyhingo yayo, no wutope wayo, wuvisolaje wukaviticimizize mu moto kunze ye nghambi yenyu. Na yiyo, co cilavywa co wubi.

15“Kanyhi wusole nduwilu monga ya muli zinduwilu zizilya zi nyejete, wumulonjele Haluni hamonga ne wanagwe, wayijelece miwoko yawo mu mutwe. 16Nagwe wuyiwulaje, wusole sakami yayo, wuyimize mu cikumbicilo cose mbavu zose. 17Wusole nyama yayo wuyitemase temase, wusole wutumbu wayo wuwukweme ne malenga hamonga ne migulu yayo, hanyuma wuvilundice vinhu vivyo vyose hamonga no mutwe wayo. 18Wuyiticimize nduwilu yose mu moto mucanyha ye cikumbicilo, wundavizye cilavywa cinyanywe. Ne mhunjile ye cilavywa cicino, yinyendezaga muno.

19“Hanyuma, wuyisole yi yilya nduwilu nzagwe nayo, wumulonjele Haluni hamonga ne wanagwe, wayijelece miwoko yawo mu mutwe. 20Nagwe wuyiwulaje, wusole sakami yayo ndodo, wumubace Haluni hamonga ne wanagwe, mu makutu gawo go lubavu lo kulume, hamonga ne vidole kululu vya mu miwoko yawo yo kulume, hamonga ne vidole kululu vye migulu yawo yo kulume. Ne sakami yono yosigala, wuyimize mu cikumbicilo cose mbavu zose. 21Kanyhi wusole sakami ndodo yono yili mu cikumbicilo, wusole ne mafuta go kusiwanulila, wumumizize Haluni hamonga ne vivwalo vyakwe, i wanagwe, nawo nhavivyo, hamonga ne vivwalo vyawo. Nayo Haluni hamonga ne wanagwe, hamonga ne vivwalo vyawo vyose, wowa wakondya kusiwanulilwa kuli'ne mu nzila yiyo.

22“Kanyhi wuwe kusola mhama ye nduwilu yiyo, hamonga no mucila wayo, ne mhama yose yono yifunicize wutumbu, ne nhandamala yono yili mwi'toga, hamonga ne zifigo zi nyejete, ne mhama yayo, wusole ne cima co mugulu wo kulume. Hambi nduwilu yiyo nha yo yo mulimo wo kusiwanula. 23Na mu nhoto yiyilya yono yili hali'ne, ane no Muwaha Mulungu, yono yina mikate yono yisina cisase, wusole mumo namo mukate monga, ne lindazi limonga lyono litiwigwe hamonga ne mafuta, wusole na capati monga. 24Na vyose vivyo, wuviwice mu miwoko ya Haluni na mu miwoko ye wanagwe, nawo woviyumvya ciwe ellavywa ciyumvywe hali'ne ane no Muwaha Mulungu. 25Hanyuma, wuvisole kanyhi ku wulawa mu miwoko yawo, wuviticimize no moto mucanyha ye cikumbicilo, hamonga ne cilavywa cinyanywe, viwe mhunjile swanu yono yonyendeza nene no Muwaha Mulungu. Naco cico co cilavywa cono cikunozwa no moto.

26“Hanyuma wusole ne nyama ye nghwa ye nduwilu yiyo, yono yitumamiywe mulimo wo kumusiwanula Haluni, nagwe wuyiyumvye, ciwe cilavywa ciyumvywe hali 'ne no Muwaha Mulungu. Nayo yowa lyo ligawo lyako. 27Na lono mukohani yakusiwanulwa, nyama ye 'nghwa hamonga ne nyama ye cima ce nduwilu vyono vyokwitumamilwa so mulimo wo wusiwanuzi, avyo vyamule viletwe visiwanulwe ku soko yangu, ho viwe co citanjilo co kundavizya 'ne. Navyo vyowa lyo ligawo lya Haluni hamonga ne wanagwe, 28na vivyo vyowa lyo ligawo lyono kowa kupegwa nhondo zose Haluni hamonga ne wanagwe, ku wulawa kuli wanhu wa Isilayeli. Hambi nha lyo ligawo lye posho ye wakohani yono yowa kulavywa ne wanhu wa Isilayeli, lono wakulavya vilavywa vyo mulamu. Nawo co cilavywa cawo kuli Muwaha Mulungu.

29“Nayo Haluni kolo yafwiza, vivwalo vyakwe vyo wukohani, wapegwe wanagwe, wavivwale, ho wawicilwe miwoko wawe wakohani. 30Nayo mwana wa Haluni, mono kowa yanozwa yawe mukohani ho yahalile hanhu ho sogwe, yavwale vivwalo vivyo. Yenjile mwi 'Hema lyono lyelile, yetumame hanhu hono helile kwa vilo mupunghati.

31“Nyama ye nduwilu yiyo yono yokwitumamilwa mulimo wuwo wo wusiwanuzi, wuyisole wuyihemusize baho i hanhu hono helile. 32Wuwapele Haluni hamonga ne wanagwe nyama yiyo, nawo wayilile ha mulango we Lihema lyono lyelile, hamonga ne mikate yiyilya yono yisigaye mu nhoto. 33Nawo walye weneco du vinhu vivyo vyono vitumamiywe nhe kumbiko, na so wilamule, ha wityatye wo wuhembi wo wuwicilwe miwoko ho wawe wakohani. Ninga wulecele lukulu kumukombola munhu yunji wowose yavilye vinhu vivyo, hambi avi nha vinhu vyono vyelile. 34Ne nyama yo yose, hamba mikate yo yose muli vivyo, hono visigale sunga hakali mitondo, hodu, vitakamizwe mu moto, vilece kuligwa na yunji, hambi nha vyelile.

35“Ale, nhavivyo vyo wuwatendelaje Haluni hamonga ne wanagwe muli zose, nha vyono nghulajilize. Wuwasiwanule mu vilo mupunghati. 36Nagwe mu vilo vivyo, nhondo zose, weze kulavya nzeku yiwe cilavywa co wubi, ku so wilamule. Na mu wunoza nhavivyo, kowa wakondya kuceza cikumbicilo. Hanyuma wucijidile mafuta ho wucisiwanule. 37Nagwe mu vilo mupunghati, kocinozeza wilamule cikumbicilo no kuceza. Kolo weza wazikondya zizo, ale nhondo, cikumbicilo cowa cakondya kwelela lukulu, na muli cinhu co cose cono copamiza cikumbicilo, hodu naco cowa celile.

Vilavywa vye nhondo zose

(Wuw 28:1-8)

38“Na mu vilo vyose vyono vikuza, weze kulavya vilavywa mu cikumbicilo vinhu avi, nyana nyejete za ngholo zono zificile mwaka monga. 39Nyana nongozi wuyiwulaje hakali mitondo, na ye kejete nayo wuyiwulaje mwi'pango lye cinyamihe. 40Nagwe wuyilavye ngholo yiyo yinongozi, hamonga na kilo monga yo wusaje, wono wunamuce muno, wono wuhanzahanze hamonga na lita monga ya mafuta malengu, hamonga na lita monga ya divayi, viwe cilavywa ce cing'wegwa. 41Ne ngholo nzagwe nayo wuyiwulaje, wuyilavye hamonga ne cilavywa co wusaje na ce cing'wegwa, nha vyono wunozize hakali mitondo. Ne mhunjile ye cilavywa cico yono yikunozwa no moto, yonyendeza muno ane no Muwaha Mulungu. 42Ne cilavywa cici cinyanywe, cowa kulavizywa nhondo zose ha mulango we Lihema lyono lyelile, mu zindelo zenyu zose zono zikuza. Nane ho nowa kwitang'anila nanye baho, no kuduwana nanye. 43Nokwitang'anila ne wanhu wa Isilayeli, no lukumyo lwangu lohanoza baho hawe hanhu hono helile. 44Nane nolisiwanula Lihema lyono lyelile hamonga ne cikumbicilo, viwe vyelile. Nayo Haluni hamonga ne wanagwe, nowasiwanula ho wanyitumamile mu mulimo wo wukohani. 45Nane nokwikala muli wana wa Isilayeli, nowa Mulungu wawo. 46Nawo baho ho womanyila vyono ane yo nene Muwaha Mulungu, u Mulungu wawo, mono nawawusa wawuce mu yisi ya Misili, ho nikale muli wene. Ane yo nene Muwaha Mulungu, u Mulungu wawo.”

Currently Selected:

Wutuluce 29: LLKWW

Highlight

Compare

Copy