Wutuluce 28

Vivwalo vye Wakohani

(Wut 39:1-7)

1“Nagwe wumulete muwahawo Haluni hali 'ne, hamonga ne wanagwe, Nadabu, Abihu, Eleyezali, na Itamali ku wulawa mu Waisilayeli, ho wanyitumamile mu mulimo wo wukohani. 2Ninga nagwe wumuhonelaje muwahawo Haluni, vivwalo vyo wukohani, ho yejele mu nhojo no wuswanu. 3Nagwe wuwalonjele wanhu wose wono wena wumanye, i wanhu wono niwapelile wizuce, ho wamuhonele muwahawo Haluni vivwalo vivyo vyo wukohani, nayo ho yasiwanulwe so mulimo wangu wo wukohani. 4Wuwalonjele wamunozeze vinhu avino, cifuko cono kovwala ha mhambaga, efodi, kanzo, no musweko we mawalawala, no mukumbo, hamonga no musipi. Nawo wahone vinhu vivyo vyo wukohani, wamuhonele muwahawo Haluni, hamonga ne wanagwe, ho wanyitumamile mu mulimo wo wukohani. 5Nawo wahoni wawo, lono wakuhona myenda yiyo, wetumamilaje liwala lye buluu ne liwala lyo lugandu hamonga ne liwala lidunghu, ne zimhuti za zahabu, ne bafuta swanu, mbote.

6“Nayo efodi wayihonelaje zimhuti za zahabu ne bafuta ye liwala lye buluu, ne liwala lyo lugandu ne liwala lidunghu, hamonga ne bafuta swanu, mbote, kanyhi yono honwe viswanu muno ko wunghula. 7Wayihonelezezaje ne vikowa vyayo mu mamhembo gayo, ho yisume kusuhikwa viswanu mu mawega. 8No musipi wo kuyiwopela yiyi efodi, weze musipi wono muhonwe ko wunghula muno, muno. Kanyhi weze muhonelwe vinhu vivilya vyono vihonelwe mu efodi, nha cinji, zimhuti za zahabu, bafuta ye liwala lye buluu, ne liwala lyo lugandu, hamonga ne liwala lidunghu, mu bafuta swanu, mbote.

9“Hanyuma kanyhi, wusole mabwe mejete ge Salidoniki, wandice matagwa ge wana yikumi na wejete wa Yakobo mucanyha yago. 10Wandice matagwa mutandatu mwi'bwe lilongozi, ne matagwa ganji mutandatu, mwi'bwe lye kejete. Matagwa gago wugandice nha vyono wetyatizye mu ndelwa zawo. 11Matagwa gago wugandice mucanyha ye mabwe gago, nha vyono mutyana vyuma kanozaga muhuli, kanyhi wugahiliwe ne zahabu. 12Hanyuma wugatumbice mu mulya mu vikowa vye efodi vyono vibate mu mawega akuno na akuno, ho gawe nha citanjilo ce milango yikumi na myejete ye Waisilayeli. Nayo Haluni kogavwala matagwa gago mu mawega gakwe, gawe nha cikumbucizo hali'ne no Muwaha Mulungu kuli wanhu wangu. 13Kanyhi wuganozezaje ne vibatilizo vyejete vya zahabu, 14hamonga ne mikufu myejete ya zahabu nengu, yeze mibotwe kotya milejehe. Wuyikoze mikufu yiyo mumo mu vibatilizizo.”

Cifuko ca ha mhambaga

(Wut 39:8-21)

15“Kanyhi, wuhone cifuko ca ha mhambaga ce ning'aniza, naco wucihonaje ko wunghula muno muno nha vyono wuyihonile efodi, wucihonaje ko wuputi wa zahabu, ne bafuta ye liwala lye buluu, ne liwala lyo lugandu, hamonga ne liwala lidunghu, wucihonaje kwe bafuta swanu, mbote. 16Ne cifuko cico ceze ciling'aniye wutali kose kose, no wutali wayo ne cipinga cayo, ceze ca sentimita makumi mejete mejete na nyejete kose kose, cono cosuma kupetyeka. 17Hanyuma, wucihambe ne vibwe vyo wuguzi wukamu micilili mine. Mucilili mulongozi, weze wa akiki, topazi, ne alimasi ye liwala lidunghu, 18no mucilili we kejete, weze wa zamalidi, yakuti samawi, na alimasi, 19mucilili we kadatu, weze wa yasinito, akiki ndunghu, na amesisito, 20no mucilili we kane, weze wa zabalijadi, salidoniki na yasipi, ne vibwe vyose vyeze vinamatizizwe na zahabu. 21Na ho baho, howa na vibwe yikumi na vyejete, vyono vyandicigwe matagwa yikumi na mejete, ge wana wa Yakobo, citanjilo ce milango yikumi na myejete ye Waisilayeli. 22Nagwe wunoze mikufu ya zahabu nengu, yono yibotigwe kotya mulejehe, ku soko ye cifuko cico. 23Kanyhi wunoze nyamwidole nyejete za zahabu, wuzihoneleze mu mamhembo mejete ga kucanyha ge cifuko cico, 24wusole mikufu yiyo ye zahabu, nayo wuyiwopeleze mu zizo zinyamwidole. 25Hanyuma, wusole visonje vyo mukufu we zahabu, wuviwopeleze mu vibatilizizo vyejete vye cifuko, ho visume kwiyilunza na acilya ce efodi, cono cibate mu mawega ku lubavu lwa kono mwande. 26Kanyhi wunoze nyamwidole nyejete za zahabu, nazo wuzihoneleze mu mamhembo mejete ga kusika, ku lubavu lwa mugati ye cifuko ca ha mhambaga, ciwe cili behi na efodi. 27Wunoze kanyhi nyamwidole nyejete zinji za zahabu, zizo nazo wuzihoneleze mu mamhembo ga kusika ge efodi, hono vilunzize efodi no musipi wono wuhonigwe ko wunghula. 28Naco cifuko wuciwopeleze ko mulejehe we liwala lye buluu hamonga ne efodi, mu nzila ye zinyamwidole zayo. Na mu nzila yiyo, u musipi wuwo wono muhone ko wunghula, hamba si wosuma kuhogoha yaye.

29“Nayo Haluni lono yakwinjila i hanhu hono helile, kocivwala cifuko cico ca ha mhambaga cono candicigwe matagwa ge milango ye wanhu wa Isilayeli, nane no Muwaha Mulungu, ho sume kuwakumbucila i wanhu wangu nhondo zose. 30Nayo Haluni, mu cifuko cico, yatajile Ulimu na Tumimu, yavidinghule ha mhambaga yakwe lono yakunyiziza ha mwande yangu. Na mu mapango gago, yimunojeye nhondo zose yeze yacivwalile cifuko cico, ho yasume kuwumanya wuhile wangu wa kuli wanhu wa Isilayeli.”

Vivwalo vinji kanyhi vye Cikohani

(Wut 39:22-31)

31“Kanyhi wuhone kanzo ye liwala lye buluu, yono Haluni kowa kuyivwala kusi ye efodi. 32Nayo yeze yina no wukozo wo mutwe haciligati yayo. No wukozo wuwo wo mutwe, wuwuhonelaje lipindo ho kanzo yilece kudemuka. 33Na kusika yayo lipindo lyayo, wulihonelaje wulipilimye wihambo we makomamanga ge liwala lye buluu, ne liwala lyo lugandu hamonga ne liwala lidunghu, wuwicile ne vinyanjili hagati ya gago makomamanga, 34wuwicile yikomamanga, hanyuma cinyanjili, yikomamanga hanyuma cinyanjili, sunga wuyipilimye kanzo yose, vyose vyeze vya zahabu. 35Nayo Haluni kowa kuyivwala kanzo yiyo lono yakwitumama mulimo wo wukohani. Na mwi'pango lono yakwinjila i hanhu hono helile hali'ne, na mwi'daha lono yakulawila, mulilo we vinyanjili wowa kuhulikwa, nayo sikosuma kuwulagwa yaye.

36“Kanyhi wunoze cibati ca zahabu nengu, naco wucandice mucanyha yaco nha vyono mu muhuli, wucandice nhavi, ‘Welile kuli Muwaha.’ 37Ne cibati cico naco, wuciwopeleze no mukumbo ko musipi we liwala lye buluu. 38Nayo Haluni kowa kucivwala he handa lyo wusu wakwe, nayo kowudinghula wuhoswe wose, wono wanhu wa Isilayeli wowa wawunoza, lono wakulavya likumbiko lyono lyelile. Nane nogavumila makumbiko gawo. 39Wumuhonelaje Haluni cisweko ca bafuta swanu, kanyhi wumuhonele no mukumbo wa bafuta swanu, hamonga no musipi wono muhonwe viswanu muno.

40“Nawo i wana wa Haluni, wuwahonelaje kanzo, ne misipi, hamonga ne zikofiya, nawo ho wejele mu nhojo no wuswanu. 41Nagwe wumuvwice vivwalo vivyo Haluni, hamonga ne wanagwe, wuwetile mafuta, wuwawicile miwoko wuwasiwanule, no kuweza, ho wanyitumamile mu mulimo wo wukohani. 42Kanyhi wuwahonele ne zi kaputula ze bafuta zono zowa zilawiliye mu wulawa ha ciwino sunga ku vima, ho zihundice vipwi vyawo. 43Nayo Haluni hamonga ne wanagwe, wowa kuzivwala kaputula zizo nhondo zose lono wakwinjila mwi 'Hema lyono Lyelile, na lono wakusejelela ha cikumbicilo, ho wetumame witumami wo wukohani i hanhu hono helile, ho walece kuwulagwa so wikala cipwi wawo. No wutemye wuwuno, wowa wutemye we cibitilila kuli Haluni na kuli zindelo zakwe zose.”

Currently Selected:

Wutuluce 28: LLKWW

Highlight

Compare

Copy