Wutuluce 24

Cilagane cikukangazwa

1Muwaha Mulungu yakamulonjela Musa yakatya, “Gwe Musa, muze akuno kono kwangu kwi'tunda kucanyha, gwegwe hamonga na Haluni, na Nadabu na Abihu, muze hamonga ne wanyamhala makumi mupunghati we Waisilayeli. Na kolo mweza muli behi no kufika kono kwangu, na lono mukali cidaha hadodo, nhondo mwiname hasi muhembe. 2Langa agwe Musa, yo gwegwe du wuli wene mono kosuma kusejelela, ninga wanji wose, walece kusejelela behi. Nawo Waisilayeli, walece kuza akuno kwi'tunda kucanyha.”

3Nayo Musa yakawa kubita no kuwalonjela wanhu wose, zinghani zose zono Muwaha Mulungu yalajilize. Nawo wanhu wakapitula wose hamonga wakatya, “Zinghani zose zono yalonjile Muwaha Mulungu, ase cozituma.” 4Nayo Musa yakawa kuwandika wulajilize wose wo Muwaha Mulungu. Hanyuma ya zizo, Musa yakelawa kwinuka hakali mitondo muno muno. Yakazenga cikumbicilo ha mwejelele we litunda, yakawicila masumbili yikumi na mejete, nha vyono linha liwalo lye milango yose yikumi na myejete ye Waisilayeli. 5Hayuma yakawa kuwatuma wazelelo we Ciisilayeli, wakamulavizya Muwaha Mulungu vilavywa vinyanywe, hamonga ne vilavywa vyo mulamu. 6Nayo Musa yakasola sakami ndodo ye mitugo yiyo, yakayitajila mu zi sahani. Ne sakami yono yasigala, yakayimiza mu cikumbicilo. 7Hanyuma yayo, Musa yakacisola citabu cono cali candicigwe Cilagane co Muwaha Mulungu, yakacisoma hali wanhu, nawo wanhu wakatya, “Azi zose zono yalonjile Muwaha Mulungu, ase cozituma, kanyhi cowa ne cihuliko muli zose zono yalajilize.”

8Nayo Musa yakawa kuyisola sakami, yakawa kuwamiziza wanhu akuno yakutya, “Ayino yo sakami yono yikucikangaza cilagane cono Muwaha Mulungu yacinozize nanye, lono yamupelelenyi gaga malajilizo gakwe.” 9Nawo Musa na Haluni na Nadabu na Abihu, wakawa kubita kwi'tunda kucanyha, hamonga ne wanyamhala makumi mupunghati we Waisilayeli. 10Wakamuwona Mulungu we Waisilayeli. Na hasi ye magulu gakwe, kwali kocili cinhu cono cinha sakafu ya mabwe gono gakung'alala, maswanu kotya wulanga wono wukulengalenga. 11Nayo Mulungu hamba si yawatamisa wawo walongola we Waisilayeli. Wakamuwona Mulungu, wakalya, wakang'wa.

Musa mwi'tunda lya Sinayi

12Muwaha Mulungu yakamulonjela Musa yakatya, “Musa, wuze kono kwangu mwi'tunda kucanyha, na lono wuli ku kuno, ane nokupela mbawo nyejete za mabwe, zono zandicigwe malajilizo gangu gose gono nagandika, ho niwejize Waisilayeli.” 13Musa hamonga na Yoshuwa mwitumami wakwe, wakawa kwiwikaniza. Nayo Musa yakawa kubita kucanyha kwi'tunda lyono lyelile. 14Musa yakawalonjela Wanyamhala yakawatya, “Ale, anye mucilindilaje bahano sunga kono cowuyila. Haluni na Huli wowa wali hamonga nanye. Na muli wose mono kowa yena nghani yono yikumugaza, ale, yawawonaje wene.”

15Hodu, Musa yakawa kubita mwi'tunda lya Sinayi kucanyha. Ne livunde likawa kuligubika litunda. 16Ulukumyo lo Muwaha Mulungu lukatima mwi'tunda lya Sinayi mucanyha, livunde nalyo likaligubika litunda lya Sinayi vilo mutandatu. Na mwizuwa lyo mupunghati, Muwaha Mulungu yakawa kumucema Musa mu wulawa muciligati ye livunde lilyo. 17No lukumyo lulo lo Muwaha Mulungu, lukejela ha meso ge Waisilayeli, kotya moto wono wukutakamiza mwi'tunda mucanyha. 18Musa yakenjila mwi'vunde lilyo mucanyha ye litunda, yakekala kuko mwi'tunda vilo makumi mane misi ne cilo.

Currently Selected:

Wutuluce 24: LLKWW

Highlight

Compare

Copy