Wutuluce 23
23
Ling'ani no wiling'ano
1“Wulece kuzitandaza zinghani zo wulambi. Kanyhi wulece kwihanza no munhu mubi ho wuwe muhomelezi wakwe wo wulambi. 2Wulece kutyatya lipuga lye wanhu lono wakwituma i zimbi, hamba wulece kwihanza ne lipuga lye wanhu, no kulavya wuhomelezi kuli munhu we ling'ani, ho yajilize ling'ani yakwe. 3Kanyhi wulece kumuhijila mbejele u muciwa mu calo cakwe.
4“Na hono wuyagane ng'ombe hamba ndogowe yo mulugu wako yajiliye, ale, wumugomolelaje munya ng'ombe hamba ndogowe yakwe. 5Na hono wuyiwone ndogowe yo munhu mono yakusulile yigwiye hasi, yina no mutegulo wayo, ale, wumutazilizaje munhu yuyo kuyinula yiyo ndogowe yakwe, wulece kumuleka yaye wumupulute vyono yakusulile.
6“Wulece kuyiwajiza ling'ani yono yimunojeye u munhu muciwa mu calo cakwe. 7Kanyhi wulecele lukulu kulavya wuhomelezi wo wulambi, hamba kumwambuza munhu mono yasina lisutya, kawa kufwa bwete. 8Wulece kubocela mafupo, hambi mafupo nha gabofuzaga wawaha no kwajiliza zinghani za we ling'ani. 9Wulece kumwiwonela mujenzi, hambi nanye nha mumanyile wuwe wo wujenzi vyono winha. Nanye nha mwali muli wajenzi mu yisi ya Misili.”
Mwaka wo mupunghati ne lizuwa lyo mupunghati
10“Mu myaka mutandatu, weze kuyihadika migunda yako hamonga no kugomola vilimwa vyayo. 11Ninga mu mwaka wo mupunghati, wuyilekaje migunda yako yiceheze, hamba wulece kududula cinhu co cose cono cowa cisigaye mumo. Iwaciwa nawo ho walye vyono vyowa visigaye mumo, hamonga ne vilimu vya mu mbago navyo vilye. Sunga na mu mugunda wako we mizabibu, namo konoza nhavivyo, hamonga no mugunda we mizeyituni.
12“Na mu vilo mutandatu, kokwituma milimo yako, ninga lizuwa lyo mupunghati, wulece kwituma mulimo wunji, nawo wanago, hamonga ne wetumami wako, ne wajenzi wono wakukwitumamila, yiwanojeye wose wacehe. Sunga ne zing'ombe zako ne zindogowe zako, zose zoceha. 13Ale, wuzibataje no kuzikamisa zose zono ane no Mulungu nimulonjelenyi. Kanyhi mulecele lukulu kuyihemba milungu yinji yose yo wulambi, hamba kuyitambula kose mu milomo yenyu.”
Zi sikukuu zidatu zimbaha
(Wut 34:18-26; Kum 16:1-17)
14“Munoze sikukuu yidatu mu mwaka, ku soko ye lilumbo lyangu. 15Mu mwezi wa Abibu, mwezi wono mwawucila mu yisi ya Misili, monoza sikukuu ye mikate yono yisina cisase, nha vyono namulajilizenyi. Holeka mulecele lukulu kulya mukate wono wina cisase, mu vilo vivyo vyo mupunghati vya mu sikukuu yiyi. Kanyhi munhu wo wose yalece kuza ku wuhembi yali bwete yasina cilavywa.
16“Muyinoze sikukuu ye nhwanga, lono mukwanza du kududula vilimwa vyenyu. Kanyhi munoze sikukuu ye vibanda, mu ndumilizo yo mwaka, lono mukuhepa mikalo ye zabibu ne mizeyituni yenyu. 17Ne walume wose weze kwikongholela hali'ne mu mwaka kadatu, ane no Muwaha Mulungu.
18“Na lono mukundavizya cilavywa, mulece kundavizya sakami ye cilavywa, hamonga no mukate wono wina cisase, hamba mulece kugaleka i mafuta ge sikukuu yangu, gasigale sunga mitondo yaco. 19Ne nhwanga nongozi ye vilimwa vyenyu, mweze kuyileta myaka yose mu Nyumba yangu nene no Muwaha Mulungu, u Mulungu wenyu. Mulece kuyitelecela nyana ye ngholo hamba nyana ye mhene mu mele ge nyina.”
Wihuwize hamonga no wulanjizwe
20“Lanjenyi, ane nomutuma malayika yamulongolelenyi ku mwande yenyu, mu muhinzo wenyu. Ho yamudimenyi mu nzila, sunga yamufisenyi mu yisi yono niyiwikanize. 21Holeka mumuhulikaje, kanyhi mweze ne cihuliko kuli zose zono komulonjelenyi. Mulece kumubedegala, hambi nha yo nene mono nimutumile. Nayo hamba si kosuma kumunenelenyi hono mumubedegale. 22Ninga hono mumuhulice kwe mitima yenyu yose, no kwituma zose zono nghumulonjelenyi, nane baho langa ho nokwihoma ne walugu wenyu wose. 23Nayo malayika wangu komulongolelenyi ku mwande yenyu, sunga yamufisenyi mu yisi ye Waamoli, ye Wahiti, ye Wapelizi, ye Wakanani, ye Wahivi, na ye Wayebusi. Nane nowongomeza wawo wose. 24Ninga mulecele lukulu kuyinamila hamba kuyihemba milungu yawo yo wulambi, hamba kuyitumamila kose, hamba kwiga mu zinghani zawo. Langa muyongomezaje milungu yawo yiyo, kanyhi mugabenanje hamonga ne masumbili gawo ge mabwe gono wagasiwanuye so wuhembi wawo. 25Nanye hono muhembe nene, no kunyitumamila nene no Muwaha Mulungu, u Mulungu wenyu, nane nomulugutizenyi mu ndigwa zenyu ne malenga genyu, nogawusa ne matamwa muli'nye. 26Kanyhi howa hasina mucekulu wo wose mono kohodanjika muda wakwe, hamba howa hasina yunji mono si yakulela mu yisi yenyu. Nane nomonjelezenyi vilo vyenyu vyo wikale wenyu mono yinze.
27“Nowanoza wanhu wose i walugu wenyu, wanyogope nene. Kanyhi nowaletela ciwajiza wawo wanhu wono mukwihoma nawo. Nane nowanoza walugu wenyu wapituce no kutiza ha mwande yenyu. 28Nowaletela woga nhinicizo, nowawinga Wahivi, Wakanani ne Wahiti. 29Ninga si nowawinga wose mu mwaka monga ng'o. Hambi hono noze nhavivyo, yisi nha yopituka yiwe nyika, sunga ne malimu ga mu mbago gokwinjipa muno muli'nye. 30Ninga langa, nowawinga hadodo hadodo, sunga kolo mukonjelezeka no kuyitema yisi. 31Ne mipaka ye yisi yenyu yowa ku wulawa mwi'lenga lya Shamu, sunga kwi'lenga lya Meditelaneya, na ku wulawilila ku nyika, sunga ko kwi'kolongo lya Efulata. Nane nomupelenyi vilungo vyo kuwasumila i wekazi wa mu yisi yiyo, nanye mowawinga, nawo womuwucilenyi. 32Mulecele lukulu kwilumbaniza nawo hamba ne milungu yawo yo wulambi. 33Hamba mulece kuwakombola wekale nanye mu yisi yenyu. Na hono munoze nhavivyo, wene womunozenyi mwitume wubi kuli'ne. Na hono muyihembe du milungu yawo yo wulambi, hodu, wowa weza mutego kuli'nye wo kumugwizenyi.”
Currently Selected:
Wutuluce 23: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
