Wutuluce 25

Vilavywa so Lihema lyono lyelile

(Wut 35:4-9)

1Muwaha Mulungu yakamulonjela Musa yakatya, 2“Ale, wuwalonjele Waisilayeli wandavizye vilavywa. Nagwe wuvibocelaje vilavywa, mu cilavywa co cose cono munhu kowa yendile mweneco kulavya. 3Navyo vilavywa vyono kovibocela vyovino, Zahabu, fweza, shaba, 4bafuta swanu, ne zimhuti ze liwala lye buluu, na ze liwala lyo lugandu, na ze liwala lidunghu, hamonga no mwenda muhonwe no wukunzeje we zimhene. 5Ne zinguwo ze zinduwilu zono nhajilwe lanji ndunghu, hamonga ne zinguwo ziswanu, hamonga ne zimbawo zo mubici wo mukambala. 6Ne mafuta ge tala, na vye mhunjile swanu, ku soko ye mafuta go witile, no wuvumba wono wina mhunjile swanu. 7Vibwe vya Salidoniki, ne vibwe vinji so wihambo we efodi yo mukohani muwaha, hamonga ne cifuko cakwe ca ha mhambaga. 8Nawo Waisilayeli nhavivilya, yiwanojeye wanozeze Lihema lyono lyelile, nane ho sume kwikala muli wene. 9Nagwe wulinoze Lihema lilyo, hamonga ne vitumamilwa vyayo, wukwiga wihwananizwe wono ane nokulajila.”

Lisanduku lye Cilagane

(Wut 37:1-9)

10“Ale, wunoze Lisanduku, wulinoze kwe zimbawo zo mubici wo mukambala, Lisanduku lilyo liwe no wutali wa sentimita yigana limonga ne kumi, no wutali walyo wuwe sentimita makumi mutandatu na mutandatu, no wugazi walyo wuwe sentimita makumi mutandatu na mutandatu nhavivilya. 11Nagwe wulihiliwe zahabu swanu mugati yalyo na kunze, kanyhi, wulinozeze mugo wa zahabu mbavu zose. 12Hanyuma, wunoze nyamwidole yine zo kulidinghulila, wuziwicile mu magulu galyo, wuwicile mugulu nyamwidole monga. 13Hanyuma kanyhi, wunoze ne mahapa matali go kulidinghulila, nago wuganoze ko mubici wo mukambala nhavivilya, wugahiliwe zahabu. 14Nago mahapa gago, wugakoze gakole mumo mu zizo zi nyamwidole, zono zili mu mbavu nyejete ze Lisanduku, ho wuwe wo wudinghulilo walyo. 15Ne mabici gago gekalaje masopeceze mu zinyamwidole zizo nhondo zose, galece kuwusizwa lukulu. 16Na mugati ye Lisanduku lilyo, wuwice zizilya zimbawo ze mabwe zinyejete ze Cilagane zono nokupela, zono zandicigwe malajilizo.

17“Hanyuma wunoze ligoda lyo lusungu lya zahabu nengu, wutali walyo wuwe sentimita yigana limonga ne kumi, no wugazi walyo wuwe sentimita makumi mutandatu na mutandatu. 18Kanyhi wunoze ne makelubi mejete ga zahabu, wugajelece mucanyha ye ligoda lilyo lyo lusungu mu mhelo yalyo. 19Wugawice makelubi gago, limonga ku mhelo ayino, ne liyagwe nalyo ku mhelo nzagwe. Wugawikaje makelubi gago ku zimhelo ze ligoda lilyo no kugalunza hamonga ne ligoda lilyo. 20Ne makelubi gago, wugawikaje gawe gedomile, ne mabawa gazo nago geze gagoloywe galigubice ligoda lyo lusungu, no wusu wago weze wulilanjile ligoda. 21Na mugati ye Lisanduku, wuwice zimbawo ze mabwe zono zandicigwe malajilizo, ne ligoda lyo lusungu nalyo, wulijelece mucanyha ye Lisanduku. 22Nane cokwitang'anila nagwe baho. Nane nokupela malajilizo gangu gose kuli Waisilayeli, ku wulawilila baho hacanyha ye ligoda lilyo, haciligati ya gago makelubi mejete gono gali hacanyha ye Lisanduku lye Cilagane.”

Meza ye mikate yono milavye kuli Mulungu

(Wut 37:10-16)

23“Kanyhi, wunoze meza kulawa mu mubici wo mukambala, meza yo wutali wa sentimita makumi munana na munana, no wugazi wayo sentimita makumi mane na yine, no wima wayo sentimita makumi mutandatu na mutandatu. 24Ne meza yiyo, wuyihiliwe zahabu nengu, wuyinozeze no mugo wayo wa zahabu. 25Hanyuma wupilimye ciciwizizo co wugazi wa sentimita makumi mutandatu na mutandatu. 26Ne meza yiyo nayo, wuyinozezaje nyamwidole yine za zahabu, nazo wuziwicile ha lubavu mu magulu ge meza mu zimbavu zose vyono yine. 27Ne zinyamwidole zizo, zo zokozwa mabici go kuyidinghulila meza yiyo, holeka wuziwicilaje behi no mugo wayo, so wudinghulila meza yiyo. 28Kanyhi wusese mahapa mejete matali go mubici wo mukambala, nago wugahiliwe zahabu, so wudinghulila meza yiyo. 29Na hanyuma kanyhi, wunoze zisahani hamonga ne visahani vyo kuwicila wuvumba baho mu meza, wunoze hamonga ne zi bilawuli ne vikombe, hamonga ne vidumu vyo kujidila vilavywa vye divayi. Ne viya vivyo vyose vyeze vya zahabu nengu. 30Ne meza yiyo, wuyiwikaje ha mwande ye Lisanduku lye Cilagane, na mucanyha ye meza yiyo, mo kowa kuyiwika nhondo zose mikate yono yelile i milavywe kuli'ne.”

Wuwiko we zitala

(Wut 37:17-24)

31“Wunoze wuwiko we zitala wa zahabu nengu. No wuwiko wuwo we zitala, nha cinji vikombe vyayo ne zimhimbili zayo, hamonga ne maluwa gayo, vyose wuvinoze kwa zahabu, kanyhi vyeze vilunzwe vyose hamonga ne litende lyayo. 32Wuwiko wuwo weze wina manhambi mutandatu, gono galawiliye mwi'tende lyayo, gawe manhambi madatu lubavu aluno, ne manhambi madatu nago gawe ku lubavu luyagwe. 33Na mu manhambi gose, linhambi limonga liwe na vikombe vidatu, vyono vihwanile kotya nhe liluwa lyo mulozi, cikombe cimonga na mhimbili yayo ne 'luwa lyayo. 34Na mwi'bici lyayo lya haciligati yayo, heze na vikombe vine vyono vihwanile kotya nhe liluwa lyo mulozi, hamonga ne zimhimbili zayo ne maluwa gayo. 35Ne hanhu hono getang'aniliye i manhambi gago go mutandatu baho he tende lyayo, wuwicile vipimbili cimonga cimonga. 36Vipimbili vivyo hamonga ne manhambi gago, vyeze vilunze hamonga no wuwiko wuwo we zitala. Wunozaje wuwiko wuwo wose kwa zahabu nengu. 37Kanyhi, wunoze tala mupunghati ku soko yo wuwiko wuwo we zitala. Wuzijelece mucanyha yayo, ho zisume kuleta wuzelu ku mwande yayo. 38Kanyhi, wunoze sunga ne mibato yayo, hamonga ne visahani vyayo, na vyose wuvinozaje kwa zahabu nengu. 39Ninga witumilaje kilo makumi madatu ne 'hano du za zahabu nengu, mu wunoze wa wuwo wuwiko we zitala, hamonga ne viya viya vyayo. 40Ninga, wulanjilile muno, ho wuvinoze vivyo vyose, mu hwani yono walajilwa akulya kwi'tunda.”

Currently Selected:

Wutuluce 25: LLKWW

Highlight

Compare

Copy