Wutuluce 22

Wulajilize kuli ze malipo

1“Hono munhu yahize ng'ombe lunji ngholo, no kuyiwulaga hamba kuyiguza, munhu yuyo kolipa ng'ombe yihano mu ng'ombe monga, na ngholo yine mu ngholo monga. 2Muhizi hono yebatwe yakubena nyumba, nayo ho yatowe sunga yafwe, yuyo mono yamuwulaje hamba si kowa ne lisutya yaye lyo wuwulaji. 3Ninga muhizi yuyo hono yebatwe lono lizuwa lyasosomoka hakali mitondo, nayo ho yawulagwe, ale yuyo mono yamuwulaje langa kowa musutyi. Hambi muhizi yuyo nha yali yimunojeye yalipe du. Na hono yawe yasina cinhu co kulipa, hodu, umuhizi yuyo yinojeye yaguzwe mweneco ho yalipile wuhizi wakwe. 4Na hono mutugo wuwo wono wali muhize wijele ko muhizi yuyo wukali wuli nyumi, ale, yuyo muhizi yimunojeye yalavye malipo kali kejete, hono yiwe ng'ombe, hamba ndogowe hamba ngholo.

5“Na hono munhu yalise mitugo yakwe mu mugunda we mizabibu, hamba hono lunji yayileceleze mitugo yakwe yidime mugunda wa munhu, ale, yuyo munya mitugo komulipa munya mugunda wambuce wuwo. Komulipa vilimwa viswanu vyono vikwilaniciye vya mu mugunda wakwe, hamba viswanu vya mu mugunda wakwe we mizabibu.

6“Hono munhu yakoleleze moto mu mugunda wakwe, nawo moto wuwo wutandale, sunga wufice ku mugunda wo muyagwe yunji, wutakamize malundo ge zindigwa, hamba vilimwa vyose vyo muyagwe, vyono vili mumo mu mugunda vikali sinawuswa, hamba lunji mugunda wose wutakamila, yu yulya mono yakoleleze moto wuwo, yimunojeye yawulipe wambuce wuwo wose.

7“Na hono munhu yamulecele muyagwe pesa yamuwicile, hamba sawo yoyose du yilya, na hanyuma sawo yiyo yihizwe mu nyumba yakwe, no muhizi hono yejele, muhizi yalipe cifo cayo cico kali kejete. 8Ninga hono muhizi yalece kwijela, yuyo munya kaya yimunojeye yelahize hali Mulungu, yakangaze vyono mwene yali musina mumo mu wuhizi we zisawo zo muyagwe.

9“Na hono hawe howuli wiwanganile wa mu ng'ombe, lunji ndogowe hamba ngholo, lunji myenda, hamba cinhu cinji cocose cono cajiliye, cono wanhu wejete wakwisoka, ayu yakutya cangu, no muyagwe nayo yakutya cangu, ale, wanhu wawo vyono wejete waletwe hali Mulungu. Na mono Mulungu kolamula vyono ayu yo musutyi, ale yuyo komulipa muyagwe kali kejete.

10“Na hono munhu yamukoze muyagwe ndogowe, hamba ng'ombe hamba ngholo, hamba mutugo wo wose wulya yamudimile, no mutugo wuwo wufwe, lunji wutamiswe, lunji wusolelezwa hamba yunji kuwona. 11Ale, wilahize wa hali Muwaha Mulungu wuwo du wo wolamula hali wene, no kulajila vyono yuyo mukozwa si yayihizize yiyo sawo yo muyagwe. Nayo munya sawo yimunojeye yawubocele wilahize wuwo. No mukozwa nayo, hodu si kolipa cinji yaye. 12Ninga langa hono sawo yiyo yiwe yahizizwa ko mukozwa, ale, yimunojeye yuyo mukozwa yamulipe munya sawo. 13Na hono yiwe mutugo wuwo wulumwa ne malimu ga mu mbago, ale, munhu yoyo mono yali yakozigwe, yimunojeye yawulete wuwo mutugo so wuhomelezi. Na vyono mutugo wulumwa ne malimu ga mu mbago, hodu mwene si kolipa yaye.

14“Na hono munhu yamwazime muyagwe mutugo, na hanyuma mutugo wuwo wutamiswe, hamba lunji wufwe, na hono mwene munya mutugo yawe yali hasina, ale yu yulya mono yawazime, yimunojeye yalipe vyono yinojeye. 15Ninga langa hono munya mutugo yawe yali baho, hodu yu yulya mono yamwazime, si kolipa cinji yaye. Na hono mutugo wuwo wuwe wusoligwe ho witume mulimo wa malipo, ale, munya mutugo kobocela du malipo go mulimo nha vyono wali walagane.”

Wulajilize wo wuhembi hamonga ne mikalile miswanu

16“Hono we cilume yamukonjekonje, yamubabule muhinza mono yakali namanya walume yaye, mono yakali si mubanywe, ho yagone nayo, ale munhu yuyo kolavya cigumo no kumutola yuyo muhinza. 17Na hono sogwe wo muhinza yalemele lukulu kumutoza muhinza wakwe ko mulume yuyo, ale munhu yuyo kolipa mu nghango ye cigumo cono cinojeye kuli muhinza mono yakali si namumanya mulume yaye.

18“Wulece kumuleka muhawi we cicekulu yekale mumi. 19Munhu wo wose mono kogona no mutugo, yimunojeye yawulagwe. 20No munhu wo wose mono komulavizya makumbiko mulungu wo wulambi, yalece kumulavizya Muwaha Mulungu du yali wene, munhu yuyo yongomezezwe lukulu. 21Mulece kumwiwonela hamba kumukunhulanga munhu wo wose mujenzi, mweze kukumbucila vyono nanye mwali muli wajenzi mu yisi ya Misili. 22Kanyhi mulece kumwiwonela mufwile, hamba mwana mono yasina walezi. 23Na hono muwewonele, nawo wandilile, nane mbeka nocihulika cililo cawo. 24Ne likuwo lyangu lyokwaka, nane nomuwulajenyi ko mumaje, ne wagolece zenyu wowa wafwile, ne wana wenyu nawo, wowa wasina walezi.

25“Na hono wumukopeshe munhu pesa mu wanhu wangu iwaciwa, ale, wulece kuwa kuli mwene nha munhu mono wukumudayadaya, hamba wulece kumulifya ne ngomola yayo. 26Na hono wusole mwenda wo muyago ciwe nha cipingo, ale yikunojeye wumugomolele lono lizuwa likali si nagwila. 27Hambi wuwo nha wo mwenda wakwe du wono kefunikaga. Holeka hono wikale si wumugomoleye, alu ho kokwifunika cici? Na hono yandilile, nane nomuhuliciza, hambi ane nha nili lusungu.

28“Wulece kumutovula Mulungu, hamba kumulijitiza mulongola we wanhu wako.

29“Wulece kucela kundavizya vilavywa vyangu vya mu vilimwa vyako vyose, na vye divayi yako, na vye mafuta gako mu madaha gayo.

“Mumhele ne wana wenyu we cilume, i walongozi kulelwa. 30Kanyhi mumhele ne zinyana zinongozi kulelwa ze zing'ombe zenyu na ze zingholo zenyu. Ninga mwamule muyilece yiyo nyana yiwe hamonga ne nyina kwa vilo mupunghati, na mwi'zuwa lyo munana, ale, ho mundavizye. 31Anye muli wanhu wangu, mono mwasiwanulwa ku soko yangu. Holeka mulecele lukulu kulya nyama yo mutugo wo wose, wono gawulaje malimu ga mu mbago. Langa muzigumililaje zimbwa zenyu zo ziyilye nyama yiyo.”

Currently Selected:

Wutuluce 22: LLKWW

Highlight

Compare

Copy