Wutuluce 17
17
Malenga gakulawila mwi'talawe
(Wuw 20:1-13)
1Ne mhuga yose ye Waisilayeli, wakatuluka wulawa mu nyika ya Sini, wakajenda ku wulawa hanhu, sunga hanhu hanji, nha vyono Muwaha Mulungu yalajilizaga. Wakasita nghambi kuko ku Lefidimu. Ninga kuko kwali kusina malenga go kung'wa yaye. 2Holeka wanhu wakamung'ung'ulicila Musa wakamutya, “Gwe Musa, wucipelaje le malenga cing'we.”
Nayo Musa yakawawuza yakawatya, “Alu nye, nhawulenyi mukung'ung'ulicila? Hamba nhawule mukumujela Muwaha Mulungu?”
3Ninga wanhu wose vyono wali wena nyhilu ye malenga, wakajendelela kumung'ung'ulicila Musa du wakumutya, “Alu mwene, wukaciwusa akulya ku Misili ho wuciwulaje ne nyhilu ye malenga, hamonga ne wana wetu ne mitugo zetu?” 4Hodu, Musa yakamulomba Muwaha Mulungu yakamutya, “Gwe go Muwaha Mulungu, alu niwanoze nhawule wanhu wawa? Alu nha wali behi no kunhowanga ne mabwe!”
5Nayo Muwaha Mulungu yakamupitula Musa yakamutya, “Alu agwe, wulongolele ku mwande ye Waisilayeli, weze wuli hamonga na wanji wacefu wa muli wanyamhala wawo. Ninga weze wudinghuye ne nghome yi yilya yono walitowela likolongo lye Nile. 6Wulanje, nane nokwima ha mwande yako mwi'talawe, kuko he'tunda lya Holebu lyono likucemwa Sinayi. Nagwe wutowe litalawe, ne nghome yako, nago malenga golawila mumo mwi'talawe nawo wanhu wong'wa.” Ale, nayo Musa yakanoza nhavivyo ha meso ge wanyamhala we Waisilayeli.
7Ne hanhu baho, Musa yakahacema Masa na Meliba, hambi nha ho hanhu hono Waisilayeli wang'ung'ulicila no kumujela Muwaha Mulungu wakutya, “Aa! Hongo mbeka Muwaha Mulungu yali hamonga nase hamba ng'o?”
Wihome we Waisilayeli ne Waamaleki
8Hobaho wakaza Waamaleki, wakehoma ne Waisilayeli kuko ku Lefidimu. 9Musa yakamulonjela Yoshuwa yakamutya, “Ale, wuhagule wanhu we cilume, wubite wukehome ne Waamaleki. Nane mitondo, nokwima mwi'tunda kucanyha, akuno nowa nina ne nghome yo Mulungu niyibate mu muwoko wangu.” 10Nayo Yoshuwa yakanoza nha vyono Musa yamulonjela. Yakabita kwihoma ne Waamaleki. Nawo Musa na Haluni hamonga na Huli, wakabita wakema mwi'tunda kucanyha. 11Yikawa, Musa lono yenulaga miwoko yakwe kucanyha, Waisilayeli wakasuma, ninga lono Musa yayitimyaga miwoko yakwe hasi, Waamaleki wakasuma. 12Nhondo hanyuma miwoko ya Musa yikasuluka. Holeka Haluni na Huli wakasola yibwe wakamuwicila Musa yekalile, nawo wakayibatiliza miwoko yakwe, yumonga muwoko wo kulume, na yunji muwoko wo kucekulu. Nhondo miwoko ya Musa hamba si yasuluka kanyhi yaye, yikawa vyo minulwe du kucanyha, sunga lizuwa likaswa. 13Na mu nzila yiyi, Yoshuwa yakawasumila lukulu Waamaleki.
14Baho Muwaha Mulungu yakamulonjela Musa yakamutya, “Ale, wuyandikaje nghani yiyino mu citabu, yiwe cikumbucizo. Kanyhi mulonjele na Yoshuwa vyono nowapatila lukulu Waamaleki mono yinze.” 15Nayo Musa yakazenga cikumbicilo, yakacicemela litagwa cikumbicilo cico yakatya, “Muwaha Mulungu yo bendela yangu.” 16Kanyhi yakatya, “Mwinule kucanyha bendela yo Muwaha Mulungu! Hambi Muwaha Mulungu nha kojendelela kuwahoma Waamaleki cibitilila!”
Currently Selected:
Wutuluce 17: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
