Wutuluce 13

Wusiwanulwe we wana walongozi kulelwa

1Muwaha Mulungu yakamulonjela Musa yakatya, 2“Wusiwanulilaje i wana we cilume wose i walongozi kulelwa, hambi i wana wose we cilume we Waisilayeli, i walongozi kulelwa, hamonga ne zinyana zinume ze mitugo zinongozi kulelwa, nha vyangu nene.”

Sikukuu ye mikate yono yisina cisase

3Nayo Musa yakawalonjela wanhu yakatya, “Ale, mulikumbucilaje lizuwa lili, lizuwa lyono mwawucila ku Misili, mu yisi yono mwali wawanda. Ali lyo lizuwa lyono Muwaha Mulungu yamuwusenyi kwe vilungo vyakwe viwaha. Holeka mulece kulya mukate wono wina cisase. 4Nanye mukuwuka mu yisi ya Misili mwi'zuwa lili, mu mwezi mulongozi, wono wukucemwa mwezi wa Abibu. 5Muwaha Mulungu yelahiza kuli walezi wenyu, vyono komupelenyi yisi ye Wakanani, na ye Wahiti, na ye Waamoli, na ye Wahivi, na ye Wayebusi. Nayo kolo yakumwinjizenyi mu yisi yiyo yono yina moso muwaha muno muno, ale, monoza sikukuu yiyi mu mwezi mulongozi wa mu mwaka. 6Holeka mu vilo mutandatu, molya mikate yono yisina cisase, na mwi'zuwa lyo mupunghati, lyowa lyo lizuwa lye sikukuu yo Muwaha Mulungu. 7Mu vilo mupunghati, munojeye mulecele lukulu kulya mukate wono wina cisase. Kanyhi mu yisi yenyu, hanhu ho hose, halece kuwa na cisase hamba mukate wono wina cisase. 8Ne sikukuu yiyi kolo yanza, muwalolosezaje wana wenyu, vyono mukuzinoza zizi, ku soko ya zono Muwaha Mulungu yetuma ku soko yenyu, lono mwawucila ku yisi ya Misili. 9Ne citanjilo cici, cowa cikumbucizo, kanyhi cowa nha cinhu cono mwibate mu miwoko yenyu, hamba cono cijeye ha meso genyu. Naco comukumbucizenyi ho mujendelele kuwukamisa no kuwusoma wulajilize wo Muwaha Mulungu. Hambi Muwaha Mulungu nha yo yamuwusenyi anye mu yisi ya Misili kwe vilungo vyakwe viwaha. 10Mweze kuyinoza sikukuu yiyi mu myaka yose mu cipango cici cono cakondya kuwagwa so nghani yiyo.”

Mwana mulongozi kulelwa

11Nayo Muwaha Mulungu kolo yakumwinjizenyi mu yisi ye Wakanani, yono yamwihuwizenyi nyenye hamonga ne walezi wenyu. Na kolo yakumupelenyi yisi yiyo, 12yowa yimunojelenyi nanye mumulavizye Muwaha Mulungu u mwana mulongozi kulelwa. Ne nyana nume ze mitugo zinongozi kulelwa, zizo yo sawo yo Mulungu. 13Ninga hamba nhavivyo, hono yiwe nyana nume ya ndogowe, ayo langa yikunojeye wuyikomboze ko kulavya nyana ye ngholo yo yihomele hanhu hayo. Na hono wuwe si wendile kuyikomboza yiyo nyana ye ndogowe, ale hodu, ninga langa wuyibenaje singo yayo. Ninga kanyhi kosuma kuwakomboza i wana wako we cilume iwalongozi kulelwa. 14Na mu vilo vyono vikuza, hono mwanago yakuwuze yawe kutya alu citanjilo cici cina nhunizoci, nagwe komupitula wuwe kutya, “Muwaha Mulungu yaciwusa ase mu yisi ya Misili kwe vilungo vyakwe viwaha, i hanhu hono ase cali cili wawanda. 15Na lono mutemi Falawo yali yeza kuwa mukamu kuwuhulice no kulema kucikombola ase cibite, ‘Muwaha Mulungu nayo yakawawulaga i wana we cilume wose iwalongozi kulelwa wa mu yisi yose ya Misili, i wana we wanhu sunga ne zinyana ze mitugo nhavivilya. Nayo ayi, yo soko yono yikuleka cikumulavizya Muwaha Mulungu nyana zose zinume ze mitugo zinongozi kulelwa, langa i wana wetu we cilume, awo cikuwakomboza. 16Ne citanjilo cici, cowa cikumbucizo, kanyhi cowa nha cinhu cono cibate mu miwoko yetu hamba cono cijeye ha meso getu. Naco cowa kucikumbuciza vyono, u Muwaha Mulungu, yo yaciwusa ase ku yisi ya Misili, kwe vilungo vyakwe viwaha.’ ”

Lisumbili lye livunde ne lisumbili lyo moto

17Mutemi Falawo yaza kuwakombola wanhu wabite, Mulungu si yawatonga wakole mu nzila yono yali yikoleye mu yisi ye Wafilisiti, hamba yiwe yo yali yo nzila ye ndumula. Hambi Mulungu nha yehwesa yakatya, “Singhusaka wanhu wacenye no kuwuya kanyhi ku Misili kolo wakuwona vyono kowuli wulugu ku mwande yawo.” 18Holeka ku soko yiyo, Muwaha Mulungu yakawatonga wakole nzila nhali yono yipilime, yono yikolile mu nyika ye lilenga lya Shamu. Nawo Waisilayeli wakatuluka ku wulawa Misili akuno wavwalile ne vitwalo vyo wulugu. 19Musa yakasoleleza ne mafupa ga Yusufu, wakabita nago, nha vyono Yusufu mweneco yali yawelahiza Waisilayeli wanoze nhavivyo. Hambi Yusufu lono yali yakali mumi, nha yali yawalonjela yatya, “Kolo Mulungu yakumuponyenyi, munojeye nhondo musoleleze ne mafupa gangu mubite nago.”

20Waisilayeli wakatuluka ku wulawa ku Sukoti, wakasita nghambi yawo mu Etamu, ku mhelo ye nyika. 21Na mu misi, Mulungu yakawalongolela mwi'vunde lititu lyono lipalinjile nhe lisumbili, ho yawatonje mu nzila. Na mu cilo namo, yakawalongolela mwi'vunde lyo moto, lyono lipalinjile nhe lisumbili, ho yawamulicile nzila, ho wasume kujenda muhinzo wawo misi ne cilo. 22Ne livunde lyono lipalinjile nhe lisumbili, vilo vyose lyawalongolelaga ku mwande yawo mwi'pango lye misi. Nalyo livunde lyo moto, lyono lipalinjile nhe lisumbili, lyawamulicilaga nzila ku cilo. Hamba si yawukaga ha mwande ye wanhu.

Currently Selected:

Wutuluce 13: LLKWW

Highlight

Compare

Copy