Wukumbucize wo Wulajilize 33
33
Musa yakuwalugutiza we milango ye Waisilayeli
1Awu wo wulugutize, wono Musa u munhu wo Mulungu yawalugutiza Waisilayeli, lono yakali si nafwa, yakatya,
2“Muwaha Mulungu yaza he
'tunda lya Sinayi,
yakelajila kotya yizuwa mu yisi ya Edomu,
yakawabulilila wanhu wakwe mu wulawa
mwi'tunda lya Palani.
Ne wamalayika elufu yikumi,
wakawa wali hamonga nayo.
Na mu muwoko wakwe wo kulume,
yakawa yebate
moto wono wakaga.
3Na mbeka Muwaha Mulungu
yawendile wanhu wakwe,
kanyhi mwene kawadimaga i wakwe.
Holeka cinojele cimufugamile,
cigebate na malajilizo gakwe.
4Ciwibate no kuwukamisa wulajilize wono
Musa yacijiza,
hambi nha wo wuhazi wuwaha
we nghungugo yetu.
5Muwaha Mulungu yakawa mutemi muli
wanhu wakwe Waisilayeli,
Lono milango yawo yose,
hamonga ne walongola wawo wose
wekongholela hamonga.”
6Musa yakazilonga za wo mulango wa Lubeni
yakatya, “Yawumipe Lubeni,
hamba yalece kufwa.
Langa wanhu wakwe wo wawe wacefu.”
7Na kuli za wo mulango wa Yuda,
yakatya, “Gwe go Muwaha Mulungu,
wuhulicize cililo cawo wuwataze,
wuwagomole, wuwalunze kanyhi ne
wandugu zawo,
hanyuma gwegwe wuwalewanile,
wuwataze kuli walugu wawo.”
8Na kuli za wo mulango wa Lawi,
yakatya, “Gwe go Muwaha Mulungu,
wuwalajililaje zo wuhile wako,
i wetumami wako wehuwilwa
i Walawi, mu nzila ye Ulimu na Tumimu.
Wono wawajela ku Masa, ho wuwawone hono
wali wanhu we mbeka,
ha malenga ga Meliba.
9Wakalajila cogopo ciwaha hali'gwe,
si nha kuli walezi, hamba kuli wandugu,
hamba kuli wana.
Kanyhi wakagakamisa ne malajilizo gako.
Kanyhi wakawa wehuwilwa kuli ze
Cilagane cako.
10Nawo wowejiza ne wanhu wako
webate Lilajilizo lyako.
Wokulavizya ne makumbiko mu
cikumbicilo cako.
11Holeka go Muwaha Mulungu,
wuwataze wo mulango wawo
wuwiluce wuli vilungo.
Milimo yawo yose yikwendeze
wuwawusize lukulu walugu wawo,
walece kwinuka kanyhi.”
12Na kuli za wo mulango wa Benyamini, yakatya,
“Awu wo mulango wono Muwaha Mulungu,
yawendile no kuwudima.
Mwene kawakamisaga misi yose.
Kanyhi yali hamonga nawo nhondo zose.”
13Na kuli za wo mulango wa Yusufu,
yakatya, “Muwaha Mulungu
yayilugutize yisi yawo ko
kuyitonyezeza mvula mbaha,
hamonga ne mivwilo ye malenga.
14Yisi yawo yilugutizwe,
yiwe na mikalo minji ya
mwi'pango lye lizuwa.
Yigolipe ne mikalo ye cibahu ne cifuku.
15Sunga ne vigongo navyo vimeme mikalo yose.
16Ne yisi yawo yimeme vinhu viswanu
vye mawala gose.
Wuswanu wo Muwaha Mulungu,
wuyilugute,
Mono yalonjela mu cititika
cono cakaga moto.
Wulugutwe wu wuno wose,
wuwazize wo mulango wa Yusufu.
Hambi mwene nha yo yali mulongola
we wanduguze.
17Yusufu yali vilungo, yenha
nghambaku, ne mahembe ge nimu ya mu mbago.
Mahembe gakwe viling'aniye na wanhu
maelufu, wo mu mulango wa Manase,
ne wanhu elufu yikumi wo mulango wa Efulayimu.
Ne mahembe gago, go kozihomela
zinghungugo zose,
yaziwinje sunga ko ku mhelo ye yinze.”
18Na kuli za wo mulango wa Zabuloni
na wa Isakali, yakatya,
“Nayo Zabuloni, milimo yakwe yo
wusuluza ya mwi'lenga, yimoteswe.
Nayo Isakali sawo yakwe yonjelezece
mu mahema gakwe.
19Wowacema wajenzi, wabite mwi'tunda lyawo
Wakalavye kuko makumbiko gono ganojeye.
Nawo wovituga viwutwa vya mwi'lenga,
sunga na vya mu musawawa mu mwejelele
we lilenga.”
20Na kuli za wo mulango wa Gadi,
yakatya, “Muwaha Mulungu
yalumbwe, mono yawonjeleza yisi
yawo yikawa ngazi muno.
Hambi Gadi nha yekaye kotya simba,
ho yawuzewe muwoko sunga ko kwi 'ndosi.
21Hambi nha wehagulila mu yisi,
hanhu haswanu.
Ne ligawo lyo wulongola, wakapegwa weneco.
Nawo wakagebata malajilizo go Muwaha Mulungu
hamonga no wulajilize wakwe.
Lono walongola wose we Waisilayeli wali
wehanguliza hamonga.”
22Na kuli za wo mulango wa Dani,
yakatya, “Dani mwana simba
mono yakuzumhilila ku Bashani.”
23Na kuli za wo mulango wa Nafutali,
yakatya, “Nafutali mono wumemile
wulugutwe wo Muwaha Mulungu,
hamonga no wumoteswe.
Yisi yawo yificile ku lubavu lwa kutakama,
ku wulawa he'lamba lya Galilaya.”
24Na kuli za wo mulango wa Asheli, yakatya,
“Asheli yo mulugutwe si nhe milango yinji yose.
Yeze yo mwendece kuli wanduguze.
Ne yisi yakwe yigolifywe ko winji
we mizeyituni.
25Ne makaya gawo,
gadimwe ne malango ga cuma.
Nawo weze kwikala wapolile vilo vyose.”
26Nye nyo Waisilayeli,
manyenyi vyono, hasina
mulungu yunji mono yacizize
u Muwaha Mulungu wenyu.
Mono yakuziza mu mavunde ho
yamutazenyi.
Yakuziza mu mavunde,
mu lukumyo lwakwe.
27Muwaha Mulungu yo mudimi wenyu nhondo zose.
Ne miwoko yakwe ye cibitilila, wo wutazi wenyu.
Kawawinjilaga kutali i walugu wenyu
so cambuzi cenyu.
Kanyhi yakumulonjelenyi
muwongomeze wose.
28We ndelo ya Yakobo
ho wekale no mulamu
kanyhi wapolile, mumo mu yisi
yono yimemile
wuhemba winji, hamonga ne divayi,
i hanhu hono buhe yilawaga ku wulanga,
yiwa kuwudejefya muhangha.
29Alu muli wamoti 'nye nyo Isilayeli,
hambi nani kanyhi mono
yehwanile nyenye,
nyo nghungugo yono yakondya kuponywa
no Muwaha Mulungu.
Nayo Muwaha Mulungu, yo
ngula yenyu no mumaje wenyu,
ho yamudimenyi no kumupelenyi wusume.
Iwalugu wenyu womuzizenyi wamulombenyi
wakusaka muwawonele lusungu.
Nanye baho ho mowakanyanjilila
lukulu ho hasi.
Currently Selected:
Wukumbucize wo Wulajilize 33: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
