Wukumbucize wo Wulajilize 32

1“Nye nyo'si no wulanga,

muhulicize zinghani zangu,

muteje makutu kuli zono nghulonga.

2Hambi mejizo gangu, nha golagala

nha mabanhi ga mvula,

gogwisa buhe mu yisi,

zinghani zangu zomuzizenyi nha vibanhi

vya mvula mu mahanze madece,

nha mabanhi ga mvula mu vilimwa.

3Nane nolikumya litagwa lyo Muwaha Mulungu,

ne wanhu wakwe wolonga zo wuwaha wakwe.

4“Muwaha Mulungu yo mukamisi wenyu

mono yali vilungo, mono si kasinjisikaga,

kanyhi yali ling'ani muli zakwe zose.

Mulungu wenyu mwihuwilwa

kanyhi yo we mbeka.

5Ninga anye si muli wehuwilwa,

musina cambuzi hamba no

kuwucemwa wanagwe,

muli nghungugo nyituma wubi

kanyhi muli walambi.

6Alu anye nyo wanhu walele,

kanyhi mono musina lilumbo,

mukwihwesa nzila yiyo yo swanu lo

yo kumwitumamila Muwaha Mulungu?

Ninga, mwene yo sogo yenyu

kanyhi yo muwumbi wenyu,

yo mwene mono yamunozenyi

ho muwe yikungugo.

7“Alu ta mwihwesaje zono zapuluta,

ze vilo vye katali,

muwawuzaje ta walezi wenyu,

wamulonjelenyi zono

zejela mu vilo vyawo,

muwawuzaje ta ne wakombi,

wamulonjelenyi ze katali.

8Muwaha Mulungu mono yalawiliciye

muli vyose, yuyo yo

yawagawila zi'si makungugo gose.

Yakawagawila wanhu no wikalo wawo.

Mwene yawawicila mipaka,

mu nghango ye liwalo lye wanhu

wo Mulungu.

9Ninga yakehagulila we ndelo ya Yakobo

wawe wanhu wakwe.

10“Yawawona lono wayumbayumbaga mu nyika

kunhu kubi, kumemile mavulavumbi

gose, ninga mwene yawacitila no kuwadima

nha vyono yadahile kwidima mweneco.

11Yakawa nha 'ndi yikulanjiza mana gayo

ku wuguluce, yikugakumbatila

mu mabawa gayo,

Muwaha Mulungu nayo vyo yawakamisaga Waisilayeli.

12Muwaha Mulungu yo yawatonga wanhu wakwe

hamba hasina mulungu yunji

mujenzi mono yamutaza yaye.

13Muwaha Mulungu yakawapela i hanhu

hose hono henuce, weneco wahateme,

wakalya malimwa gose ga mu migunda.

Wakabakula no wuci mu matalawe, wakalya,

ne mafuta gakalawa mwi'bwe.

14Zing'ombe zawo hamonga ne zimhene zawo

zikalavya mele menji muno.

Nawo wakawa wagoli we zingholo, ne

zimhene ne zing'ombe ziswanu zono zijinile.

Kanyhi wakawa no wusaje wuswanu,

hamonga ne divayi.

15“Wanhu wo Muwaha Mulungu,

wakagolipa muno,

wakajina muno,

wakawa wena ndigwa nyinji.

Ninga kanyhi ho wakawa wafyuzi

wakamuleka Mulungu wawo mono yawawumba,

wakamulema u muponyi wawo mono yali vilungo.

16Wakamupela Muwaha Mulungu wivu so

milungu yawo mijenzi,

no wubi wawo wono wetuma,

wukamukoza Muwaha Mulungu likuwo.

17Wakayilavizya vilavywa i milungu yo wulambi,

i milungu mipya yono hamba ne walezi

wawo wali si wayimanyile yaye.

I milungu yono Waisilayeli wali

wakali hamba nayitumamila yaye.

18Wakamusemwa Muwaha Mulungu wawo,

u mukombozi wawo mono yali vilungo,

mono yawapela wumi.

19“Nayo Muwaha Mulungu yali yeza

kuziwona zizo, hodu yakakolwa likuwo,

yakawa kuwaleka wanagwe we cilume na

we cicekulu.

20Yakawa kutya, ‘Alu hodu, nane hamba

si nojendelela kanyhi kuwapela wutazi.

Hanyuma ho mbone cono cowagana,

i wanhu wawano wono wasina cihuliko,

kanyhi si wehuwilwa.

21Wanghoza likuwo ku soko ye

milungu yawo mijenzi,

nane hamba si nghwendezwa yaye ne

milungu yawo yiyo,

milungu yono mbeka hamba si milungu yaye.

Holeka nane notuma likungugo linji

liwakoze nawo likuwo.

Nowanoza nawo wawone wivu

ne likungugo lyo wulele.

22Likuwo lyangu nane lyokwaka nha moto

nalyo lyovitakamiza vinhu vyose mono'nze.

Lyovificila na vyose vyono vili hasi

ku yinze ye wafu,

no kuyitakamiza ne misinji ye matunda.

23“ ‘Holeka nane nowaletela magazo mawaha

kanyhi nowaguma ne zisonga zangu zose.

24Nawo wofwa ku soko ye nzala ne mhungo,

wofwa ku soko ye matamwa mabi.

Noleta malimu ga mu mbago gawahawanje,

ne mazoka gono gena sumu,

gawalumanje.

25Nawo wulugu wowaletela mafwa mawaha mu zinzila

no wogofywe wowagana mu zikaya zawo,

i wazelelo hamonga ne wahinza, wose wofwa,

ne wagalika wose ne wakombi,

hasina mono kosigala.

26Nane nowongomezeza wose lukulu,

hawe hasina yunji hamba monga

mono kolowakumbucila kanyhi.

27Ninga hamba nhavivyo, si nolowaleceleza

i walugu wawo waze welumbe,

wawe kutya wawasuma wanhu wangu.

Na kumbe nene no mweneco yo

nizinozize zizi zose.’

28“Waisilayeli lyo likungugo lye walele

wasina hamba wizuce yaye.

29Hamba si wakusuma kumanya i sokoci yono

yilecile wakusumwa,

hamba kumanya bwete cono ciwejeleye yaye.

30Hamba kumanya vyono wali wanhu

elufu monga, ninga munhu monga

du kawasuma.

Na wanhu elufu yikumi wasumwa na wanhu

wejete du?

Muwaha Mulungu, u Mulungu wawo, yakondya

kuwaleka, Mulungu wawo we vilungo,

yakondya kuwagumila.

31I walugu wawo nawo nha wamanyile

vyono milungu yawo yisoceye, na vyono

hamba si yihwanile no Mulungu we Waisilayeli.

32I walugu wawo nha wawahodanga,

nha vyono Sodoma na Gomola.

Wehwana zabibu zono zili cisungu,

na zabibu zayo zina sumu.

33Wehwana divayi yono nozezwe sumu ye zinzoka.

34“Ninga mwene Muwaha Mulungu,

yaziwene zizo zose zono walugu wawo wazitumile.

Nayo yalindiye lipango lifice lyo

kuwalipiciziza wawo walugu.

35Muwaha Mulungu kowalipiciza wulipicizwe wuwaha.

Lipango lyofika du lyono wosumilwa lukulu,

hambi lipango lyo wugaye wawo

nha lili behi kuza.

36Muwaha Mulungu kowaponya wanhu wakwe,

kolo yeza kuwawona vyono walemegwa.

Nayo kowawonela lusungu, wose wono

wakumwitumamila mwene.

Kolo yakondya kuwawona vyono mbeka

wakondya kulemwa.

37Muwaha Mulungu kowawuza wanhu

wakwe yawe kutya,

‘Alo milungu yono mwali muyitumbiye,

yili hayi kanyhi?

38Yono mwayilisa vilavywa vyenyu vyono vijinile,

mukayipela ne divayi ho ying'we.

Ale ta, na yize le, yimupelenyi lu wutazi,

yiwe kuli'nye wutizizo wenyu.

39“ ‘Alu mulanje! Ane yo nene Mulungu du

nili wene, hamba hasina mulungu yunji

kanyhi, langa nene du.

Yo nene mono nghuwulaga,

kanyhi nghuwumifya,

nghutajila nghomele kanyhi nghuponya.

Na hasina munhu mono konyimila

muli yono nghwituma.

40Na mbeka vyono yo nene Mulungu mumi,

nghunyasula muwoko wangu, nghwilahiza,

41nha vyono nowunola mumaje wangu

we limuli, nanje hono ling'ani

yikwitumwa hamba ng'o.

Nowalipiciza walugu wangu,

nowalipiciza wono wakusula.

42Nozing'wesa zisonga zangu ne sakami yawo,

no mumaje wangu nawo, wowawulaga

wose wono wakusula.

Nane si nosigaza hamba monga, muli wawo

wono wakwisumaniza nane,

sunga na we zinghomele,

ne wafungwa, wose wofwa du.’

43“Nanye nyo makungugo,

muwapele lukumyo i wanhu wo Mulungu,

hambi Mulungu nha kawalipicizaga

wose wono wakuwawulaga.

Kawalipicizaga walugu wakwe.

Langa i wanhu wakwe,

kawanenelaga wubi wawo.”

44Musa na Yoshuwa u mwana wa Nuni, wakalwimba u lwimbo lulu, i Waisilayeli ho wasume kuluhulika.

Malajilizo ge ndumilizo ga Musa, kuli wanhu

45Musa yali yeza kukondya kuwejiza wanhu i mejizo go Muwaha Mulungu, 46hanyuma kanyhi yakawa kuwatya, “Muzikamisaje mu zinhumbula zenyu ze malajilizo gaga gono nali kumulonjelenyi izuwali. Muwejize ne wana wenyu, nawo ho wawe ne cihuliko ne cogopo, kuli mejizo gago go Muwaha Mulungu. 47I mejizo ga gano, si nghani za bwete du yaye, langa wo wumi wenyu. Holeka munojeye mugatyatye, ho mosuma kuwa na vilo vinji vyo wikale wenyu, mu yisi yiyo, yono yili ku nhumbi ye likolongo lya Yoludani, yono mokwinjila muyiteme.”

48Na mwi'zuwa lilyo, Muwaha Mulungu yakamulonjela Musa yakatya, 49“Ale, wubite mu matunda ga Abalimu, mu yisi ya Mowabu yono vidomile ne likaya lya Yeliko. Wubite mucanyha ye litunda lya Nebo, wuyilanje yisi yose ya Kanani, yono nghuwapela i Waisilayeli, wuyiwone vyono yinha. 50Nagwe kofwila kuko kucanyha ye litunda lilyo, nha vyono nduguyo Haluni nayo yafwila mucanyha ye litunda lya Holi. 51Hambi anye wose vyono muli wejete, nha mwambedegalila ha mwande ye Waisilayeli. Hambi, lono mwali muli ha malenga ga Meliba, behi ne likaya lya Kadeshi mu nyika ya Zini, agwe nha wambedegalila ha mwande ye wanhu wa Isilayeli. 52Holeka luno koyilanjila meso du yisi yiyo, mu wulawa mwi'tunda, yisi yiyo yono nghuwapela wanhu wa Isilayeli, ninga agwe si kokwinjila mu yisi yiyo ng'o.”

Currently Selected:

Wukumbucize wo Wulajilize 32: LLKWW

Highlight

Compare

Copy