Wukumbucize wo Wulajilize 34
34
U wufwe wa Musa
1Musa yakawa kuwuka mu yisi yo wuhihi ya Mowabu, yakawa kubita kucanyha mwi'tunda lya Nebo, ku cizuli ce matunda ga Pisiga, kucilima ya Yeliko. Na ku wulawa kuko kucanyha, Muwaha Mulungu yakamulajila yisi yose. Yisi ya Gileyadi ku lubavu lwa kusumuka, sunga ko kwi 'kaya lya Dani. 2Ne yisi yose ya Nafutali, sunga ne zi'si zose za Efulayimu na Manase, sunga ne yisi ya Yuda ku lubavu lwa kumwezi ko kwi'lenga lya Meditelaneya. 3Sunga ku lubavu lwa kutakama lwe yisi ya Yuda, sunga ko ku yisi yo wuhihi ya ku wulawa Zowali sunga ko ku Yeliko, kwi 'kaya lyono lina mibici minji ye mitende. 4Hanyuma Muwaha Mulungu yakawa kumulonjela Musa yakatya, “Ayi yo yisi yono namwihuwiza Abulahamu, na Isaka, na Yakobo, vyono yo nowapela i wana wawo. Alu nghulajila, ho wuyilanjile meso du, ninga agwe si nokukombola winjile mu yisi yiyo.”
5Hodu Musa u mwitumami wo Muwaha Mulungu, yakawa kufwila baho du mu yisi ya Mowabu, nha vyono Muwaha Mulungu yamulonjela. 6Muwaha Mulungu yakawa kumuzika Musa mwi'lolo mu yisi ya Mowabu, vidomile ne likaya lya Betipeyoli. Ninga sunga nalu, hasina munhu wo wose mono yahamanyile i hanhu baho hono Musa yazikwa. 7Musa yakafwa yaficile myaka yigana limonga na makumi mejete. Ninga hamba nhavivyo, vyo yali yakali yakamile du, sunga ne meso gakwe gali gakali vyo gakuwona viswanu du. 8Nawo wanhu Waisilayeli wakamulilila Musa vilo makumi madatu, baho mu yisi ya Mowabu.
9Nayo Yoshuwa u mwana wa Nuni yakamema mahala menji. Hambi nha Musa mono yo yamuhagula yawe muhazi wakwe kolo mwene yakondya kufwa. Nawo i wanhu Waisilayeli wakamuhulika muno Yoshuwa, kanyhi wakagebata muno muno ne malajilizo gono Muwaha Mulungu yawalajiliziza muli Musa.
10Na ku wulawa baho, hakali si nejela kanyhi muwizi yunji mu Isilayeli mono yenha Musa, mono Muwaha Mulungu yalonganaga nayo vidomile. 11Kanyhi hasina muwizi yunji wowose, mono yanoza mapoto ne vitanjilo, vyono vinha vyono Muwaha Mulungu yamutuma Musa yakavinoze ku Misili, kuli mutemi Falawo, na kuli wanyamhala wakwe, sunga na mu yisi yose. 12Kanyhi hasina muwizi yunji wo wose, mono yasuma kwituma nghani mbaha zo wogofye, nha zono Musa yazinoza ha meso ge Waisilayeli wose.
Currently Selected:
Wukumbucize wo Wulajilize 34: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
