2 Samwili 16
16
Dawudi na Ziba
1Nayo Dawudi yali yeza kupuluta hadodo cizuli ce litunda, viketang'anila nhinicizo na Ziba u mwitumami wa Mefibosheti yena ndogowe nyejete zidinghuye mikate magana mejete, hamonga na vidulu yigana limonga vya zabibu nghavu, na vinhambi yigana limonga vya mikalo, hamonga no mufuko monga wa nyhingo wumemile divayi. 2Mutemi Dawudi yakamuwuza Ziba yakatya, “Alu vinhu vivino vyose, wukubita kuvitumamila mulimoci?”
Ziba yakatya, “Azi zindogowe we mhuga yako wowa kujendela, i mikate nayo hamonga ne mikalo, i wanhu wako wolya, ne divayi nayo wong'wa lono wakatala so muhinzo wa mu nyika.”
3Mutemi yakamuwuza Ziba yakatya, “Alu Mefibosheti u mwizukulu wa Sawuli muwaha wako, yali hayi?”
Ziba yakatya, “Mwene yali mu Yelusalemi du, hambi nha yetumbiye vyono Waisilayeli, alu womugomolela wutemi wo kukuye Sawuli.”
4Nayo Mutemi yakamutya Ziba, “Vinhu vyose vyono yo sawo ya Mefibosheti, avyo vyako.”
Ziba yakapitula yakatya, “Ane no mwitumami wako' Gwe go Mutemi, nghukunena nhuje wendezwe ha meso gako nhondo zose!”
Dawudi na Shimeyi
5Na lono mutemi Dawudi yafikaga ku Bahulimu, munhu yunji litagwa lyakwe Shimeyi, mwana wa Gela, nduguye ya Sawuli, yakaza kumuhinjiliza, akuno yakumulijita. 6Hanyuma Shimeyi yakawa kwanza kumugumilila Dawudi mabwe, hamonga ne wetumami wakwe. Hamba yawe Dawudi yali yapilimwe ne wanhu wakwe hamonga ne wadimi wakwe. 7Ninga Shimeyi yakamulijita Dawudi yakutya “Bita ko! Bita ko! Agwe go muwulaji, kanyhi go mubena wulajilize! 8Agwe wasola wutemi wa Sawuli, sunga nalu u Muwaha Mulungu yakukulipiciza ku soko ye wanduguze wenji wa Sawuli wono wawawulaga. Alu Muwaha Mulungu, yakondya kumupela wutemi u manago Abusalomu. Agwe wakondya kuwusizwa wutemi wako, agwe go muwulaji muwaha!”
9Nayo Abishayi mu nghalo nyina mono yacemwaga Zeluya, yakamulonjela mutemi yakatya, “Gwe Mutemi, alu nhawule wukulileceleza libwa lili lyono lifwiye likulijite? Wundekaje 'ne mbite nghawudumule mutwe wakwe!”
10Nayo mutemi yakamulonjela Abishayi, hamonga no nduguye Yowabu yakawatya, “Alu mwene, hono yawe Muwaha Mulungu kamutuma yuyo Shimeyi yaze yandijite, alu nani 'mbi kanyhi mono kosuma kutya nhawule ketuma zizi?” 11Hanyuma Dawudi yakamulonjela Abishayi hamonga ne wetumami wakwe wose yakatya, “Mulanje ta! U mwanangu wangu wangu du Abusalomu, yo yakusaka kumbulaga, alu socici mukumwizina u mubenyamini yuyu? Muwaha Mulungu yo yamutumile yaze yandijite, holeka 'nye mumulekaje du yandijite. 12Lunji Muwaha Mulungu kozilanga zimbi zono nghutendelwa. No Muwaha Mulungu kohaliza ziswanu zihomele wulijitwe wangu we zuwali.” 13Dawudi hamonga ne wanhu wakwe wakawa kujendelela no muhinzo wawo. Nayo Shimeyi yakawatyatya yakoleye mu mhelo mhelo, mu mwalambalo we litunda, akuno yakulijita no kuwagumilila mabwe, kanyhi yakuwakupila ne manghundi. 14U mutemi hamonga ne wanhu wakwe, wali wakatala muno muno no muhinzo lono waficila ha Yoludani, holeka wakaceha baho.
Abusalomu mu Yelusalemi
15Nayo Abusalomu hamonga ne wanhu wakwe, wakenjila mu Yelusalemi, nayo Ahitofeli, yali yali hamonga nawo. 16Nayo Hushayi u mwendece wa Dawudi mono yali yamwitumbiye, yali yeza kwitang'anila na Abusalomu, hodu Hushayi yakawa kuzoza muno muno yakutya, “Mutemi yawumipe! Mutemi yawumipe!”
17Nayo Abusalomu yakamuwuza Hushayi yakatya, “Alu cono cijeye kanyhi cicici kuli mono wali wumuhulice, u mwendece wako Dawudi? Alu kanyhi nhawule si wubitane nayo?”
18Hushayi yakapitula yakatya, “Ane nosuma nhawule kanyhi kumutyatya yuyo? Ane nili ku lubavu lwa mono Muwaha Mulungu yamuhagulila mu nzila ye wanhu wawa, hamonga na muli Waisilayeli wose. Holeka ane nokwikala hamonga nagwe du. 19Alu kanyhi nha baha, ho nimwitumamile nani hono si mwana we cilume wo muwaha wangu. Holeka nane nokwitumamila gwegwe nha vyono namwitumamilaga sogo.”
20Hanyuma Abusalomu yakamulanga Ahitofeli, yakamuwuza yakatya, “Alu agwe wukuwona wule?”
21Nayo Ahitofeli yakamupitula Abusalomu yakatya, “Alu wubite wukagone ne wacekulu wajitulwa wo sogo, wono yawaleka walilanjilile likulu. Ne wanhu wose wa Isilayeli ho womanya nha vyono, mbeka sogo yakusulile muno, na baho wose wono wali ku lubavu lwako, nawo wotuga vilungo.” 22Hodu, wakawa ku mukomela Abusalomu lihema mucanyha ye litembe lye kaya ye likulu. Nayo Abusalomu yakenjila mwi'hema, yakawa kugona ne wajitulwa wo sogwe ha meso ge Waisilayeli wose.
23Ne lihweso lyolyose lyono yalilavyaga Ahitofeli mu vilo vivilya lyabocelwaga, likawa nha nghani yono yilawile kuli Mulungu. Nayo Dawudi sunga na Abusalomu, wose walityatyaga du lihweso lilyo.
Currently Selected:
2 Samwili 16: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
