2 Samwili 15
15
Wugaluce wa Abusalomu
1Hanyuma ya zizi, Abusalomu yaketujila matuka go wulugu go kukwegwa ne zifwalasi, hamonga ne wasindicizi wanhu we cilume makumi mahano. 2Nayo Abusalomu yenukaga hakali mitondo muno, muno kawa kubita kwikala mu balabala behi no mulango wo kwinjilila mwi'kaya. No munhu wo wose mono yazaga yena nghani, ho viwone no mutemi yamulamule, mwene Abusalomu yamucemaga no kumuwuza ho yamanye vyono munhu yuyo yo we 'kayaci. Nayo munhu yuyo kolo yamulonjela ze 'kaya ya hayi ya Isilayeli kono yakulawilila. 3Hodu Abusalomu yakamulonjela yakutya, “Lanje ta, agwe wina ling'ani mu nghani yako yiyi, ninga alu hasina munhu mono yawikwa no mutemi ho yazihulicize zinghani zako. 4Nane nghusulumila hono nali niwe nene nili mulamuzi. Na muli wose mono yena nghani, yali yawe kunyiziza nene, nane niwa kumulamulila mu ling'ani.” 5Na mu mapango gose hono munhu yaze yamwinamile Abusalomu nayo Abusalomu yamwibataga muwoko munhu yuyo, kawa kumunonela muno. 6Nayo Abusalomu yakazinoza zizi kuli Waisilayeli wose wono wazaga ho viwone no mutemi yawalamulile zinghani zawo. Na mu nzila yiyo, yakayikwega muno mitima yawo.
7Yali yeza kupuluta myaka mine, Abusalomu yakamubitila mutemi Dawudi yakamulonjela yakatya, “Gwe mutemi, nghukunena wunghombole mbite ku Hebuloni nghafisilize wihuwizo wangu wono namwihuwiza Muwaha Mulungu. 8Hambi ane, lono nali nili ku Geshuli ya ku Siliya, nha namwihuwiza Muwaha Mulungu, nha vyono hono yangomole kanyhi ku Yelusalemi, nane nobita nghamuhembe ku Hebuloni.”
9Nayo mutemi yakamutya, “Ale mwanangu wubite wupolile.” Ale, Abusalomu yakawa kubita ku Hebuloni. 10Ninga hamba nhavivyo, yali yakondya kutuma wanhu cinyele, wabite wawalonjele we milango yose ye Waisilayeli watye, “Kolo wose mukuhulika mazi ge zindulele, ale, muzozeze wose hamonga mutye ‘Abusalomu yaweza yo mutemi wa Hebuloni!’ ” 11Hakawa howali wanhu waficile magana mejete wono yawalalika Abusalomu, wakawa kutulukana nayo ku wulawa Yelusalemi, hamba si wali wamanyile cinji co cose ca muli mahweso mabi ga Abusalomu. 12Na lono mwene Abusalomu yalavyaga makumbiko, yakatuma kanyhi munhu yabite ku Gilo yakamuceme Ahitofeli u Mugilo, yumonga wa muli wanyamhala wo mutemi Dawudi. No wugaluci wa Abusalomu wakacila kukangala muno, ne watyatyi wa Abusalomu wakacila konjelezeka muno no kuwa wenji.
Dawudi yakutiza ku wulawa mwi'kaya lya Yelusalemi
13Munhu yunji yakawa kubita kumulonjela Dawudi yakatya, “I wanhu wose wa Isilayeli, weza kumupela cogopo no kumuhulika Abusalomu.” 14Nayo Dawudi yakawa kuwalonjela i wetumami wakwe wose, wono yali yena nawo mu Yelusalemi yakawatya, “Nye wayangu, yicinojeye alu ciwuce mono Yelusalemi lulu baha citize, hono ciwe cikusaka ciponye kuli Abusalomu! Ciyohaje musunho! Hambi hono citinye, mwene nha kokuza mbela yacisumize, yaciwulaje ase wose mono cili mone'kaya!”
15Nawo wetumami wakatya, “Heya cahulika Mutemi, nase cokwituma nha vyono wulonjile.” 16Mutemi Dawudi yakawa kuwuka mwi'kaya, mwene hamonga ne we mhuga yakwe wose, hamonga ne wetumami wakwe wose. Ninga langa yakaleka wacekulu yikumi wajitulwa ho walilindilize likulu.
17Nayo mutemi Dawudi hamonga ne wanhu wakwe, wali weza kutuluka wakulileka likaya, wakema ha kaya ye ndumilizo. 18Nawo wetumami wakwe wose wakema ku lubavu lwakwe, nawo wakakola ha mwande yakwe wakulajila cogopo cawo kuli mwene. Nawo wasilikale magana mutandatu, wono wamutyatya ku wulawa ku Gati, nawo wakakola ha mwande yakwe nhavivyo. 19Nayo mutemi yakamuwuza Itayi u Mugiti mono yali yo mulongola wawo, yakatya, “Alu Itayi nhawulenyi mukucityatya? Alu anye, si mwali muwuye ne nyuma du, mukamutyatye mutemi mupya? Hambi anye nha muli wajenzi mono mwayitiza yisi yenyu nyo weneco. 20Na kanyhi mukali si nekala bahano vilo vinji. Alu nhawule mukusaka kwigaza muwe kuyegayega hamonga nane? Hambi ane nha si manyile yaye na kono nghubita. Holeka luno wuwuye hamonga ne wayago wose, nayo Muwaha Mulungu yamutazenyi kanyhi kowa mwihuwilwa kuli'nye.”
21Ninga Itayi nayo yakapitula yakatya, “Gwe Mutemi! Ane nghukwilahiza mwi'tagwa lyo Muwaha Mulungu, nha vyono cowa cili hamonga nagwe du ko kose kono kowa kubita, hamba si nokulecela lukulu yaye, hamba yiwe yinojeye kufwa hamba kuwumipa ku soko yiyo.”
22Mutemi Dawudi yakamutya, “Ale viswanu! Cibitane!” Hobaho Itayi hamonga ne wanhu wakwe wose, hamonga ne wadodo wakwe wose, wakawa kutuluka hamonga no mutemi Dawudi. 23Ne wanhu wa mu yisi yose, wakalila muno muno, lono mutemi yawukaga hamonga ne wanhu wakwe. Mutemi yakalowoka cikolongo ca Kediloni hamonga ne wanhu wakwe, wakajendelela wakakolela nzila ya mu nyika.
24Nayo Zadoki u mukohani yali yali hamonga nawo, ne walawi wakawa walidinghuye Lisanduku lye Cilagane. Wakalisimya Lisanduku lye Cilagane hasi, wakalindila sunga wanhu wose wakawuka mwi kaya. U mukohani Abiyatali, nayo yali yali hamonga nawo. 25Mutemi yakamulonjela Zadoki yakatya, “Alu, wusole Lisanduku lye Cilagane wuligomoleze mwi'kaya. Hono Muwaha Mulungu yawe yendezwe nane, ale mwizuwa linji kolongomola kanyhi kono Yelusalemi nize nililanje, hamonga ne hanhu hono liwicigwe. 26Na hono mwene Muwaha Mulungu yawe si yendezwe nane, ale wuhile wakwe witumwe kuli'ne.” 27Yakamutya kanyhi Zadoki u mukohani, “Lanje! Alu wumusolaje mwanago Ahimazi hamonga na Yonazani u mwana wa Abiyatali, mubite mwi'kaya mupolile. 28Nane akuno, nolindila ha cikolongo cono cidumuye linyika, sunga hulice nghani yono yikulawa kuli'nye, yono yikundoloseza zono ziweye.” 29Hobaho Zadoki hamonga na Abiyatali, wakalindinghula Lisanduku lyo Mulungu lye Cilagane, wakalinjiza mu Yelusalemi, nawo wakekala kuko.
30Mutemi Dawudi yakawa kujendelela no muhinzo wakwe, yakakolela mucanyha ye litunda lya Mizeyituni, akuno yakulila, yasina ne malatu mu magulu gakwe, yegubice no mutwe wakwe, so wusungu wuwaha muno muno. Sunga ne wanhu wose wono yali yena nawo, nawo wakayigubika mitwe yawo wakalila muno. 31Na lono Dawudi yali yeza kuhulika nha vyono nayo Ahitofeli yelunza na Abusalomu, Dawudi yakalomba muno kuli Mulungu, yakatya, “Gwe go Muwaha Mulungu nghukunena wulipitule lihweso lya Ahitofeli liwe lya wulele!”
32Nayo Dawudi yali yeza kufika ku cizuli ce litunda kucanyha, hono hali ho hanhu ho kumuhembela Mulungu, baho Hushayi u Mwaliki u mwendece wakwe, mono Dawudi yali yamwitumbiye, nayo yakaza kumuhinjiliza baho, akuno no musweko wakwe mudemulanje, yemwajiye ne manghundi mu mutwe wakwe. 33Dawudi yakamutya Hushayi, “Hono wunhyatye, kowa wusina cambuzi kuli'ne. 34Ninga kosuma kunhaza muno muno, hono wuwuye kwi'kaya, wukamulonjele Abusalomu nha vyono agwe kosuma kumwitumamila Abusalomu ko wihuwilwa, nha vyono wamwitumamilaga sogwe. Na lono kowa baho, wiyohe muno kugabedyanjiza mahweso mabi ga Ahitofeli gono kowa kugalavya. 35Nawo Zadoki hamonga na Abiyatali i wakohani wowa wali kuko. Nagwe weze kuwalonjela zose zono kowa kuzihulika zikulongwa mumo mwi'kulu. 36Nawo wali hamonga ne wana wawo wejete, Ahimazi na Yonazani. Nagwe kowa kuwetumamila wawo, nawo wawe kundetela nghani zose zono kowa kuzituga.”
37Hushayi mwendece wa Dawudi yakabita ku Yelusalemi lulo baho lono Abusalomu nayo yafikaga.
Currently Selected:
2 Samwili 15: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
