2 Watemi 1
1
Eliya no mutemi Ahaziya
1U mutemi Ahabu we Waisilayeli yali yeza kufwa, hodu, i wanhu we yisi ya Mowabu wakalema walece kutemwa ne Waisilayeli.
2Nayo mutemi Ahaziya lulo, yakagwa hasi, ku wulawa kucanyha ku golofa, ye kaya yakwe ye likulu, ku Samaliya, yaketamisa muno muno. Hanyuma Ahaziya yakatuma wanhu wabite wakawuze kuli Baalizebubu, u mulungu we Wafilisiti, ku yisi ya Ekiloni, ho wamanye hono mutemi Ahaziya kofwa, hamba kowumipa. 3Ninga malayika wo Muwaha Mulungu, yakamutuma muwizi Eliya, wa ku Tishibi, yabite viketang'anile ne wanhu wono watumigwe no mutemi Ahaziya, yakawawuze yatye, “Alu 'nye! Nhawulenyi lu mukubita mukawuze kuli Baalizebubu u mulungu we wanhu wa Ekiloni? Hamba mukwihwesa 'nye hasina Mulungu mu Isilayeli lo? 4Ale, mubite mukamulonjele mutemi Ahaziya mutye nhavi, ‘U Muwaha Mulungu yakutya, makomele gako gago, gokuwulaga du, hamba si kopona yaye.’ ”
Eliya yaketuma nha vyono Muwaha Mulungu yamulajiliza, 5nawo i wanhu wono wali watumwa, wakawuya kuli mutemi Ahaziya. Wali weza kufika kuli mutemi, u mutemi yakawawuza yakutya, “Alu nhawulenyi kanyhi mwawuya?”
6Nawo wakamupitula wakatya, “Ase citang'anila no munhu mono yacilonjeye vyono, ciwuye ne nyuma cize cikulonjele zono Muwaha Mulungu yakukutya agwe. Yakutya nhavi, ‘Alu nhawule agwe wukutuma wanhu wabite wakamuwuze Baalizebubu, u mulungu we wanhu wa ku Ekiloni? Hamba mukwihwesa 'gwe hasina Mulungu mu Isilayeli lo? Agwe makomele gako gago gokuwulaga du, hamba si kopona yaye.’ ”
7Mutemi Ahaziya yakawawuza yakatya, “Alu mwene, u munhu yuyo yali yena yiwalaci?”
8Nawo wakamutya, “U munhu yuyo, yali yavwalile yijoho lya nyhingo ya nimu, yewopile no musipi wa mukowa mu ciwino cakwe.”
Nayo mutemi yakatya, “Woyi, yo Eliya!”
9Hodu, hobaho mutemi yakawa kumutuma mwitumami yumonga, hamonga na wanhu we cilume makumi mahano, wabite wakamulete Eliya kuli mwene. U mwitumami yuyo, yakamwagana Eliya yekaye mu cigongo, yakamutya, “Gwe go munhu wo Mulungu, mutemi yakukusaka wutime wuze.”
10Nayo Eliya yakamupitula yakatya, “Hono ane nili munhu wo Mulungu, ale moto wutime ku wulawa ku wulanga wukuwulaje hamonga ne wanhu wako!” Nawo moto wukawa kutima lwa kamonga du, wukawawulaga yuyo mwitumami hamonga ne wanhu wakwe.
11Ninga mutemi, yakatuma kanyhi mwitumami yunji hamonga kanyhi na wanhu wanji makumi mahano we cilume. Nawo wakamubitila Eliya wakamutya, “Gwe go munhu wo Mulungu, mutemi yakukusaka wutime mbela mbela wuze!”
12Nayo Eliya yakamutya, “Hono ane nili munhu wo Mulungu, ale moto wutime ku wulawa ku wulanga, wukuwulaje hamonga ne wanhu wako!” Nawo moto wo Mulungu, wukatima kamonga du, wukamuwulaga yuyo mwitumami, hamonga ne wanhu wakwe wono wali waficile makumi mahano.
13Ninga mutemi nayo yakawuyajila kanyhi kutuma mwitumami yunji, hamonga kanyhi na wanhu wanji makumi mahano we cilume. Nayo mwitumami yuyo yakabita ko ku cigongo, yakafugama hasi, ha mwande ya Eliya, yakawa kulomba yakutya, “Gwe go munhu wo Mulungu, wumbonele lusungu, nene hamonga ne wanhu wangu, wulece kuciwulaga. 14Hambi i wetumami wayangu wejete hamonga ne wanhu wawo, nha wawulagwa no moto wono wulawile ku wulanga. Ninga ane nghukulomba wumbonele lusungu!”
15Nayo malayika wo Mulungu, yakamulonjela Eliya yakatya, “Ale lu mubitane nayo, wulece kogopa.” Hodu Eliya yakawa kutulukana hamonga no mwitumami yuyo wakawa kubitana ko mutemi. 16Nayo Eliya yakamulonjela mutemi yakatya, “U Muwaha Mulungu yakutya nhavi, ‘Alu vyono agwe watuma wanhu wabite wakakuwuzize kuli Baalizebubu, u mulungu we wa Ekiloni, nha kotya muli Isilayeli mwaweza musina Mulungu wo kuwuza, holeka ku soko yiyo, agwe nagwe hamba si konoga yaye, langa kofwa du!’ ”
17Hodu mutemi Ahaziya yakawa kufwa nha vyono Muwaha Mulungu yalonjela muli Eliya. Nayo Ahaziya yali yasina wana we cilume, holeka ku soko yiyo, Yolamu u nduguye, yakawuhala wutemi wakwe, yakatema mu mwaka we kejete wo wutemi wa Yeholamu u mwana wa Yehoshafati u mutemi wa Yuda.
18Nazo zose zono yetuma u mutemi Ahaziya, zandicigwe mu citabu ce zinghomo ze Metumo ge watemi wa Isilayeli.
Currently Selected:
2 Watemi 1: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
