2 Watemi 2
2
Eliya yakunyasulwa no kutegulwa ku wulanga
1Lipango likawa lyafika u Muwaha Mulungu yamunyasule Eliya mu civulavumbi, yamutegule ku wulanga. Ale mwizuwa linji, Eliya hamonga na Elisha, wakatuluka hamonga wakulawa ku Giligali, 2na lono wali wali mu nzila, Eliya yakamulonjela Elisha yakatya, “Alu Elisha, agwe wikalaje bahano wunindile, ane Muwaha Mulungu kandajiliza mbite ku Beteli.”
Ninga Elisha nayo yakamupitula yakatya, “Nane nghwilahiza, nha vyono nimogopile Muwaha Mulungu mumi sunga na gwegwe, ane si nokuleka yaye.” Hodu, wakawa kubitana wose sunga ko ku Beteli.
3Nalyo lipuga lye wawizi wono wekalaga baho ha Beteli, wakamubitila Elisha wakamuwuza wakatya, “Mwene Elisha, wumanyile nha vyono izuwali Muwaha Mulungu komusola muwaha wako Eliya?”
Nayo Elisha yakawapitula yakatya, “Heya manyile, ninga cilece kuzilongalonga zinghani zizi.”
4Hanyuma kanyhi Eliya yakamulonjela Elisha yakatya, “Alu Elisha, agwe wikalaje bahano wunindile, ane Muwaha Mulungu kandajiliza mbite ku Yeliko.”
Ninga Elisha yakamupitula yakatya, “Nane nghwilahiza nha vyono nimogopile Muwaha Mulungu mumi, sunga na gwegwe, ane si nokuleka yaye.” Hodu wakawa kubitana wose sunga ko ku Yeliko.
5Nalyo lipuga lye wawizi wono wekalaga baho ha Yeliko, wakamubitila Elisha wakamuwuza wakatya, “Alu mwene Elisha, wumanyile nha vyono izuwali Muwaha Mulungu komusola muwaha wako Eliya?”
Nayo Elisha yakawapitula yakatya, “Heya manyile, ninga cilece kuzilongalonga zinghani zizi.”
6Hanyuma kanyhi, Eliya yakamulonjela Elisha yakatya, “Gwe Elisha, agwe wikalaje bahano wunindile, ane Muwaha Mulungu kandajiliza mbite kwi' kolongo lya Yoludani.”
Nayo Elisha yakamupitula Eliya yakatya, “Nane nghwilahiza nha vyono nimogopile Muwaha Mulungu mumi sunga na gwegwe, ane si nokuleka yaye.” Hodu wakawa kubitana wose hamonga, 7nawo wa walya i wawizi makumi mahano, nawo wakawatyatya sunga ho he kolongo lya Yoludani. Eliya na Elisha wakema baho ha nyenje ye likolongo, i wawizi wa walya, nawo wakema kutali hadodo. 8Nayo Eliya yakavula likoti lyakwe, yakalipalinga, yakagatowa malenga ne likoti lyakwe, malenga gaketemanula, mwene Eliya hamonga na Elisha wakawa kulowoka likolongo hakavu. 9Hanyuma lono walowoka, Eliya yakawa kumuwuza Elisha yakatya, “Alu Elisha, nghulomba wunonjele cono wukuhila nghutendele lono nghali si nanyasulwa.”
Nayo Elisha yakamupitula yakatya, “Ane nghukulomba mhegwe kali kejete i vilungo vyo muhe mono yali muli'gwe, nozwe niwe muhazi wako.”
10Nayo Eliya yakamupitula yakatya, “Hee! Ayi langa nghani nghamu yono wukuyisaka. Ninga hamba nhavivyo, hono wusume kumbona du lono nghusolwa ha meso gako, ale kotuga. Ninga hono wulece kumbona lono nghusolwa, hodu si kotuga.”
11Na lono wali wakali wajendeleye no wulonje wawo, walanje nhavi, likaza kwa nhinicizo muno ligali lyo moto lyono likukwegwa na fwalasi za moto, likema haciligati yawo, likamunyasula Eliya, likamutegula ku wulanga mu civulavumbi. 12Nayo Elisha yakaziwona zizo, hodu yakawa kumulilila Eliya yakutya, “Gwe baba! Woyi baba! Go mutazi we vilungo we Waisilayeli! Alu ho baha du, wakondya kubita!” Elisha si yamuwona kanyhi Eliya.
Nayo Elisha, ku soko yo wukalale wono yawutuga baho, hodu yakawa kulidemulanga likoti lyakwe likalawa hejete. 13Yakawa kulitondola likoti lya Eliya lyono lyalagala likulawa mwa Eliya, yakatuluka nalyo, yakema ha nyenje ye likolongo lya Yoludani. 14Yakagatowa malenga ne likoti lya Eliya akuno yakulonga yakutya, “Alu Muwaha Mulungu yali hayi mwene, u Mulungu wa Eliya?” Hanyuma kanyhi yakagatowa malenga lwe kejete, nago malenga gaketemanula cinya ha lulongozi, nayo yakawa kulowoka likolongo hakavu. 15Nawo wawizi wawalya makumi mahano, wono walawilila ku Yeliko, wakamuwona, wakawa kutya, “Ale, mwawona! I vilungo vya Eliya, vyekala muli Elisha!” Nawo wakawa kubita kumuhinjiliza. Wakenama ha mwande yakwe, wakatya, 16“Ase mono cili baha, cili wanhu makumi mahano we vilungo. Holeka wucikombole cibite cikamulondole Eliya, u muwaha wako. Hambi nha lunji kowa u muhe wo Muwaha Mulungu wumusola wuwa kumutegula mucanyha ye matunda ganji, hamba lunji mu malolo ganji.”
Nayo Elisha yakawapitula yakawatya, “Aa, ng'o, mulece kubita.”
17Ninga hamba nhavivyo, wene wakacila muno kumusinjiliza yawakombole wabite du. Hodu nayo nhondo yakawa kuwakombola wabite. Nawo wose vyono wali wali makumi mahano, wakatuluka, wakabita kumulondola Eliya mu matunda na mu malolo vilo vidatu ninga hamba si wamuwona yaye. 18Hodu wakawa kuwuya kuli Elisha. Nayo Elisha yali yakali yawalindiye du baho ha Yeliko. Elisha yakawalonjela yakatya, “Alu, wulenyi, ane si namulonjelenyi vyono mulece kubita?”
I mapoto gono yaganoza Elisha
19Wanhu wanji walawa Yeliko, wakamubitila Elisha wakamutya, “Alu nha vyono wumanyile muwaha, likaya lili lyo likaya liswanu muno, ninga malenga galyo go mabi muno, sunga ne yisi si yilelaga.”
20Nayo Elisha yakawatya, “Ale mutajile mwino mucefu mu bakuli mhya, mundetele.” Nawo wakamuletela. 21Elisha yakabita ku ndawililo yo muvwilo we malenga, yakawutajila mwino wuwo mugati ye malenga, akuno yakulonga yakutya, “Azi zo Muwaha Mulungu yakulonga yakutya, ‘Nagaponya malenga gaga, holeka si goleta kanyhi wufwe, hamba wu wula kulela.’ ” 22Ne malenga gago gakawa kunojela lukulu ku wulawilila baho, nha vyono Elisha yali yalonga.
23Hodu Elisha yakatuluka ku wulawa Yeliko, yakabita ku Beteli, na lono yali yakali yali mu nzila, wazelelo wanji wakamuziza wakulawa mumo mwi'kaya lya Beteli, wakamwizwajiza wakutya, “Wuwuce baha, agwe go munhu wo muhalu!”
24Nayo Elisha yakawapitucila, yakawanugulila ne meso go wukali, yakawalijita mwi'tagwa lyo Muwaha Mulungu. Nago madubu mejete macekulu, gakakolomhoka gakulawa mu mbago, gakawehawanga wazelelo makumi mane na wejete muli wene, gakawawulaga.
25Elisha yakawuka kuko yakabita kwi'tunda lya Kalimeli, na ku wulawa kuko, yakaza sunga ku Samaliya.
Currently Selected:
2 Watemi 2: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
