1 Watemi 22

U muwizi Mikaya yakumukaga Ahabu

(2Zin 18:2-27)

1I Waisilayeli, ne wanhu wa Siliya, wakekala welamuye sunga yikapuluta myaka myejete. 2Ninga mu mwaka we kadatu, u mutemi Yehoshafati we yisi ya Yuda, yakatuluka, yakabita yakamuwone Ahabu u mutemi wa Isilayeli.

3Ahabu yakawawuza wetumami wakwe yakawatya, “Alu mwene sese, ho cilindiye cici, hono cikali nayigomola Lamoti ya mu yisi ya Gileyadi ku wulawa kuli mutemi we yisi ya Siliya, nayo kumbe Lamoti yo yetu?” 4Hanyuma Ahabu yakamuwuza Yehoshafati yakatya, “Wule, agwe Yehoshafati, kosuma kubitana nane cikayihome Lamoti?”

Yehoshafati yakapitula yakatya, “Ane hamonga ne wasilikale wangu, wose cikondizye kwiwikaniza, hamonga ne wasilikale wose i wapanda fwalasi. Ase cikulindiye gwegwe du, nagwe wiwikanize. 5Ninga hamba nhavivyo, camule cimuwuze Muwaha Mulungu.”

6Hodu Ahabu yakawakonghola wawizi waficile magana mane, yakawawuza yakutya, “Ati, wulenyi, mbite nghayihome Lamoti, hamba ng'o?”

Nawo wawizi wakamutya, “Heya wubite, hambi u Muwaha Mulungu nha kokupela wusume.”

7Ninga Yehoshafati yakawuza yakutya, “Alu, mwene, hasina kanyhi hamba muwizi yunji mono nayo cosuma kumuwuza zono Muwaha Mulungu kocilonjela?”

8Nayo Ahabu yakapitula yakatya, “Ho yuli muwizi yunji mono yakucemwa Mikaya u mwana wa Imula. Ninga u munhu yuyo, ane nimusulile muno muno, vyono mwene yakali nambilila nghani swanu, hamba kamonga bwete, langa mwene kambililaga nghani 'mbi du nhondo zose.”

Yehoshafati yakamutya, “Wulecele lukulu kulonga nhavivyo.”

9Hodu Ahabu yakawatuma wetumami wakwe wabite wakamuceme Mikaya yaze mbela mbela.

10Nawo watemi wawa vyono wejete, nha cinji Ahabu u mutemi wa Isilayeli, hamonga na Yehoshafati u mutemi wa Yuda, wose wali wekaye mu magoda gawo ge citemi-temi ha cuga, hanze yo mulango muwaha we likaya lya Samaliya. Ne wawizi wose magana mane, wawililaga ha mwande yawo. 11Muwizi monga wa muli wawizi wawo, litagwa lyakwe Zedekiya u mwana wa Cenana, yakenozeza mahembe ga cuma, yakamulonjela Ahabu yakutya, “Muwaha Mulungu yakutya nhavi, ‘Mu mahembe gaga, kosuma kuwahoma wanhu wa Siliya, nagwe kowasumila lukulu.’ ” 12Ne wawizi wanji wose wakalonjela kumonga wakatya, “Agwe wubite du wukayihome Lamoti, no Muwaha Mulungu kokupela wusume wuwaha.”

13I wetumami wono wakabita kumucema Mikaya, wakamulonjela Mikaya wakatya, “I wawizi wanji wose wamuwilila mutemi nha vyono kosuma du. Holeka nagwe wubite wukalonje nha vivyo.”

14Ninga Mikaya yakawapitula yakatya, “Ane nghwihuwiza mwi'tagwa lyo Muwaha Mulungu mumi, nha vyono ane nolonga du zono mweneco Muwaha Mulungu kononjela nizilonje!”

15Nayo Mikaya yali yeza kufika hali mutemi Ahabu, mutemi Ahabu yakamuwuza yakutya, “Ati Mikaya mutemi Yehoshafati hamonga nane cosuma kubita cikayihome Lamoti, hamba ng'o?”

Mikaya yakamutya, “Heya wubite nane nitumbiye vyono Muwaha Mulungu kokupela wusume.”

16Ninga Ahabu yakamupitula Mikaya yakamutya, “Gwe Mikaya, hono wuwe wukulonganila nane mwi'tagwa lyo Muwaha Mulungu, yikunojeye wunonjele ze mbeka! Ne nghani yiyi nha nghulonjeye kali kenji muno?”

17Mikaya yakapitula yakatya, “Ane nghusuma kuwawona Waisilayeli wose weyagaye mu matunda wenha zingholo zono zisina mudimi. Nayo Muwaha Mulungu yakutya, ‘I wanhu awa wasina mulongola, holeka muwalece wawuye ku zikaya zawo wapolile.’ ”

18Nayo Ahabu yakamulonjela Yehoshafati yakatya, “Ale, wawona! Zizi zo nghulonjeye, nha vyono, ayu Mikaya ane si kambililaga ziswanu ng'o, langa kambililaga zimbi du nhondo zose!”

19Nayo Mikaya yakajendelela kulonga yakutya, “Alu Ahabu, wuhulicize zono Muwaha Mulungu yakuzilonga! Nane namuwona Muwaha Mulungu yekaye mwi'goda lyakwe ku wulanga, hamonga ne wamalayika wakwe wamupilime. 20Nayo Muwaha Mulungu yakuwawuza yakutya, ‘Alo nani mono komukoca Ahabu ho yabite ku Lamoti yakawulagwe?’ Nawo wamalayika wakegawa hejete, wanji wakalonga nhavi, na wanji nhavi. 21Nhondo likenuka licisi, likema hali Muwaha Mulungu, likatya, ‘Ane nobita nghamukoce.’ 22Muwaha Mulungu yakaliwuza yakatya, ‘Alo komukoca wuwe kutya nhawule?’ Nalyo licisi likapitula likatya, ‘Ane nobita nghawanoze wawizi wose wa Ahabu, walonje zo wulambi.’ Nayo Muwaha Mulungu yakalitya licisi, ‘Ale wubite wukamukoca, nitumbiye vyono komusuma.’ ”

23Kanyhi Mikaya yakonjeza yakatya, “Ne nghani yiyi, vyo yiweye. Muwaha Mulungu kawanoza wawizi wako wakulonjele zo wulambi. Ninga mwene Muwaha Mulungu yo yalonga nha vyono wongomele wokwagana!”

24Hobaho muwizi Zedekiya yakamuzumhila Mikaya yakamutowa kofi mu wusu wakwe, akuno yakumutya, “Alu, 'gwe Mikaya, ku wulawa na nili muhe wo Muwaha Mulungu lono wukandeka, ho wulongane nagwe?”

25Mikaya yakamupitula Zedekiya yakatya, “Agwe kowona, kolo weza kubita kwihundika mu cinyumba cimonga, ca mu vyumba vya ku mhilimo.”

26Hobaho mutemi Ahabu yakalajiliza yumonga wa muli wetumami wakwe, yakatya, “Musolaje Mikaya, wumutegule kuli Amoni u muwaha we likaya, na kuli Yowashi u mwana wo mutemi. 27Wuwalonjele wamudindile mu jela, wawe kumulisa mukate mukavu na malenga, sunga kono nilawuyila mholile.”

28Nayo Mikaya yakamupitula yakatya, “Hono wuze wu wuye wupolile, Muwaha Mulungu yeze si yalongane nane! Holeka nyo wanhu wose, muhulice zono nonjile!”

U wufwe wa Ahabu

(2Zin 18:28-34)

29Ale mutemi Ahabu wa Isilayeli hamonga no mutemi Yehoshafati wa Yuda, wakabita kuyihoma Lamoti ya Gileyadi. 30Ahabu yakamulonjela Yehoshafati, yakamutya, “Alu lono ceza kubita ku wulugu, ane nokwipitula ninoze ndece kumanyika, ninga agwe wuvwale vivwalo vyako vyo wutemi.” Hodu Ahabu mutemi we Waisilayeli yakabita ku wulugu yepituye.

31Nayo mutemi we yisi ya Siliya, yakawalajiliza wawaha we matuka go wulugu makumi madatu na mejete, nha vyono walece kumuhoma munhu yunji wo wose, langa wamuhomaje Ahabu du mutemi we Waisilayeli. 32Ninga wene wali weza kumuwona Yehoshafati u mutemi wa Yuda, wakehwesa yo mutemi Ahabu, holeka wakanza kumuhoma. Ninga nayo Yehoshafati yali yeza kuzoza, 33nhondo nawo ho wakamumanya vyono yo si mutemi wa Isilayeli, hodu wakawa kumuleka. 34Ninga u musilikale yunji we wanhu wa Siliya, yakayitawika songa yakwe mu wupinde, yali yeza kuwukwega no kuyilecela songa kotya nha yakujela, na kumbe songa, yikamuguma Ahabu mutemi wa Isilayeli ha wulunzizo we vivwalo vyakwe vye cuma. Ahabu yakatya, “Wuwi, natamiswa!” Yakawa kumucema mono kawujendyaga mutuka wakwe wo wulugu, yakumutya, “Alu wusolaje, ciwuye ne nyuma ciwuce bahano ha ciligati yo wulugu, hambi nha natuga nghomele mbaha!”

35No wihomi wukawa wuwaha muno mwi'zuwa lilyo. Ninga mutemi Ahabu wakamwegamika mu mutuka wakwe wo wulugu, akuno yawalanjile wanhu wa Siliya. Sakami nyinji yikalawila mu nghomele yakwe, sunga yikaligubika litende lyo mutuka wakwe wo wulugu, ne lizuwa lyali lyeza kufika cinyamihe, nayo yakawa kufwa. 36Na lono lizuwa lyagwilaga, Waisilayeli wose, wakalonjelwa nha vyono, “Alenyi wanhu wose ciwuye ku zikwetu, munhu na kaya yakwe ne yisi yakwe!”

37Hobaho, mutemi Ahabu yakawa yakondya kufwa. Muwili wakwe wakawudinghula, wakabita kuwuzika kwi'kaya lya Samaliya. 38No mutuka wakwe wo wulugu, wukakwemwa ha cilamba ca Samaliya ne mabwa gakayinamha baho sakami yakwe, sunga ne wasenyha wehovujilaga baho, nha vyono yinha nghani yo Muwaha Mulungu yono yayilonga.

39Ne zinghani zose zono mutemi Ahabu yetuma, hamonga ne cifo co wuzenji we likulu, lyono yakalihamba ne zimbali ze zinhembo, hamonga ne makaya gose gono yazenga, zose zandicigwe mu citabu ce zinghomo ze Metumo ge watemi wa Isilayeli. 40Nayo Ahabu yaza kufwa, u mwanagwe Ahaziya, yo yakahala wutemi wakwe.

Yehoshafati u mutemi wa Yuda

(2Zin 20:31–21:1)

41Na mu mwaka we kane wo mutemi Ahabu wa Isilayeli, nayo Yehoshafati u mwana wa Asa, ho yamula kutema mu Yuda.

42Yehoshafati yali yaficile myaka makumi madatu na mihano lono yakutema. Nayo yakatema mu Yelusalemi, myaka makumi mejete na mihano. U nyina wa Yehoshafati, yacemwaga Azuba, u mwana we cicekulu wa Shilihi. 43Nayo Yehoshafati, yaketuma ze ling'ani hali Muwaha Mulungu, nha vyono sogwe Asa yali yenha. Ninga si yasuma kuhamwagula hanhu hose ho wukumbicilo we milugu yo wulambi mu vigongo, holeka wanhu wajendelela kulavya makumbiko gawo mumo, hamonga no kufusa wuvumba. 44Mutemi Yehoshafati, yakawa yelamuye no mutemi wa Isilayeli.

45Ne zinghani zose zono mutemi Yehoshafati yetuma, hamonga ne vilungo vyakwe, hamonga no wulugu wono yehoma, zose zandicigwe mu citabu ce zinghomo ze Metumo ge watemi wa Yuda. 46Yakawawulaga wanhu walume wose wono wagonaga ne walume wayawo, hamonga ne wacekulu wasenyha, wono wetumaga mu vikumbicilo vye milungu yo wulambi, wono wali wakali wasigaye ku wulawa mu vilo lono sogwe Asa yali yakali yatemile.

47Nayo yisi ya Edomu lulo yali yisina mutemi, langa yali yitemigwe no mutazi wo mutemi, mono yali muwikwe no mutemi wa Yuda.

48Mutemi Yehoshafati, yakanoza ngalawa, ho zibite ku yisi ya Ofili kusola zahabu, ninga zingalawa zizo zikabenecela ha Eziyoni-gebeli, hamba si zafika na ku Ofili yaye. 49Nayo mutemi Ahaziya yakelavya, ho yalavye wanhu wakwe, wabitane mu zingalawa zakwe, hamonga ne wanhu wa Yehoshafati. Ninga Yehoshafati si yayilumba yaye nghani yiyo.

50Mutemi Yehoshafati, yakafwa, yakazikwa mu vitenjelo vyo wutemi, mu kaya ya Dawudi. Na Yeholamu u mwanagwe yo yakahala wutemi wakwe.

Ahaziya u mutemi wa Isilayeli

51Na mu mwaka we kumi na mupunghati wo wutemi wa Yehoshafati u mutemi wa Yuda, baho nayo Ahaziya u mwana wa Ahabu, ho yatemela, yakawa mutemi wa Isilayeli. Yakatema myaka myejete ku Samaliya. 52Ninga yaketuma wubi hali Muwaha Mulungu, yakatyatya musambo mubi wo sogwe Ahabu, hamonga no nyina Yezebeli, no mutemi Yelobowamu, wono wawanoza Isilayeli wetume wubi. 53Mwene nayo Ahaziya, yakamuhemba no kumwitumamila Baali. Yakamukoza likuwo Muwaha Mulungu, u Mulungu wa Isilayeli, nha vyono sogwe Ahabu yanoza.

Currently Selected:

1 Watemi 22: LLKWW

Highlight

Copy

Compare