1 Samwili 27
27
Dawudi yali mu yisi ye Wafilisiti
1Hanyuma ya zizi, Dawudi yekehwesa yakatya, “Ninga yidahice lizuwa linji Sawuli kolombulaga du. Holeka nghuwona nghani swanu ciba nhizize ku yisi ye Wafilisiti, nghekale kale kuko. Lunji holeka Sawuli si konondola kanyhi mu yisi ya Isilayeli, nane nopona.” 2Hodu Dawudi, hamonga ne wanhu wakwe magana mutandatu, lolulo lulo wakawa kutuluka, wakawa kubita kuli Akishi u mwana wa Mawoci u mutemi we yisi ya Gati. 3Nayo Dawudi ne wanhu wakwe, hamonga na we mhuga yakwe wakawa kwikala mumo mu yisi ya Gati. Dawudi yakawa yena ne wagolece wakwe wejete, Ahinowamu munya Yezeleli, na Abijeli mono yali mugolece wa Nabali, munya Kalimeli. 4Nayo Sawuli yali yeza kuhulika vyono Dawudi yakondya kutiziza ku Gati, hodu nayo hamba si yajendelela kanyhi kumulondola.
5Dawudi yakamulonjela Akishi yakatya, “Hono wuwe mbeka wuli mwendece wangu, ale, nghukulomba wunghombolele nane cikaya cinji cidodo ho nikale nane mumo. Hambi mutemi, nha hasina soko ya yose ya ane, cikalane wose hamonga nagwe mwi'kaya liwaha.” 6Baho, Akishi yakamukombolela Dawudi cikaya ca Zikilagi. Na ku soko yiyo, Zikilagi ku wulawilila lulo, cikawa sawo ye watemi wa Yuda. 7Dawudi yakekala myezi yikumi na mutandatu, mumo mu yisi ye Wafilisiti.
8Na mu mapango gago, Dawudi ne wanhu wakwe, wakawahoma i wanhu wa Geshuli, Gilizi, na Amaleki, i wanhu wono wekalaga mumo mu yisi yiyo, ku wulawa vilo vinji muno muno. Yakayihoma sunga ne yisi ya Shuli, sunga ko ku Misili, 9yakawawulaga wanhu wose walume ne wacekulu, yakasola zingholo, ne zing'ombe, ne zindogowe, ne zingamiya, sunga ne myenda yose. Hanyuma yakawuya ne nyuma kuli Akishi, 10nayo Akishi yakamuwuza yakutya, “Kuhoma lubavuci zuwali?” Nayo Dawudi yakamupitula yakatya. “Nali ku lubavu lwa kutakama lwa Yuda, na ku yisi ye mbeyu ye Wajelameli, sunga ko ku yisi yono wekalaga Wakeni.” 11Dawudi yawawulaga wose walume ne wacekulu, ho halece kuwa na yunji kanyhi mono kobita ku Gati yakalonje zose zono mwene hamonga ne wanhu wakwe wetumile. Dawudi yetumaga nhavivi mapango gose gono yekalila kuko ku yisi ye Wafilisiti. 12Nayo Akishi, yakamwitumbila muno Dawudi, sunga yakawa kwihwesa mweneco mu nhumbula yakwe yakutya, “Ayu Dawudi, i wanhu wakwe wa Isilayeli wamusulile muno muno, holeka kowa mwitumami wangu mu mikalile yakwe yose.”
Currently Selected:
1 Samwili 27: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
