1 Samwili 26
26
Dawudi nghanghulo ye kejete kanyhi, si yakumuwulaga Sawuli
1Hanyuma ninga, wanhu wakalawa ku Zifu, wakaza wakamulonjela Sawuli nha vyono Dawudi yehundice mwi'tunda lya Hacila, ku mhelo ye nyika ya Yuda. 2Hobaho Sawuli yakawa kuwasola wasilikale elufu yidatu, vitung'ati wo wulugu muli wa Isilayeli, yakawa kubitana nawo ku nyika ya Zifu, wakamulondole Dawudi, 3wakawa kusita nghambi yawo ha nzila mwi'tunda lye Hacila. Nayo Dawudi yali yakali yali mumo mu nyika. Ninga yali yeza kumanya vyono Sawuli kaza yakumulondola, 4hodu mwene yakawa kuwatuma wapelelezi, nawo wakawona vyono mbeka Sawuli yali baho. 5Ale, Dawudi yakawa kubita kuko lwa kamonga, yakaficila i hanhu bahalya du, hono Sawuli, hamonga na Abineli u mwana wa Neli, u mulongola muwaha we wasilikale wa Sawuli, wali wagonile. Nayo Sawuli yali yagonile mugati ye nghambi, ne wanhu wakwe wali wamupilime.
6Hobaho Dawudi yakawa kuwacema Ahimeleki u Muhiti, hamonga na Abishayi u mwana wa Zeluya, u mwanakwawe wa Yowabu, yakawa kuwawuza yakutya, “Alu nani wa muli nyenye mo wejete, mono kokwenda cibitane nane ku nghambi ya Sawuli?” Abishayi yakapitula yakatya, “Cobitana na nene.”
7Ale, na mu cilo cico, Dawudi na Abishayi, wakenjila mu nghambi ya Sawuli. Wakamwagana Sawuli yagonile mugati ye nghambi akuno yena no mugoha wakwe mukomwe hasi behi no mutwe wakwe. Nayo Abineli hamonga ne mhuga yose ye wasilikale, wali wagonile nhongo, wamupilime Sawuli kose kose. 8Hobaho Abishayi yakawa kumulonjela Dawudi yakutya, “Alu lanje, vyono Mulungu yakondya kumutajila u mulugu wako, mu miwoko yako mu cilo ci cino. Holeka nghukulomba wunghombole, niwusomole mugoha wakwe nimuhomele mweneco, home lwa kamonga mhuguze sunga ho hasi! Hamba nowa sina soko yaye yo kumuhoma kanyhi mbuyajize!”
9Ninga Dawudi yakamupitula Abishayi yakamutya, “Aa ng'o, wulecele lukulu kumutamisa! Hambi Muwaha Mulungu nayo nha komulipiciza munhu wo wose mono komutendela vibi u mutemi mono mwene Mulungu yamwitiye mafuta. 10Ninga ane manyile vyono, mbeka u Muwaha Mulungu mweneco yo komuwulaga Sawuli, lunji kofwa mwi'zuwa lyakwe du lyo kufwa, hamba lunji kowulajilwa ku wulugu. 11Hambi Muwaha Mulungu nha yanemeza, ndece kwijelela kumutamisa munhu wo wose mono mwene Muwaha Mulungu yamwitiye mafuta, no kumunoza yawe mutemi! Langa ane nghuwona, ciwusolaje mugoha wakwe du, hamoga ne ciya cakwe ce malenga, hodu ciwe kubita.” 12Hodu, Dawudi yakawa kuwukula mugoha baho hasi, yakawa kuwusola hamonga ne ciya ce malenga, navyo vyose vyali vili behi muno, ha mhelo yo mutwe wa Sawuli. Dawudi na Abishayi, hodu wakawa kutuluka. Na mwi'daha lilyo hakawa hasina munhu hamba monga mono yawawona, hamba kumanya zono zetumwaga, wose wali wagonile nhongo ze fwefwe, hambi Muwaha Mulungu nha yali yawaletela wose nhongo nzito muno muno.
13Hanyuma ya zizo, Dawudi yakawa kulowoka ku nhumbi ye kejete ye lilolo, yakawa kubita kucanyha ye citunda cono cali cili kutali na baho. 14Yakawa kuzoza ne yizi yiwaha yakugacemeleza mapuga ga Sawuli ge wasilikale, hamonga na Abineli, yakutya, “Abineli 'gwe, wule, ane wukuhulika?”
Nayo Abineli yakamupitula yakatya, “Alo gwegwe nani mono wukuzoza, wukumusinhusa mutemi?”
15Dawudi yakamupitula yakatya, “Gwe Abineli, si yo gwegwe mono wuli munhu mutambule muli Isilayeli? Alu nhawule si wukusuma kumudima muwaha wako u mutemi? Kanyhi wumanyile vyono yunji kenjila mu nghambi lulu baha, ho yamuwulaje mutemi? 16Agwe Abineli, mulimo wako wakulemela agwe. Holeka nane nghukwilahiza hali Muwaha Mulungu mumi, vyono, anye wose munojeye mufwe, hambi nha mwalemegwa kumudima muwaha wenyu, mono Muwaha Mulungu yamunozize yawe mutemi. Alu wulanje ta, u mugoha wo mutemi wuli hayi lo? Sunga ne ciya cakwe cose ce malenga cono cali ciwice ha mhelo yo mutwe wakwe?”
17Ninga Sawuli yakalitanga lizi lya Dawudi, holeka yakawa kumuwuza yakutya, “Ati, yo gwegwe Dawudi mwanangu?”
Nayo Dawudi yakamupitula yakatya, “Heya mutemi!” Ane yo nene Dawudi. 18“Ninga 'lu nhawule wukali wumutyatiliye no kumusepa mwitumami wako? Hamba ane hodanga cicici? Hamba wubici wono niwitumile? 19Gwe mutemi, wuhulicizaje 'ne, zono nghusaka kuzilonga. Hono yawe Muwaha Mulungu yo yakukundujize ho wuminje, ale i cilavywa comunoza yawupitule wuhile wakwe wuwo. Ninga hono wawe wanhu wo wazinozize zizo, ale, wulijite wo Muwaha Mulungu wuwaficile. Hambi nha waminga ane, ho mbuce mu yisi yo Muwaha Mulungu, ho mbite ku yisi yono yonyambuza niwe kuyihemba milungu yinji. 20Holeka nghukunena, wulece kundeceleza ho mbulajilwe mu yisi yo wujenzi, kutali no Muwaha Mulungu. Alo ho socici, u mutemi we Waisilayeli yaze yapiligaye, ho yambulaje ane mono ninha cikukupani cimonga du? Hamba nhawule yamhelembe 'ne, nhe ndeje ya mu mbago?”
21Sawuli yakapitula yakatya, “Ane, sutya, holeka alu wuwuye mwanangu Dawudi, nane hamba si nokutamisiza lukulu kanyhi. Hambi agwe nha kundeka si wumbulaje mu cilo cici. Ane mbeka nili mulele! Kanyhi nituma nghani yo wizine!”
22Nayo Dawudi yakamupitula yakatya, “Gwe mutemi, wulanje, awuno ahano mugoha wako, ale mutumaje munhu monga wa muli wanhu wako yaze yawusole. 23Muwaha Mulungu kawahalizaga i wehuwilwa na we ling'ani. Wulanje, zuwali Muwaha Mulungu kakutajila mu miwoko yangu. Ninga ane hamba si nghutamise yaye, agwe mono Muwaha Mulungu yakunoza wuwe mutemi. 24Ale, holeka ane vyono si nghuwulaje izuwali, nayo Muwaha Mulungu yanhendele nhavivyo nane, yamhonye mu wugaye wangu wose!”
25Sawuli yakamutya Dawudi, “Ale, Mulungu yakulugute mwanangu! Nagwe komoteswa muli milimo yako yose!”
Hodu, Dawudi yakawa kutuluka yakawa kubita, nayo Sawuli yakawa kuwuya ku kaya.
Currently Selected:
1 Samwili 26: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
