1 Samwili 28
28
1Ninga hanyuma yayo, i Wafilisiti wakawakonghola hamonga i wasilikale wawo wo wulugu, ho wakawahome Waisilayeli. Nayo Akishi yakamutya Dawudi, “Ninga wumanye vyono agwe hamonga ne wanhu wako monhaza mu wulugu.”
2Dawudi nayo yakatya, “Na mbeka ane nili mwitumami wako, nagwe koziwona go mweneco zono nosuma kuzinoza.”
Akishi yakatya, “Ale viswanu, nane nokunoza wuwe mulindilizi wangu wa nhondo zose.”
Sawuli no mucekulu muhawi wa ku Endoli
3Ale, Samwili yali yakondya kufwa ne Waisilayeli wose wali wamulilila, wakondya no kumuzika ku Lama mu kaya yakwe mweneco. Nayo Sawuli yali yakondya kuwawusiza lukulu we macisi ne wahawi wose mu Isilayeli.
4I mapuga ge wasilikale we Wafilisiti, wakekonghola, wakasita nghambi yawo behi ne cikaya ca Shunemu. Nayo Sawuli yakawakonghola Waisilayeli, nawo wakasita nghambi yawo he tunda lya Gilibowa. 5Nayo Sawuli yali yeza kuliwona lipuga lye wasilikale we Wafilisiti, yakenjilwa na woga wuwaha muno muno. 6Holeka yakawa kumulomba Muwaha Mulungu yamumanyize vyono konoza. Ninga Muwaha Mulungu si yamupitula hamba hadodo, mu ndoto, hamba mu nzila ya Ulimu na Tumimu, hamba mu wawizi. 7Hodu nhondo Sawuli yakawalajiliza wetumami wakwe yakatya, “Mubite mukanondolele mucekulu mono yena licisi, nimubitile nghamuwuze mwene.”
Nawo wetumami wakamupitula wakatya, “Mucekulu yunji yali kuko ku Endoli.” 8Hodu Sawuli yakawa kwipitula, yakawa kuvwala vivwalo vinji. Kwali kweza kutukuwala, yakawa kubita mwene, hamonga na wanji wejete wa muli wanhu wakwe, ho wakamuwone mucekulu yuyo. Nawo wali weza kumuwona, Sawuli yakawa kumulonjela yakutya, “Noze wuganga wako wuliwuze licisi, wunonjele zi nyhici zono zonyijelela. Nghukunena wunyhemele muhe wa munhu mono nomutambula kuli'gwe.”
9Mucekulu yuyo yakamupitula yakatya, “Ninga wumanyile zono yanoza Sawuli, vyono yawawusiza lukulu we macisi wose, sunga ne wahawi wose, mu yisi ya Isilayeli! Alu so cici agwe wukusaka wunhajile mu mutego wunyambuze mbulagwe?”
10Nayo Sawuli yakamwilahila ko Muwaha Mulungu yakatya, “Mbeka nghukwihuwiza mwi'tagwa lyo Muwaha Mulungu mumi, vyono agwe si kolipicizizwa lukulu so nghani yiyi.”
11Mucekulu yuyo yakamutya, “Alu wukumusaka nani mono nghwibulile?” Sawuli yakatya, “Nghusaka wunyibulile Samwili.”
12Nayo mucekulu yuyo, yali yeza kumuwona Samwili hodu, yakalila ne yizi yiwaha, yakamutya Sawuli, “Alu nhawule kunghonga, kumbe yo gwegwe mutemi Sawuli!”
13Sawuli yakamulonjela mucekulu yuyo, yakatya, “Wulece kogopa! Alu wukuwona cicici?” Mucekulu yakatya, “Nghuwona mulungu wukwibuka wukulawa mu muhangha.”
14Sawuli yakatya, “Wihwanile na cici?” Mucekulu yakatya, “Wihwanile munhu mukombi yakwibuka, yavwalile no musweko.”
Hobaho Sawuli yakamanya vyono yo Samwili, hodu yakawa kugundama ho hasi so kumupela cogopo.
15Samwili yakamuwuza Sawuli yakatya, “Alu nhawule wukungaza? Hamba nhawule kunyibusa sunga kono canyha?”
Sawuli yakamutya, “Ane nili mu wugazice wuwaha muno muno! Hambi i Wafilisiti nha wakwihoma nane, nayo Mulungu, yakondya kundeka. Hamba si yakusaka no kumhitula yaye mu nzila ye wawizi, hamba mu ndoto. Ayi yo yilecile ane nghucema ho wunonjele vyono noze.”
16Samwili yakatya, “Alu nhawule wali kunyhema ane, lono kumbe Muwaha Mulungu yakondya kukuleka, kanyhi yawa mulugu wako? 17Alu Muwaha Mulungu kakondya kwituma kuli'gwe nha vyono yanhuma nize nghulonjele. Kakondya kukuboka agwe wutemi, kamupela Dawudi. 18Hambi agwe nha si walifisiliza lilajilizo lyo Muwaha Mulungu, si wawongomezeza lukulu i Waamaleki hamonga ne vinhu vyawo vyose. Na yiyi yo soko yono yikuleka Muwaha Mulungu yakukutendela zizi aluno. 19Sunga nalu, Muwaha Mulungu, kowenjiza Waisilayeli, hamonga na gwegwe go mweneco, mu miwoko ye Wafilisiti. Ne mitondo du, agwe hamonga ne wanago we cilume, mowa muli hamonga nane kukuno. Muwaha Mulungu kolinjiza sunga ne lipuga lyose lye wasilikale we wa Isilayeli lyo wulugu, mu miwoko ye Wafilisiti.”
20Hobaho baho du, Sawuli yakawa kugwa hasi yagoloce so woga wuwaha muno, so zinghani zono yalonjelwa na Samwili. Hamba si yasuma kulya cinji misi ne cilo, yakasocela muno muno. 21Nayo mucekulu yu yulya, yakawa kumubitila Sawuli, yakamuwona vyono yali mu woga wuwaha, yakawa kumutya, “Alu muwaha wumanyile vyono niyambalila wumi wangu mu mbali mbaha, so wituma zizino zono wusacile. 22Holeka aluno nghukunena, wumvumile nane zono nghukulonjela. Wundekaje nghutelecele ndigwa. Hambi nha yikunojeye wulye, ho wutuje vilungo vyo kujendela muhinzo.”
23Ninga Sawuli yakalema yakatya mwene si yakusaka kulya cinji co cose. Sunga ne wetumami wakwe nawo wakamusinja ho yalye. Nhondo ho yakawa kwinuka baho hono yali yagonile hasi; yakawa kwikala mu citanda. 24Hanyuma u mucekulu yuyulya, yakanoza musunho, yakasola ndama yakwe yono yali mumo mu kaya, yono yali yinjinile, yakayiwulaga. Yakasola wusaje, yakawutiwa, yakateleka mukate wono wusina cisase. 25Yakawa kuwatenjela ndigwa Sawuli hamonga ne wetumami wakwe, wakalya. Hodu wakawa kutuluka mu cilo cico.
Currently Selected:
1 Samwili 28: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
