1 Watemi 6

Solomona yakuyizenga Nyumba yo Mulungu

1Mutemi Solomona yakanza mulimo wo kuyizenga Nyumba yo Mulungu, lono yali yakondya kupuluta myaka magana mane na makumi munana, ku wulawa wanhu wa Isilayeli, lono wawucila ku Misili, mu mwaka we kane wo wutemi wakwe muli Isilayeli, mu mwezi we kejete, mwezi wa Zivu. 2Ne Nyumba yono Solomona yamuzenjela Muwaha Mulungu, yali yina wutali wayo wa mugati mita makumi mejete na mupunghati, wugazi mita yicenda, no wutali wayo wo wubita kucanyha wali mita yikumi ne 'datu na nusu. 3Ne likumbo lyali no wutali wayo wa mugati mita yine na nusu, no wugazi mita yicenda nho wugazi we hanhu hono helile. 4Ne majinji ge Nyumba yo Mulungu, gali gena madilisha go kwinjiza wuzelu. 5Na kunze ye majinji gose ge Nyumba yo Mulungu, yakazenga vinyumba, vipilime sunga na ku mhilimo yayo, ne viyumba vyose vyali vina wutali wo kubita kucanyha, mita nyejete na lobo. 6Ne vinyumba vya hasi navyo, vyali vina mita nyejete na lobo wugazi wayo. Ne cinyumba ca ha ciligati, cali cina mita nyejete na lobo yidatu wugazi wayo, ne cinyumba ca hacanyha, mita yidatu wugazi wayo. Ne majinji ge Nyumba yo Mulungu yakagacepula wugazi kucanyha mbavu zose, vinyumba ho vikale mwi'jinji visina micici yayo.

7Ne mabwe gose gono wazenjela Nyumba yo Mulungu, gaseseswaga kono wagahimbulaga du, ho halece kuwa ne zozo lya nyondo hamba nhemo, hamba citumamilwa co cose ca cuma, lono Nyumba yo Mulungu yazengwaga.

8U mulango we cinyumba ca kusi, wukawikwa ku lubavu lwa kutakama ye Nyumba yo Mulungu, zikazengwa ne zi ngazi zo kubitila ku vinyumba vya kucanyha. 9Mutemi Solomona, yakayizenga Nyumba yo Mulungu yakayikondya, yakayifunika ne mibici ne zimbawo zo muhagata. 10Yakazenga vinyumba vili hadatu mu mhelo ye Nyumba yo Mulungu, ne vinyumba vyose vyali no wutali wa mita nyejete na lobo, navyo vikalunzwa hamonga ne Nyumba yo Mulungu kwe micici ye mibici yo muhagata.

11Muwaha Mulungu yakamulonjela Solomona yakatya, 12“Hono wibate wulajilize wangu hamonga ne malajilizo gangu gose, ale, nane nokunozeza zose nha vyono namwihuwiza sogo Dawudi. 13Nane nokwikala hamonga ne wanhu wangu Waisilayeli, mumu mono Nyumba yangu yono wukunzenjela, nane si nowaleka kanyhi yaye.”

14Solomona yakayizenga Nyumba yo Mulungu yakayikondeleza.

Vitumamilwa vya mu Nyumba yo Mulungu

(2Zin 3:8-14)

15Mugati ye majinji, yakagafunika na mbawo zo muhagata, ku wulawilila hasi ye nyumba, sunga ko kwi'jinji lya kucanyha. Na hasi yayo yakafunika na mbawo za mibeloshi. 16Ne cinyumba ca hasi, cono cacemwa i Hanhu Hono Helile, helile muno, cikazengwa kumhilimo ye Nyumba yo Mulungu. Naco cali no wutali wa mita yicenda, cali citemanuywe ne libupa lya mbawo zo muhagata, zilawiliye hasi, sunga ko kucanyha. 17Ne cinyumba ca kono mwande ye Hanhu Hono Helile, helile muno, cali no wutali wa mita yikumi na munana. 18Nazo zizo mbawo zo muhagata, zali zihambigwe no wukakate we zimboga ne maluwa. Na mugati mose, mukahambwa ne zimbawo zo muhagata, ho mabwe galece kwijela.

19Yakanoza cinyumba ca kugati mu Nyumba yo Mulungu, ho yawice mumo Lisanduku lye Cilagane. 20Ne cinyumba cico, cali cina wutali wa mita yicenda, no wugazi wa mita yicenda, no wutali wo kubita kucanyha nawo mita yicenda, yakacihiliwa zahabu nengu. Naco cikumbicilo cali cifunicizwe na mbawo zo muhagata. 21Na mugati ye Nyumba yo Mulungu mwali muhiliwe zahabu, mose, ne minyololo ya zahabu yikawikwa yikuninyina yidumulashe mulango we cinyumba cico ca kugati, cono naco cali cihiliwe zahabu. 22Ne Nyumba yo Mulungu yose, mugati yali hiliwe zahabu, hamonga ne cikumbicilo ce Hanhu Hono Helile, Helile muno.

23Yakanoza vihwani vya makelubi mejete ko mubici wo muzeyituni, yakagawika Hanhu Hono Helile, Helile muno, u wutali wayo limonga mita yine na nusu. 24Ne vihwani vye makelubi gose, gakawa gehwanile wuwaha no wutali. 25Limonga lina mabawa mejete, libawa limonga lina wutali wa mita nyejete na lobo, 26no wutali wa ku wulawa libawa limonga sunga kwi'bawa liyagwe, wukawa mita yine na nusu. 27Navyo vihwani vivyo vye makelubi vikawikwa akuno na akuno mugati ye Hanhu Hono Helile, Helile muno, ho mabawa gayo mejete gasume kwipamiza hagati ye cinyumba, ne mabawa ganji mejete gakapamiza lijinji. 28Nago makelubi, gakahiliwa zahabu gose.

29Ne lijinji lye cinyumba ciwaha, na lye cinyumba ca kugati, gose gakahambwa no wukakate we vihwani vye makelubi, ne mitende, hamonga ne maluwa kunze na ku gati. 30Sunga na hasi du mu sakafu, mose mwali muhiliwe zahabu.

31Wukanozwa mulango, wumonga we milango myejete ko mubici wo muzeyituni, wukawicilwa ha mulango we Hanhu Hono Helile, Helile muno, hamonga ne zimbawo nyejete zo wima ze zifulemu, na ye cipinga ya hacanyha yayo. 32Ne milango nayo yikahambwa ko wukakate we vihwani vye makelubi, ne mitende, hamonga ne maluwa. Nawo mulango weneco, hamonga ne vihwani vye makelubi, ne mitende, vyose vikahiliwa zahabu. 33Yakanoza kanyhi fulemu ko mubici wo muzeyituni nha vyono fulemu nongozi, yakanoza ku so mulango muwaha we nyumba mbaha yo wihangulizize. 34Hakawa na milango yinji myejete yo kugodya, minozwe no mubici wo mubeloshi, 35nayo nhavivyo yikahambwa no wukakate we vihwani vye makelubi, hamonga ne mitende, ne maluwa, yakayihiliwa zahabu mu wukakate.

36Ne likumbo lya kugati, lyali lizenjigwe ha mwande ye Nyumba yo Mulungu, yipilimywe majinji gono gali mazenje micilili midatu, ya mabwe, na mucanyha yo mucilili monga monga we mabwe, wakajeleka mucilili wumonga wa mbawo zo muhagata sunga micilili yose vyono midatu ye mabwe.

37No musinji we Nyumba yo Mulungu, wukasimywa mu mwezi we kejete, mwezi wa Zivu, mu mwaka we kane wo wutemi wa Solomona. 38Na mu mwezi wo munana, mwezi wa Buli, wa mu mwaka we kumi na monga wo wutemi wa Solomona, ho Nyumba yo Mulungu yakondezya lukulu kuzengwa, nha vyono yasakwaga yiwe. Ale, Solomona yayizenga Nyumba yo Mulungu myaka mupunghati, nayo yikawa yakondya.

Currently Selected:

1 Watemi 6: LLKWW

Highlight

Copy

Compare