1 Watemi 5

Solomona yakwiwikaniza yazenje Nyumba yo Mulungu

(2Zin 2:1-18)

1Hilamu u mutemi wa Tulo, yali mwendece wo mutemi Dawudi mu vilo vinji muno, holeka yali yeza kuhulika nha vyono Solomona yo yahala wutemi wo sogwe Dawudi, yakatuma wanhu kuli Solomona. 2Nayo Solomona yakatuma nghani kuli Hilamu yakatya, 3“Agwe wumanyile nha vyono baba Dawudi mu cipango cakwe, wulugu wali wumupilime kose kose, nayo yakawa yena mulimo wo wihomi ne walugu wa mu ma'si gono gali gamupilime. Holeka hamba si yasuma kuzenga Nyumba yo Mulungu, yo kumuhembela Muwaha Mulungu, u Mulungu wakwe, sunga kolo Muwaha Mulungu yakondya kumupela wusume kuli walugu wakwe wose. 4Ninga aluno, u Muwaha Mulungu wangu, yakondya kumhela mulamu mu mipaka yangu yose. Aluno neza sina kanyhi walugu, hamba cinji co cose cibi. 5Muwaha Mulungu yamwihuwiza baba Dawudi yakatya, ‘U mwanago mono nomuhaza wutemi wako, yuyo yo konzenjela ne Nyumba yangu.’ Holeka nane nadumula nghani, niyizenje Nyumba yo kumuhembela Muwaha Mulungu, u Mulungu wangu. 6Holeka nghukunena, wutume wanhu wako, wabite ku Lebanoni wakanhemele mabici go muhagata. Ne wanhu wangu nawo, wowa wali hamonga nawo. Nane nowalipa wanhu wako, mu nghango nha vyono kowona viswanu gwegwe. Hambi nagwe nha wumanyile vyono i wanhu wangu hamba si wamanyile na vyono wayitemaga mibici, nha vyono wanhu wako wamanyile.”

7Nayo Hilamu, yakendezwa muno muno yali yeza kuzituga zinghani zizo ku wulawa kuli Solomona, nayo yakatya, “Muwaha Mulungu yalumbwe, mono yamupelile Dawudi u mwana we mahala mono yenha yuyu Solomona, ho yahale wutemi wakwe we likungugo liwaha lyono linha lili!” 8Nayo Hilamu, yakatuma nghani kuli Solomona yakutya, “Nakondya kugabocela malajilizo gako gono wulajilize, nane nokwituma nha vyono wunonjeye. Nane nolavya mibici yo muhagata hamonga ne mibici yo mubeloshi. 9Ne wanhu wangu woyitimya mibici yiyo, ku wulawa Lebanoni sunga kwi'lenga, nawo woyiwopa hamonga, wayojeze mwi'lenga, wayilete sunga hanhu hono kosaka gwegwe. Nawo woyiwopola, i wanhu wako nawo ho wayilanjilile. Ninga agwe nokusaka wuwalise ndigwa du wanhu wangu hodu.”

10Hobaho Hilamu yakawa kumupela Solomona mabici menji go muhagata, hamonga ne mabici ge mibeloshi, mu nghango nha vyono yasakaga. 11Nayo Solomona yakamupela Hilamu mwaka na mwaka madebe magana mane go wuhemba, hamonga na galoni yigana limonga ne kumi, za mafuta, so ndigwa ye wanhu wakwe.

12Nayo Muwaha Mulungu yakawukamisa wihuwizo wakwe, yakamupela Solomona mahala menji. Na hakawa no mulamu muno hagati ya Hilamu na Solomona, wakanoza cilagane vyono wejete.

13Mutemi Solomona yakakonghola wanhu wetuma milimo, ku wulawa mu yisi yose ya Isilayeli, waficile wanhu elufu makumi madatu. 14Yakamuwika Adonilamu yawe yo mulanjilizi wawo. Ninga yakawagawa wakalawa mapuga madatu, mhuga monga wanhu elufu yikumi. Ne zimhuga zizi zose, zewalilaga mwezi monga monga ku wubita ku Lebanoni. Mwezi monga wakuwa ku Lebanoni ne myezi myejete wawa wali ku zikaya zawo. 15Mutemi Solomona yakawa yena wanhu elufu makumi munana, mu yisi ye matunda, wono wapondaga mabwe, na wanhu elufu makumi mupunghati, wono wagakunghaga mabwe. 16Yakawika na wanji wanhu elufu yidatu na magana madatu, wono wawalindilizaga no kuyilanga milimo vyono wetumaga. 17Na so wulajilize wo mutemi Solomona, wanhu wakaponda mabwe maswanu muno go kuzenjela musinji we Nyumba yo Mulungu. 18I wazenji wa Solomona ne wazenji wa Hilamu, hamonga ne wanhu wono wakalawa kwi 'kaya lya Babiloni, wakawikaniziza lukulu mabwe, hamonga ne mabici go kuzenjela Nyumba yo Mulungu.

Currently Selected:

1 Watemi 5: LLKWW

Highlight

Copy

Compare