1 Watemi 7

Likulu lya Solomona

1Solomona yakezenjela likulu, nalyo yakalizenga myaka yikumi na midatu. 2Hanyuma yakayizenga Nyumba yinji yono yikacemwa “Nyumba ya mu mbago ya Lebanoni.” Nayo yali yina wutali wa mita makumi mane na yine na nusu, no wugazi wa mita makumi mejete na nyejete no lobo, no wutali wo kubita kucanyha, wali mita yikumi na yidatu na nusu. Yakayizenga mucanyha ye micilili midatu ye masumbili go mubici wo muhagata, no mucilili monga, wali mutandalice masumbili yikumi na mahano, ne micici yo mubici wo mupaga, yikawa mijelece mu masumbili gago. 3Yikafunikwa mucanyha no mubici wo muhagata, mucanyha ye vinyumba vyono vyali vizenje mucanyha ye masumbili ga galya makumi mane na mahano. 4Na mu zimbavu zose vyono nyejete ze lijinji, hakawa na madilisha micilili midatu midatu. 5I milango yose hamonga ne madilisha gose, gali manoze gena nhuzi yine yine zi fulemu zayo. Ne micilili ye madilisha, nayo vyali visonjile muling'ano na mu wima wayo nhavivyo.

6Yakalinozeza masumbili, wutali wayo mita makumi mejete na nyejete na lobo, no wugazi mita yikumi ne 'datu na nusu Likawa lina ne likumbo lyayo libatwe ne masumbili.

7Nyumba yono yali yiwicigwe Ligoda lyo wutemi, hanji yacemwaga Nyumba yo kuling'aniziza, i hanhu hono Solomona yaling'anizizaga vyalo, naho hali hawiciywe mbawo zo muhagata ku wulawilila mu sakafu sunga ko ku canyha mu mahapa.

8Ne kaya yakwe Solomona yono yekalaga, yali yizenjigwe ha mhilimo ye Nyumba yo kuling'aniziza, ninga yali yizenjigwe yihwanile nhe zikaya zinji zose. Kanyhi Solomona yakazenga nyumba yinji yono vihwanile ne zinyagwe, yakamuzenjela mugolece wakwe, u mwana we cicekulu wo mutemi wa Misili.

9Ne mazengo gose gago, hamonga ne Nyumba yo kuling'aniziza, gose gali mazenje kwe mabwe maswanu muno ku wulawilila ku musinji sunga ko ku canyha. Ne mabwe gagano gali mapandulwe viswanu ko musumeno mbavu zose, nha vyono vinha vipimo vyayo. 10No musinji wayo, wukawa muzenje ne mabwe mawaha muno, gono mapandulwe viswanu, sunga ne mabwe ganji gali gena wutali wa mita yidatu na nusu, na ganji mita yine. 11Na mucanyha yago, gakajelekwa mabwe ganji, gono gali mapandulwe kwa vipimo, hamonga ne mabici go muhagata. 12I likumbo liwaha lye likulu, hamonga ne cinyumba ca mugati mu Nyumba yo Mulungu, hamonga ne cinyumba ca ha mulango we Nyumba yo Mulungu, mose mwali mogali majinji, gono gali gena gose mucilili monga monga wa micici ya mbawo zo muhagata, micilili midatu ya mabwe, hanyuma mucilili monga wa micici ya mbawo zo mupagata.

Mulimo wa Hulamu

13Mutemi Solomona, yakatuma munhu yakamulete Hulamu, u mutyani, mono yekalaga kwi kaya lya Tulo, munhu munghula muno mu wutyani we vyuma. 14Na malehemu sogwe, nayo yali mwikala kuko kwi 'kaya lya Tulo nhavivilya. Nayo yakawa munghula mu mulimo wuwo wo wutyana vyuma. U nyina yali wo mulango wa Nafutali. Yuyo Hulamu, yali yo munhu we mahala muno, mono yali yena wizoweleze wuwaha muno mu mulimo wuwo wo wutyani. Nayo yo munhu mono yali yalanjiliye, vyono Solomona komusaka yawe mulanjilizi we milimo yose ye vyuma.

Masumbili mejete ga cuma

(2Zin 3:15-17)

15Hulamu yo yanoza masumbili mejete ge vyuma, na gose vyono mejete, limonga lyali lina wutali wa mita munana, no wupilime wayo mita yihano na nusu, yakagasimya ha mulango we Nyumba yo Mulungu. 16Kanyhi yakanoza mikumbo myejete ya vyuma, yono yali yina wutali wa mita nyejete na lobo, yikajelekwa mucanyha ye masumbili. 17Ne masumbili gose vyono mejete, gali mahambwe mucanyha yayo, na mikumbo mitawe ya mikufu. 18Hamonga na micilili myejete myejete ya makomamanga ga vyuma.

19Ne mikumbo yiyo, yali mihambwe ne maluwa go wutali wa mita monga na lobo yidatu, 20nayo yikajelekwa mucanyha ye mikufu mitawe yono yali yili mucanyha ye masumbili. Na hakawa na makomamanga magana mejete gali mu micilili myejete, gapilime mu masumbili gose limonga limonga.

21Hulamu yakagawicila ha mulango we Nyumba yo Mulungu i masumbili gago mejete ge vyuma, limonga lya ku lubavu lwa kutakama likacemwa Yakini, ne liyagwe lya ku lubavu lwa kusumuka, likacemwa Bowazi. 22Ne mikumbo ye vyuma vye maluwa yikawa yili mucanyha ye masumbili. No mulimo wo wuwicila masumbili, wukawa wakondya.

Wunoze we litanji lye malenga

(2Zin 4:2-5)

23Hulamu kanyhi yakanoza litanji lya shaba, lyo kuwicila malenga. Wutali wayo wa kusi, mita nyejete na lobo, na mita yine na nusu wugazi walyo, na mita yikumi na yidatu na nusu wupilime walyo. 24Na mu mugo we litanji, yakawicila mayungu ga shaba, gono gali menjedulwe, malunze hamonga ne litanji mu mugo wayo. 25Litanji likajelekwa mucanyha ye vihwani vye zing'ombe yikumi na nyejete za shaba, zono zali zilipituciye viwino, yidatu yidatu, zilanjile mbavu zose vyono yine. 26Wukangazi we licuma lye shaba lye litanji, wali sentimita mupunghati na nusu. U mugo wayo wali winha mugo wa cikombe, na kunze yo mugo, munoze kotya liluwa liswanu muno. Ne litanji lilyo lyenjilaga lita elufu makumi mane za malenga.

Mikokoteni ye vyuma

27Hulamu yakanoza mikokoteni yikumi ya vyuma, no mukokoteni monga, wali wina wutali wa mita monga na lobo yidatu, no wugazi wayo nawo, mita monga na lobo yidatu, no wubita kucanyha, mita monga na lobo. 28Yali minozeze mbawo ngazi, zono zali ziling'aniye wutali no wugazi wayo kose kose, nazo zikawicilwa mu zifulemu. 29Na mu mbavu zayo, mwali mwandicigwe vihwani vya simba, ng'ombe, ne makelubi. Na mucanyha, mwali mocili cibatilo, na hasika ye cihwani ce simba ne ng'ombe, hakawa hakakatwe mikumbo ye maluwa. 30Ne mikokoteni yose, yali yina maguludumu mane mane ga vyuma, hamonga ne micici yayo ya vyuma. Na mu zimbavu zayo zose vyono yine, yali yina mebato, gono gali gebate bakuli, nago mebato gago, gali mahambe no wihambo we maluwa. 31Na mucanyha ye bakuli yiyo hali na mugo wono wupilime. No mugo wuwo, wukawicilwa wulawiliciye ha kacanyha, kotya nhe nusu mita nhavi ku wulawa hacanyha yo mukokoteni, na mita monga na nusu ha kasika mugati yayo. Nayo yikawa nghakakate mu mbavu zayo zose. 32Maguludumu gayo gali gena wutali wa lobo yidatu ya mita, ne vibatilo vye mikokoteni, vikawa vilunze hamonga ne mikokoteni. 33Ne maguludumu gayo gakawa gehwanile ne maguludumu ge matuka go wulugu, micici yayo ne migo yayo, ne mataluma gayo, hamonga ne vikombe vye maguludumu, vyose vyali vya cuma ca shaba. 34Hakawa na mebatilo mane mane mu mikokoteni yose, gono gali malunze mu zinhuzi zose vyono yine yine ze mikokoteni. 35Hakawa na vilunzizo mu mikokoteni yose, vyo wugazi wa lobo ya mita. Wibato wayo hamonga ne zimbawo za hasi yo mukokoteni, navyo vyali vilunze hamonga no mukokoteni. 36Na kunze yo wibato, ne zimhelo zayo, Hulamu yakakakata vihwani vye makelubi na simba, hamonga ne mitende wumonga wumonga, yakapilimya ne maluwa. 37Na yiyi yo nzila yono yetumamila mu wunoza mikokoteni. Ne mikokoteni yose, yikawa yina hwani monga du, wuwaha wayo, hamonga ne cinozeze cayo.

38Hulamu yakanoza mabakuli yikumi, mukokoteni ne bakuli lyayo. Ne libakuli limonga lyali lina wugazi wa mita monga na lobo yidatu, ne libakuli limonga, lyenjilaga lita magana munana ga malenga. 39Yakayiwika mikokoteni mihano ku lubavu lwa kutakama ye Nyumba yo Mulungu. Ne mikokoteni yinji mihano, yakayiwika ku lubavu lwa kusumuka. Ninga litanji, yakaliwika ku nhuzi ya ku lubavu lwa kutakama ye cilima.

Liwalo lye vitumamilwa vya mu Nyumba yo Mulungu kwa ndumula

(2Zin 4:11–5:1)

40Hulamu yakanoza mabakuli ne makoleyo, hamonga ne viya vyo kumiziza malenga. Yakawa yayikondeleza milimo yose yono yatumwa no Mutemi Solomona, ku soko ye Nyumba yo Mulungu. Ne vitumamilwa vyono yavinoza vyovino:

41Masumbili mejete, mabakuli mejete ga mucanyha ye masumbili. I mikufu mitawe yono yikawikwa mucanyha ye masumbili. 42Makomamanga magana mane ga shaba, gono yagawicila micilili myejete myejete ya makomamanga yigana yigana, gakapilimywa mu masumbili. 43Mikokoteni yikumi, hamonga ne mabakuli yikumi. 44Litanji lye malenga, hamonga ne vihwani vye zing'ombe yikumi na nyejete zono zajelekwa litanji mucanyha yazo. 45Mabakuli ne makoleyo, ne viya vyo kwitumamilwa, vya mu Nyumba yo Mulungu, vyono Hulamu yamunozeza mutemi Solomona. Navyo vyose vyali vinozwe na shaba yono yang'alalaga. 46U mutemi Solomona yavinozeza vinhu vivino vyose haciligati ya Sukoti na Zeletani, mwi'lolo lye likolongo lya Yoludani. 47Mutemi Solomona hamba si yasuma kulituga liwalo, hamonga no wuzito we shaba yono yetumamilwa mu wunoza vinhu vivyo vyose, hambi na vyali vinji muno muno, holeka ne liwalo lyayo hamba si lyamanyika yaye.

48Solomona yali yena ne vitumamilwa, vyono vyali vinozwe na zahabu, ku soko ye Nyumba yo Mulungu, navyo vyovino: Cikumbicilo, meza ye mikate yono milavywe kuli Mulungu, 49viwicilo yikumi vye zitala, vyono vyawikwaga hamwande ye Hanhu Hono Helile, Helile muno, navyo vikawa vihano ku lubavu lwa kutakama, ne vihano ku lubavu lwa kusumuka, ne maluwa, zitala, mibato, 50vikombe, tala, mabakuli, mitela, ne zikoleyo zo kupalila makala, ne zibawaba so milango ye Hanhu Hono Helile, Helile muno, hamonga ne milango ya kunze ye Nyumba yo Mulungu. Ne vinhu vivino vyose vyali vinozwe na zahabu.

51Nayo mutemi Solomona yali yeza kuyikondya milimo yose yo kuyizenga Nyumba yo Mulungu, hodu, yakawa kuviwika mugati ye vinyumba, i vinhu vyose vyono sogwe Dawudi yavisiwanulila kuli Muwaha Mulungu, nha cinji, fweza, zahabu, hamonga ne vitumamilwa vinji vyose.

Currently Selected:

1 Watemi 7: LLKWW

Highlight

Copy

Compare