1 Watemi 4
4
I wetumami wa Solomona
1Solomona yakawa yo mutemi we yisi yose ya Isilayeli, 2na awano, wali wo wetumami wakwe wawaha.
Azaliya u mwana wa Zadoki, yali yo mukohani, 3Eliholefu na Ahiya i wana wa Shawu, wali wo wandici Yehoshafati u mwana wa Ahiludi, yali yo mulanjilizi we zinghani zo wikumbucize. 4Benaya u mwana wa Yehoyada, yali yo muwaha we wasilikale wo wulugu. Zadoki na Abiyatali wali wo wakohani 5Azaliya u mwana wa Natani, yali yo muwaha we wetumami wose.
Zabudi u mwana wa Natani, yali yo mukohani kanyhi yo mutazi muwaha wo mutemi. 6Ahishali, yali yo mulanjilizi we wetumami wose wa mwi'kulu. Adonilamu u mwana wa Abuda, yali yo mulanjilizi wa wetumami wose we milimo, wono wetumywaga kwe vilungo.
7Solomona yakawika wanhu yikumi na wejete, wawe wo wawaha mu zisi zose ze Waisilayeli, munhu na yisi yakwe. Nawo wakawa wo waleta zindigwa kuli mutemi, ku wulawa mu zisi zawo, hamonga ne vitumamilwa vyayo. Wakawa wakwilecela munhu mwezi monga, sunga mwaka wumalika. 8Aga go matagwa gawo hamonga ne matagwa ge zisi zono wagawilwa.
Benihuli, yakapegwa yisi ye matunda ya Efulayimu. 9Bendekeli, yakapegwa makaya ga Mazi, nha cinji Shalibimu, na Beti Shemeshi, na Eloni na Beti Hanani. 10Nayo Benihesedi, yakapegwa makaya gose ga Alububoti na Soko hamonga ne yisi yose ya Hefeli. 11Benabinadabu, mono yali yamutolile mwana we cicekulu wa Solomona, mono yakucemwa Tafati, yakapegwa yisi yose ya Doli. 12Bana, u mwana wa Ahiludi, yakapegwa makaya ga Tanaki, na Megido, sunga ne ma'si gose behi na Bete-shani, behi ne likaya lya Zeletani, ku lubavu lwa kutakama ye likaya lya Yezeleli, sunga ko kwi'kaya lya Abeli Mahola, ne likaya lya Yokemeyamu. 13Nayo Bengebeli yakapegwa likaya lya Lamoti ya ku Gileyadi, hamonga ne vitumbi vyayo vya mu Gileyadi, vyono vyali vya we mhuga ya Yayili, i wana wa Manase, hamonga ne yisi ya Aligobu ya ku Bashani, gakawa makaya mawaha makumi mutandatu, gose hamonga. Na gose hamonga, gakawa mazenjele magomawakali, gena ne malango ga cuma. 14Abinadabu u mwana wa Ido, yakapegwa yisi ya Mahanayimu. 15Ahimazi mono yali yamutolile Basemati u mwana yunji kanyhi we cicekulu wa Solomona, mwene yakapegwa yisi ya Nafutali. 16Bana, u mwana wa Hushayi, yakapegwa yisi ya Asheli, hamonga ne likaya lya Beyaloti. 17Yehoshafati, u mwana wa Paluya, yakapegwa yisi ya Isakali. 18Shimeyi, u mwana wa Ela, yakapegwa yisi ya Benyamini. 19Gebeli, u mwana wa Uli, yakapegwa yisi ya Gileyadi yono yali yitemigwe no mutemi Sihoni we Waamoli, yono yali yo mutemi Ogu wa Bashani, ninga hamonga na wawa yikumi na wejete, hali ho yuli mulanjilizi wawo yumonga du, mono yawalanjililaga mu yisi yose.
Wumoteswe wo wutemi wa Solomona
20Nawo wanhu wa Yuda, hamonga ne wanhu wa Isilayeli, wakawa wenji muno nho musawawa wa mu mwejelele we lilenga, walizaga, wakung'wa, kanyhi wakawa na nyemo mbaha muno. 21Nawo wutemi wa Solomona, wukawa wutandaye muno sunga na mu makungugo ganji, ku wulawilila he 'kolongo lya Efulata, sunga ko ku yisi ye Wafilisiti, sunga ko ku mupaka we yisi ya Misili. Nawo wawa wose, wamulipaga kodi Solomona. Kanyhi wakajendelela kumwitumamila mu mikalile yakwe yose.
22Ne visakwa vyono Solomona yavitumamilaga nhondo zose, vyali vyo avi. Makapo elufu yihano ga wusaje wono wunamuce, na makopo elufu yikumi ga wusaje wono wubalanjice, 23na ng'ombe yikumi zono zijinile, na ng'ombe makumi mejete zono zikuliswa, na ngholo yigana limonga. Hamonga na vivyo vyose, kanyhi vikawa hamonga na nzela, na haluzi, hamonga ne zinghuku zono zijinile.
24Solomona yakatema yisi yose yo lubavu lwa kumwezi ye likolongo lya Efulata, ku wulawa Tifusa ha Efulata, sunga ko ku mwezi kwi 'kaya lya Gaza. Ne watemi wose wa ku lubavu lwa ku mwezi ye likolongo lya Efulata, wose wakawa wetumami wakwe, nayo yakawa yena mulamu ne zisi zose zono zali zimupilime. 25Na mu wikale wakwe wose, i wanhu wose wa Yuda na wa Isilayeli, wakekala wapolile mu mhuga zawo, hamonga ne mizabibu yawo ne mikuyu yawo.
26Kanyhi Solomona, yali yena mabanda elufu makumi mane, go wulisizo we zifwalasi zakwe zo kukwega mikokoteni yo wulugu, kanyhi yali yena wasilikale wapanda fwalasi, waficile elufu yikumi na nyejete. 27Nawo i wawaha yikumi na wejete we zi'si, wewalaga yu monga yu monga, munhu mwezi monga, wakutegulaga ko mutemi Solomona, ndigwa yono yalizaga mweneco, hamonga na wose wono walizanaga nayo mwi'kulu. Wawo walavyaga vinhu vyose vyono vyasakwaga nhondo zose. 28Nawo wose mu wilecele wawo, walavyaga yumonga yumonga, shayili ne mahanze, vyono vyasakwaga ku soko ye zifwalasi zono zakwegaga mikokoteni yo wulugu, hamonga ne zinimu zinji.
29Muwaha Mulungu yakamupela Solomona mahala menji, hamonga no wizuce wuwaha muno, muno hamonga no wuhile wuwaha wo witumi. 30Solomona yakawa munhu we mahala kuciza wanhu wose we mahala wa ku lubavu lwa kucilima, hamba i wanhu we mahala wa ku Misili. 31Solomona yakawa yo munhu we mahala muli wanhu wose, yakawa we mahala kuciza Etani munya Ezelahi, hamonga na Helimani, na Kalikoli, na Daleda i wana wa Maholi. Ne zinghani zakwe Solomona, zikakumuka mu ma'si gose gono gapilime. 32Solomona yakandika mbazi elufu yidatu, hamonga na nyimbo kuciza elufu monga. 33Na mumo mu mbazi zakwe, yakalonga ze mabici, hamonga ne vilimwa vyose, ku wulawa mu mihagata ya Lebanoni, sunga ko ku cibici ca ezobu cono citulaga no kutambala mu majinji. Yakalonga ze zinimu, na ze zindeje, na ze vitambala hasi, na ze zisomba. 34Sunga ne watemi, wose mu wulawa mu yinze yose, wose wakazihulika ze mahala gakwe, wakawa wakutuma wanhu wabite wakamuhulicize.
Currently Selected:
1 Watemi 4: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
