1 Watemi 21
21
U mugunda wa zabibu wa Naboti
1Hanyuma ya zizo, yikawa, behi ne likulu lyo mutemi Ahabu kuko ku Yezeleli, hali ho wuli mugunda wa zabibu, wono yawulimaga munhu yunji mono yacemwaga Naboti. 2Ale, mwi'zuwa linji, Ahabu yakamutya Gwe, Naboti, “Naboti, nghukulomba wundecele wuwo mugunda wako niwitumamile nene, hambi nha wuli behi muno muno ne likulu lyangu. Ane nghuhila nime busitani ya mboga. Ninga ane nokupela mugunda wunji wono muswanu kuciza awu, wono kosuma kulima zabibu. Hamba hono wende, ane nosuma kuwugula mugunda wako ko wuguzi wuswanu.”
3Ninga Naboti yakapitula yakatya, “U mugunda wu wuno, wo wuhazi wangu, ane nawuhala ku wulawa kuli walezi wangu, no Muwaha Mulungu yo muhomelezi wangu. Holeka siyosumika yaye nghupele wuhazi we walezi wangu!”
4Hodu Ahabu yakawuya ku kaya yakwe, akuno yena ne nhunduji, kanyhi yakoligwe muno ne likuwo kuli zono yalonjeywe na Naboti. Yaza kufika ha kaya, yakatambalala mu citanda cakwe akuno vidomile ne lijinji. Hamba si yasaka no kulya cinji yaye. 5U mugolece wakwe Yezebeli, yakamubitila yakamuwuza yakutya, “Alu nhawule wukalaye muno muno, sunga weza si wukusaka no kulya ndigwa?”
6Nayo Ahabu yakamupitula yakatya, “Heya, nhumbula yangu nzito ku soko ya zono yanonjeye Naboti. Hambi ane nha nali nalumba niwugule mugunda wakwe we zabibu, hamba lunji hono yawe yendile, nimupele mugunda wunji cikawane no mugunda wakwe wuwo. Ninga mwene kawa kunyitya vyono si yosumika yaye!”
7Nayo Yezebeli mugolece wakwe yakamupitula yakamutya, “Alu, si yo gwegwe mutemi wa Isilayeli, hamba ng'o? Ale wisindamice, winuce wuwuce mu citanda, wulye ndigwa. Ane nokupela wuwo mugunda wa Naboti!”
8Hanyuma ya zizi, Yezebeli yakawa kuzandika baluwa nyinji, yakazitajila sayini mwi'tagwa lya Ahabu, yakazitajila mu zibahasha, yakazidinda, yakawicila ne citanjilo cakwe. Hanyuma yakawategulila wetumami wose hamonga ne walongola wose wono wekaye mwi'kaya lyakwe. 9Ne zibaluwa zizo zikandikwa nhavi, “Mwanze lizuwa lyo wuleka kulya, muwakongholele wanhu wose hamonga, mumuwice Naboti mwi'goda litambule lya hamwande. 10Hanyuma muwice wanhu wejete we caka caka wono wosuma kumuhomelela watye, ‘Naboti kamutovula Mulungu hamonga no mutemi.’ Hobaho nanye muwe kumusola mumutegule kunze ye likaya, mumutowe ne mabwe kuko sunga yafwe.”
11Nawo wetumami hamonga ne walongola wono wekaye mwi'kaya lya Yezebeli, wakanoza nha vyono Yezebeli yawalajiliza. 12Wakalyanza lizuwa lyo wuleka kulya, wakawakongholela wanhu hamonga, wakamuwika Naboti mwi'goda litambule lya hamwande. 13Ne wanhu wejete wakamuhomelela calinze nha vyono kamutovula Mulungu hamonga no mutemi. Hodu hobaho wakamutegula kunze ye likaya, wakawa kumutowanga ne mabwe sunga yakafwa. 14Hobaho, wakabita kumulonjela Yezebeli, nha vyono Naboti yakondya kuwulagwa.
15Nayo Yezebeli yali yeza kuhulika nha vyono Naboti kakondya kufwa, hodu yakabita kamonga kumulonjela Ahabu yakutya, “U muyago Naboti, kakondya kufwa. Alu wubite wukawusole mugunda wuwe wako, wono mwene yalema kukupela.” 16Hobaho nayo Ahabu yakawa kubita kuwusola mugunda wa Naboti, wukawa wakwe.
17Nayo Muwaha Mulungu yakamulonjela muwizi Eliya, munya Tishibi yakamutya, 18“Ale wubite kuli Ahabu mutemi wa Samaliya, komwagana yali mu mugunda wa Naboti yeza kuwusola wuwe wakwe. 19Wukamulonjele wutye nhavi, ane no Muwaha Mulungu nghumutya nhavi, ‘Agwe Ahabu kumuwulaga Naboti, kanyhi wukusola sunga ne sawo yakwe hongo?’ Kanyhi wumulonjele wutye, Muwaha Mulungu yakukutya, ‘I hanhu hono mabwa gayinamhila sakami ya Naboti, nagwe hanhu baho du ho mabwa goyinamhila ne sakami yako!’ ”
20Nayo Ahabu yali yeza kumuwona Eliya yakuza, yakamutya, “Alu langa izuwali, wanyibata go mulugu wangu.”
Nayo Eliya yakamutya, “Heya nakwibata. Hambi nha kwiyendela gwegwe go mweneco kwituma zimbi hali Muwaha Mulungu. 21Holeka nayo Muwaha Mulungu yakukutya, ‘Nokuletela magayo mawaha. Nokuwusiza lukulu, hamonga ne walume wose wa mu mhuga yako, i wazelelo hamonga ne wakombi nhavivyo. 22Nawo we nyumba yako, wokwihwana na we nyumba yo mutemi Yelobowamu u mwana wa Naboti. Kanyhi kokwihwana na we nyumba yo mutemi Baasha u mwana wa Ahiya. Hambi nha kunghoza likuwo ku soko yo kuwanoza Waisilayeli wetume wubi.’ 23Na kuli za Yezebeli, u Muwaha Mulungu yakutya, nayo Yezebeli, i zimbwa zowulya muwili wakwe mwi'kaya lya Yezebeli. 24Ne wanduguzo wose wono wofwila mwi'kaya, miwili yawo yoligwa ne mabwa, na mono kofwila mwi'hala, miwili wakwe woligwa ne zi'ndi.”
25(Hali hasina munhu yunji wo wose, mono yeyendela mweneco kwituma zimbi hali Muwaha Mulungu, kotya Ahabu, mono Yezebeli mugolece wakwe, yamufwanghanaga. 26Ahabu yetuma nghani ya cevu muno mono yo kuhemba vihwani nha vyono wanozaga Waamoli, wono Muwaha Mulungu yawawinga mu yisi ha mwande ye wanhu wa Isilayeli.)
27Eliya yaza kukondya kuzilonga zizo, hodu Ahabu yakawa kuvidemulanga vivwalo vyakwe, yakavitaga, yakavwala magunila. Yakalema kulya ndigwa, yakawa kugona mu magunila, yakawa yakujenda yena wusungu no wukalale mu nhumbula yakwe.
28Muwaha Mulungu yakamulonjela Eliya yakatya, 29“Ale, wawona, vyono Ahabu yenenenyheza hali'ne? Alu vyono yakondya kwinenenyheza hali'ne, hodu nane sinowuleta wongomezwe mu cipango cakwe lono yakali mumi, langa wowa mu cipango co wikale we wanagwe, nane baho ho nolowuletela wongomezwe mu nyumba ya Ahabu.”
Currently Selected:
1 Watemi 21: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
