1 Watemi 20

U wihomi na Siliya

1U mutemi Benihadadi wa Siliya, yakagakongholela hamonga mapuga gakwe gose ge wasilikale wo wulugu, yakawa hamonga ne watemi wanji waficile makumi madatu na wejete, wena ne matuka gawo go wulugu, hamonga ne zifwalasi zawo. Yakabita, yakalipilima likaya lya Samaliya yakalihoma. 2Yakatuma wanhu wabite ku kaya yo mutemi Ahabu, wakamulonjele watye, “U mutemi Benihadadi yakukusaka 3wilavye kuli mwene, hamonga ne zifweza zako zose, ne zizahabu zako, hamonga ne wagolece wako ne wanago.”

4Nayo Ahabu mutemi wa Isilayeli yakapitula yakatya, “Mubite mukamulonjele muwaha wangu, mutemi Benihadadi mumutye vyono ane numbile du, kosuma kusola nene no mweneco hamonga ne vinhu vyose vyono nina navyo.”

5Hanyuma kanyhi wanhu wakaza kuli Ahabu wena nghani yinji kanyhi kulawa kuli Benihadadi, wakamulonjela Ahabu wakatya, “Mutemi Benihadadi katya nhavi, alu vyono wuvumiye kwiyilavya go mweneco kuli 'ne, hamonga ne zifweza zako, ne zizahabu zako, ne wagolece wako hamonga ne wanago. 6Alu notuma wetumami wangu waze walondole mwi'kulu lyako, hamonga na mu zikaya ze wetumami wako wose, wasole cinhu co cose cono wowona cina cambuzi. Nowatuma wokuza kuko i mitondo kwinha vivi.”

7Nayo mutemi Ahabu yakawacema i walongola wose we yisi, yakawatya, “Alu mulanje, mukuwona vyono munhu ayu yakusaka yacongomeze. Yanhumila wanhu waze wanonjele vyono mwene Benihadadi yakusaka nimupele wagolece zangu ne wanangu, ne zifweza hamonga ne zizahabu, nane nghavumila.”

8Nawo walongola hamonga ne wanhu wakapitula wakatya, “Wulecele lukulu kumuhulicila hamba wulece kumuvumila.”

9Hodu Ahabu yakawa kuwalonjela wanhu wabite wakamulonjele Benihadadi watye, “Gwe go mutemi Benihadadi go muwaha wangu, ane nalumba du mu cisakwa cako cilongozi, ninga mu cisakwa cako ce kejete, ane si nghuvumila yaye.”

I wanhu wa walya wono watumwa wakabita kuli Benihadadi. Ninga kanyhi wakaza kuli Ahabu na nghani yinji kanyhi, kulawa kuli Benihadadi, wakatya, 10“Mutemi Benihadadi yakutya, Notuma wanhu wenji waze walyongomeze likaya lyako lilino, wagazole ne malowanjila galyo mu mawoko gawo. Nane hono nikale si nizitumile zizi, hodu milungu yimbulagaje!”

11Nayo mutemi Ahabu yakawapitula yakatya, “Ale mubite mukamulonjele Benihadadi nha vyono, u musilikale citung'ati, kekumyaga lono wulugu wapuluta, ninga si kekumyaga yaye lono wulugu wukali.”

12Benihadadi yakatuga lipitulo lya Ahabu mwi'pango lono wang'wezaga wali mu mahema gawo, mwene hamonga ne watemi wayagwe wono vyali vilunzize. Hobaho Benihadadi yakalajiliza wanhu wakwe wewikanize wabite wakalihome likaya. Nawo wanhu wakawa kutuluka hamonga wakawa kubita.

13Ninga kono nyuma, u muwizi yakamubitila mutemi Ahabu, yakamulonjela yakatya, “Muwaha Mulungu yakutya, wulece kulyogopa yaye lipuga liwaha lilyo lye wasilikale! Ane nokupela wusume zuwalili du kuli wene, nagwe ho komanya vyono ane yo nene Muwaha Mulungu.”

14Nayo Ahabu yakatya. “Alu ma, mono kowulongoza wulugu wuwo kowa nani?” U muwizi yakamutya, “Muwaha Mulungu yakutya vyono i wasilikale wazelelo wono wakulawa mu matumbi, wawo wo wokwituma mulimo wuwo, akuno wakulanjililwa ne wasilikale wawaha wa mu zisi zose ze Waisilayeli.”

Mutemi Ahabu yakawuza yakatya, “Alu hamba nhavivyo, ma mono kocema wulugu wuwo kowa nani?” Muwizi yakamutya, “Kowa gwegwe.”

15Hobaho mutemi Ahabu, yakawa kuwakonghola i wasilikale we cizelelo wose, wono wali wali mu wulanjilizi we wawaha wose, magana mejete na makumi madatu na mejete we wasilikale. Hanyuma kanyhi yakawakonghola ne wasilikale we Waisilayeli waficile wanhu elufu mupunghati.

16Hobaho wulugu wukawa kwanza mwi'pango lya mu misi mugati, lono Benihadadi hamonga ne watemi makumi madatu na wejete, wono wali welunzize nayo, wali wakali wali mu wung'wi mu mahema gawo. 17I wasilikale wazelelo wo wakawa walongoleye kumwande ye mapuga. Nayo Benihadadi yali yawicile walanjilizi, wono hanyuma wakaza kumulonjela nha vyono wawona lipuga lye wasilikale likuza likulawa ku Samaliya. 18Nayo Benihadadi yakalajiliza yakatya, “Ale mubite mukawalete womi, hambi nha si nghani yaye hono wawe wakuza ku wihomi, hamba wakuza kulomba mulamu.”

19Iwasilikale wazelelo wo wakalongola kwihoma ne walugu, hanyuma lipuga lye wasilikale wa Isilayeli, nawo ho wakatyatya. 20Wakawahoma muno, wakawawulaga munhu na mulugu wakwe. Sunga ne wanhu wa Siliya wakasumwa wakatiza, nawo Waisilayeli wakawalondelela du. Ninga Benihadadi yakapanda fwalasi yakatiza, ne wasilikale wanji wapanda fwalasi. 21Mutemi Ahabu yakayisola migunda ne zifwalasi, hamonga ne matuka go wulugu, yakawahoma muno muno wanhu wa Siliya no kuwasuma.

22Hanyuma kanyhi u muwizi yakamubitila mutemi Ahabu yakamutya, “Alu, wubite wukawawikanize viswanu wasilikale wako wo wulugu, hamonga na gwegwe, hambi mutemi wa Siliya nha kokuza mwihome nayo kanyhi ku mwaka.”

Wihomi lwe kejete na Siliya

23I wetumami wo mutemi Benihadadi wakamulonjela Benihadadi wakatya, “Mwene wumanyile nha vyono milungu ye Waisilayeli yo milungu ya mu matunda, na yiyi yo soko holeka Waisilayeli wakacisuma. Ninga mbeka cidahile kuwasuma, hono cihomele nawo mu yisi yo wuhihi. 24Holeka aluno wuwawusaje wawano watemi makumi madatu na wejete wawuce mu wulanjilizi wawo, wuwawice walanjilizi wanji wahomele hanhu hawo. 25Hanyuma wukonghole wasilikale wenji muno muno wo wulugu, wawe wenji nha wa walya wono wakatiza, hamonga no winji wuwo we zifwalasi ne matuka go wulugu. Nase cokwihoma ne Waisilayeli mu yisi yo wuhihi. Nhondo muhinzo wuwu nase cowasuma du.”

Mutemi Benihadadi nayo yakavumila, yakanoza nha vyono wamulonjela. 26Na mu mwaka wono watyatya, yakawakonghola wanhu wakwe, yakabita nawo sunga kwi'kaya lya Afeki, yakawahome Waisilayeli. 27Ninga Waisilayeli nawo wali wakondya kwiwikaniziza lukulu. Nawo wakabita wakegawa mapuga mejete, wakasita nghambi zawo zili hejete, wakawa vidomile ne wanhu wa Siliya. Ninga i Waisilayeli, wejelaga nha vitewa vidodo vya mhene ha mwande ye wanhu wa Siliya, wono wali weyagaye du mu yisi yose.

28U muwizi yakamubitila kanyhi mutemi Ahabu yakamutya, “Muwaha Mulungu yakutya nhavi: ‘Alu vyono wanhu wa Siliya wakutya ane nili mulungu wa mu matunda, hamba si nili wa mu yisi yo wuhihi, ale, nane nokupela wusume wuwaha kuli mapuga gawo mawaha ge wasilikale, nagwe hamonga ne wanhu wako, ho momanya vyono ane yo nene Muwaha Mulungu.’ ”

29Waisilayeli ne Wasiliya, wakekala vilo mupunghati mu zinghambi zawo vyo wedomile du munhu yamulanjile muyagwe. Na mwi'zuwa lyo mupunghati nhondo ho wulugu wukawa kwanza. Ne Waisilayeli wawawulaga wanhu wa Siliya waficile elufu yigana limonga. 30Na wono wasigala wakatiziza kwi'kaya lya Afeki, ninga nawo majinji ge likaya gakawagwila, wakafwa wanhu waficile elufu makumi mejete na mupunghati.

Ninga mwene Benihadadi, yakatiziza mwi'kaya, yakehundika mu cinyumba ca kumhilimo ye kaya. 31I wetumami wakwe wakamubitila wakamulonjela wakatya, “Ase cikuhulika nha vyono watemi we Waisilayeli, wo wanhu wono wali lusungu. Holeka cikukulomba wucikombole cimubitile mutemi wa Isilayeli, ciwe citunjile mu viwino magunila akuno cidajile milejehe mu zisingo zetu, lunji kokuleka si kokuwulaga.” 32Hobaho wakawa kwitunga magunila mu viwino vyawo, wakadaga ne milejehe mu zisingo zawo, wakawa kumubitila Ahabu wakamutya, “U mwitumami wako Benihadadi yakukulomba wulece kumuwulaga.”

33Nayo Ahabu yakawawuza yakatya, “Alu kumbe yakali mumi hongo? Ale viswanu! Ayo mwene nha ndugu yangu.” Hodu wakawacilila kamonga wakatya. “Heya nha vyono wulonjile, Benihadadi mbeka nduguyo!”

Nayo Ahabu yakawatya, “Heya! Alu mubite mukamulete hono hangu.” Nayo Benihadadi yaza kuwa yaza, Ahabu yakamubocela viswanu muno, yakamupandiza mwi'tuka lyakwe lyo wulugu. 34Benihadadi yakamulonjela Ahabu yakatya, “Alu wayiko, ane nokugomolela makaya gose gono baba yagasola kuli sogo, nagwe wulinoze likaya lya Damesiki liwe likaya lyako lyo wusuluza, nha vyono baba yalinoza likaya lya Samaliya.”

Ahabu yakamupitula yakatya, “Alu ku soko ya zizi zono wulonjile, hodu nane nokulecela.” Ahabu yakanoza cilagane na Benihadadi, hanyuma yakamuleka yabite.

U muwizi yakumuhosa Ahabu

35U munhu yunji wa muli wana we wawizi, ku so lilajilizo lyo Muwaha Mulungu, yakamulonjela muwizi muyagwe yakutya, “Wunhowaje” ninga yuyo muyagwe yakalema kumutowa. 36Nayo yakamutya, “Alu vyono walema kunhowa, wabena lilajilizo lyo Muwaha Mulungu, na ku soko yiyo, vyono wukuwuka bahano du, simba yokuwulaga.” Nayo mbeka yali yeza kuwuka baho du, simba yikamwagana yikamuwulaga.

37Hanyuma yayo, muwizi yuyo du, yakabita kanyhi kuli munhu yunji yakamutya, “Nhowaje.” U munhu yuyo yakamutowa, yamutowa hawaha yakamutamisa muno. 38Muwizi yakewopa wusu wakwe ne citema co mwenda, ho yekawanize yunji yalece kumumanya. Hanyuma yakabita yakema mu nzila, yalindiye kolo mutemi yakupuluta. 39Na lono mutemi yapulutaga, u muwizi yakamucema yakutya, “Gwe go mutemi, ane nali nili mu wulugu, hanyuma musilikale muyangu kandetela mulugu mateka, kanonjela nha vyono, ‘Wumudime munhu yuyu, na hono wumuleceleze yatije, ale agwe go mweneco kowulagwa, hamba kolipa fweza elufu yidatu.’ 40Ninga nane niwa kucelajila sunga munhu yuyo kawa kutiza.”

U mutemi Ahabu yakamutya, “Alu nha wakondya kwilonjela go mweneco vyono koling'aniza, holeka yikunojeye gwegwe wulipe yiyo fayini.”

41Nayo muwizi hodu yakawa kuciwusa citema co mwenda mu wusu wakwe. Nayo mutemi yakawa kumumanya vyono yo muyagwe ne wawizi. 42Hanyuma muwizi yakamulonjela mutemi yakatya, “Muwaha Mulungu yakutya, ‘Alu vyono kumuleka Benihadadi kawa kutiga, u munhu mono nali nghulajilize wumuwulaje, alu gwegwe yo kofwa wuhalile wufwe wakwe, kanyhi ne mapuga gako gose ge wasilikale wako wo wulugu, gokongomezwa, ku soko vyono kugaleka mapuga ge wasilikale wo wulugu ga Benihadadi gatiga.’ ”

43Hobaho mutemi Ahabu yakawa kuwuya ku kaya yakwe ku Samaliya akuno yakalaye, yakoligwe ne likuwo.

Currently Selected:

1 Watemi 20: LLKWW

Highlight

Copy

Compare