1 Watemi 16

1Muwaha Mulungu yakamutuma muwizi Yehu, u mwana wa Hanani, yabite yakamulonjele Baasha yamutye nhavi: 2“Agwe Baasha, wali si wuli munhu mono wumanyice yaye, ninga ane nghukunoza wuwe wuli mulongola muli wanhu wangu Waisilayeli. Ninga agwe lu, wakondya kwituma wubi nha vyono yetuma Yelobowamu, yakawanoza ne wanhu wangu wetume wubi. No wubi wawo wukanghoza likuwo, 3holeka nagwe nokutendela nha vyono namutendela Yelobowamu. 4Ne wanhu wa mu mhuga yako, wono wofwila mwi'kaya, i miwili yawo yoligwa ne mabwa, nawo wono wofwila mwihala, i miwili yawo yoligwa ne zi'ndi.”

5Ne zinghani zose zono yetuma mutemi Baasha ne milimo yakwe ye cibali-bali, zose zandicigwe mu citabu ce zinghomo ze Metumo ge watemi wa Isilayeli. 6Baasha yakafwa, yakazikwa ku Tiliza. Na Ela u mwanagwe, yo yakahala wutemi wakwe.

7I nghani yo Muwaha Mulungu kuli Baasha hamonga ne mhuga yakwe Muwaha Mulungu yamutuma muwizi Yehu u mwana wa Hanani, ku soko yo wubi wono yetuma Baasha hali Muwaha Mulungu. Baasha yakamukoza Muwaha Mulungu likuwo, ninga si ku soko yo wubi du wono yetuma, nha vyono yetuma mutemi Yelobowamu, mono yamulongolela mu wutemi, langa na ku soko vyono, yayongomeza ne mhuga yose ya Yelobowamu.

Ela u mutemi wa Isilayeli

8Na mu mwaka we makumi mejete wo mutemi Asa wa Yuda, nayo Ela u mwana wa Baasha ho yakawa kutema muli Waisilayeli. Nayo Ela yakatema ku Tiliza myaka myejete du. 9Hanyuma Zimuli mono yali yumonga wa wetumami wakwe, mono yali yo mulanjilizi muwaha we nusu ye matuka gose go mutemi go wulugu, yakawa no wuhile wubi kuli Ela. Na mwi'zuwa linji lono Ela yang'wezaga sunga yakagala mu kaya ya Aliza, mono yali yo mulanjilizi muwaha we likulu, 10hobaho Zimuli yakenjila mumo mu kaya yiyo, yakamuhungucila Ela, yakamubogolanga sunga yakafwa. Mwene Zimuli yakawa kuwusola wutemi. Na zizi zose zejela mu mwaka we makumi mejete wo wuteme wo mutemi Asa wa Yuda.

11Nayo Zimuli yaza kutema, hodu hobaho du, yakawa kuwawulaga wose we nyumba ya Baasha. Yakawawulaga i walume wose wono wali wali cidugudugu, hamonga ne wendece wa Baasha. 12Holeka yikawa nha vyono Muwaha Mulungu yalonga kuli Baasha ko mulomo wo muwizi Yehu, holeka Zimuli yawawulaga we mhuga yose ya Baasha. 13Na ku soko ye masutya gakwe Baasha, na ku soko yo kuwanoza Waisilayeli wetume wubi, Baasha hamonga na Ela u mwanagwe, wakamukoza likuwo Muwaha Mulungu, u Mulungu wa Isilayeli. 14Ne zinghani zose zono yetuma Ela, zose zandicigwe mu citabu ce zinghomo ze Metumo ge watemi wa Isilayeli.

Zimuli u mutemi wa Isilayeli

15Na mu mwaka we makumi mejete na mupunghati, wo wutemi wa Asa mutemi wa Yuda, nayo Zimuli ho yatemela ku Tiliza muli Waisilayeli. Nayo yatema vilo mupunghati du. I Mapuga ge wasilikale Waisilayeli, wakalipilima likaya lya Gibetoni lya ku yisi ye Wafilisiti, 16nawo wali weza kumanya nha vyono, Zimuli yali yena wuhile wubi kuli mutemi Ela, sunga kawa kumuwulaga, hodu nawo ku wulawa baho, wakawa kumwihaga Omuli u muwaha wawo we mapuga ge wasilikale, wakawa kumunoza yawe mutemi wa Isilayeli. 17Nayo Omuli hamonga ne mapuga gakwe ge wasilikale, wakawuka kuko ku Gibetoni, wakawa kubita kuyipilima Tiliza. 18Nayo Zimuli, yaza kuwona vyono likaya lyakondya kusolwa, hodu, mwene yakawa kubita kwihundika mu cinyumba, cono cali cizenjigwe mugati mwigomawakali lye likulu. Yakawa kulikoleleza likulu no moto, nayo yakawa kufwila mumo. 19Na zizi zose zejela ku soko yo wubi wono yamusutizya Muwaha Mulungu. Yakehwana na Yelobowamu mono yamulongolela, nha vyono si yamwendeza Muwaha Mulungu so wubi wakwe wono yetuma, hamonga no kuwanoza Waisilayeli nawo wetume wubi. 20Ne zinghani zose zono yetuma Zimuli, hamonga na zo wuhile wakwe mubi, zose zandicigwe mu citabu ce zinghomo ze Metumo ge watemi wa Isilayeli.

Omuli u mutemi wa Isilayeli

21Hanyuma yikawa, i wanhu wa Isilayeli wakegawa hejete, wanji wamusakaga Tibuni u mwana wa Ginati, yo yawe mutemi wawo. Na wanji nawo wakawa wamwendile Omuli. 22Ninga ku ndumilizo, awalya wono wamusakaga Omuli, wakawasuma wayawo. Tibuni yakafwa, na Omuli yakawa yo mutemi. 23Holeka mu mwaka we makumi madatu na monga wo mutemi Asa, mutemi wa Yuda. Omuli ho yanozezwa yawe mutemi wa Isilayeli. Nayo Omuli yakatema muli Waisilayeli myaka yikumi na myejete. Mu myaka mutandatu milongozi, yakawa yatemile ku Tiliza. 24Ninga hanyuma yakagula cigongo ca Samaliya, fweza elufu mutandatu, kuli munhu litagwa lyakwe Shemeli. Omuli yakazenga kaya mumo mu cigongo cico, yakayicemela litagwa Samaliya, nha cinji Shemeli, i litagwa lya mono yali munya cigongo cico.

25Omuli yaketuma wubi hali Muwaha Mulungu, si nha watemi wose wono wamulongolela. 26Yakawa yehwanile Yelobowamu mono yamulongolela kutema. Nayo Omuli yakamukalaza muno Muwaha Mulungu ku soko yo wubi wakwe meneco, hamonga no kuwanoza Waisilayeli nawo wetume wubi. 27Ne zinghani zose zono Omuli yetuma, hamonga ne masutya gono yetuma, zose zandicigwe mu citabu ce zinghomo ze Metumo ge watemi wa Isilayeli. 28Nayo Omuli yakafwa, yakazikwa kuko ku Samaliya. Nayo Ahabu u mwanagwe, yo yakahala wutemi wakwe.

Ahabu u mutemi wa Isilayeli

29Na mu mwaka we makumi madatu na munana wo wuteme wa Asa, u mutemi wa yuda, nayo Ahabu u mwana wa Omuli, ho yatemela muli Waisilayeli, yakatema ku Samaliya myaka makumi mejete na myejete. 30Ahabu yaketuma wubi hali Muwaha Mulungu kuciza watemi wose wono wamulongolela. 31Kanyhi mwene Ahabu, hamba si yetuma wubi nha vyono Yelobowamu yetuma du, langa yakaciziliza ku soko yo kumutola Yezebeli, u mwana we cicekulu wo mutemi Etibali, mutemi wa ku Sidoni, sunga yakahemba Baali. 32Ahabu yakamuzenjela Baali nyumba yo wuhembelo ku Samaliya, yakamuzenjela ne cikumbicilo, yakaciwika mumo mu nyumba yo wuhembelo. 33Yakawika ne cihwani co mulungu we cicekulu Ashela. Ahabu yanoza nghani nyinji du zimbi, sunga yakamukoza likuwo Muwaha Mulungu, u Mulungu wa Isilayeli, kuciza i watemi wose wa Isilayeli wono wamulongolela mu wutemi. 34Na mwipango lyo wutemi wa Ahabu. Hiyeli munya Beteli, yakalizenga likaya lya Yeliko. Ninga Hiyeli yakafwilwa na Abilamu u mwanagwe mulongozi kulelwa, hamonga na Segubu u mwanagwe mudodo, lono yazengaga malango ge likaya. Nha vyono Muwaha Mulungu yali yakondya ku zilonjela muli Yoshuwa u mwana wa Nuni.

Currently Selected:

1 Watemi 16: LLKWW

Highlight

Copy

Compare