1 Watemi 15

U mutemi Abiya wa Yuda

(2Zin 13:1-14)

1Na mu mwaka we likumi na munana wa Yelobowamu u mwana wa Nebati u wutemi wa Isilayeli, baho nayo Abiya ho yatemela mu Yuda. 2Abiya yatema myaka midatu ku Yelusalemi. U nyina wa Abiya yacemwaga Maka u mwana we cicekulu wa Abusalomu. 3Ninga nayo Abiya yaketuma wubi wu wulya wose nha vyono yetuma sogwe Lehobowamu, hamba si yamuhulika Muwaha Mulungu, u Mulungu wakwe, nha vyono kukuye Dawudi yali yamuhulice. 4Ninga du ku soko ya Dawudi, u Muwaha Mulungu, u Mulungu wakwe, yakamupela mwana wa cilume yuyo mono yakacemwa Abiya, ho yahale wutemi wakwe mu Yelusalemi, no kuyidima yikale yipolile. 5Nayo Muwaha Mulungu yetuma zizo, vyono Dawudi yetuma zono zamwendezaga Mulungu, kanyhi yakagakamisa muno ne malajilizo gakwe gose. Langa nghani monga du yono yasutya, yo nghani ya Uliya Muhiti. 6Nawo wulugu wono wali wakondya kwanza hagati ya Lehobowamu na Yelobowamu, wukajendelela sunga na mu vilo vyose vyo wikale wa Abiya. 7Ne zinghani zose zono mutemi Abiya yetuma zandicigwe mu citabu ce zinghomo ze Metumo ge watemi wa Yuda.

8Abiya yakafwa, yakazikwa mu kaya ya Dawudi. No mwanagwe mono yacemwaga Asa, yo yakahala wutemi wakwe.

Asa mutemi wa Yuda

(2Zin 15:16–16:6)

9Mu mwaka we makumi mejete wo mutemi wa Isilayeli Yelobowamu, Asa nayo lo yatemela mu Yuda. 10Nayo Asa yatema mu Yelusalemi myaka makumi mane na monga. U mamaye wa Asa u mulelo sogwe, yacemwaga Maka u mwana we cicekulu wa Abusalomu. 11Yuyo Asa, yaketuma ziswanu zono zikumwendeza Muwaha Mulungu nha vyono yetuma kukuye Dawudi, u mulelo kukuye Abusalomu. 12Yakawawinga mu yisi i walume nono wagonaga walume wayawo, hamonga ne wecekulu wasenyha, wono wetumaga mu wuhembelo we milungu yo wulambi. Yakavitulanga ne vihwani vyose vye milungu, vyono wavinoza i watemi wayagwe, wono wamulongolela. 13Yakamuwusa mamaye Maka mwi'lumbo lyakwe lyo kuwa nyina we likulu, ku soko yo yanoza cihwani co mulungu we cicekulu Ashela. Asa yakaciwusa cihwani cico, yakacikongoga mu moto ha cikolongo ca Kidiloni. 14Ninga hamba nhavivyo, Asa si yahahodanga i hanhu hose ha wakumbicilo we milungu yo wulambi mu vigongo yaye. Langa mwene yekala mwihuwilwa du kuli Muwaha Mulungu, mu mikalile yakwe yose. 15Asa yakavihaliza mu Nyumba yo Mulungu i vitumamilwa vyose nha vyono vyali vinha, vyono sogwe yavisiwanulila Mulungu, hamonga ne zahabu, ne fweza, vyono mweneco nayo yakavisiwanula.

16U mutemi Asa wa Yuda, no mutemi Baasha wa Isilayeli, wekalaga wakwihoma du wulugu mu vilo vyose vya mu wutemi wawo. 17Baasha yakayihoma Yuda, yakazenga Lama, ho yawemile wanhu walece kwinjila, hamba kulawila wabite kuli Asa u mutemi we wa Yuda. 18Nayo Asa yakawusa zifweza zose hamonga ne zahabu yono yali yili mu Nyumba yo Mulungu, hamonga na yono yali yili mwi'kulu, yakawatuma i wetumami wakwe, wakayitegula ku Damesiki kuli mutemi Benihadadi wa Siliya, u mwana wa Tabulimoni u mwizukulu wa Heziyoni. Yakatumiliza hamonga ne zinghani azi, yakatya, 19“Alu 'gwe muyangu, nase cilunzaje nha vyono wasogo zetu wali welunzize hamonga. Nane nghukuleta yiyo fweza hamonga ne zahabu, viwe cipegwa cako. Nane nghukunena wuwubenaje wilunze wenyu no mutemi Baasha wa Isilayeli, nayo ho yagawuse mapuga gakwe mu wasilikale mu yisi yangu.”

20Nayo mutemi Benihadadi yakalivumila lihweso lilyo lya Asa, hodu yakawa kutegula wawaha wakwe we wasilikale, hamonga ne mapuga gawo ge wasilikale wo wulugu, wakawa kubita kugahoma makaya ge Waisilayeli. Nawo wakawasuma Waisilayeli, wakasola ne makaya gawo, likaya lya Lyoni, na Dani, na Abeli-beti-maka, yisi yono yili behi ne lilamba lya Galilaya, sunga ne yisi yose ya Nafutali. 21Nayo mutemi Baasha yali yeza kuzihulika nha vyono zinha, yakaleka kujendelela kuzenga Lama, hodu yakawa kubita kwikala ku Tiliza.

22Hanyuma mutemi Asa yakatuma wanhu wabite mu yisi ya Yuda, wawalalice wanhu wose, wabite ku Lama, wakadinghule mabwe gose hamonga ne zimbawo zose, zono Baasha yetumamila mu wuzenga yiyo Lama. Nayo Asa yakavisola vinhu vivyo, yakazenjela Mizipa na Geba, likaya lya mu yisi ya Benyamini.

23Ne zinghani zose zono mutemi Asa yetuma, hamonga ne cibali-bali cakwe, ne makaya gono yazenga, zose zandicigwe mu citabu ce zinghomo ze Metumo ge watemi wa Yuda. Ninga Asa mu wukombi wakwe, yakawa yena wutamwa wa mu migulu. 24Asa yakafwa, yakazikwa mu vitenjelo mu kaya ya Dawudi. Na Yehoshafati u mwanagwe, yakahala wutemi wakwe.

Nadabu u mutemi wa Isilayeli.

25Na mu mwaka we kejete wo mutemi Asa wa Yuda, nayo Nadabu u mwa wa Yelobowamu ho yanziza kutema muli wa Isilayeli. Nayo yatema myaka myejete du. 26Ninga yakehwana sogwe Yelobowamu. Nayo yaketuma wubi hali Muwaha Mulungu, kanyhi yakawanoza sunga ne Waisilayeli wamusutizye Mulungu.

27Nayo Baasha u mwana wa Ahiya wo mulango wa Isakali, yakawa no wuhile wubi kuli. Nadabu, hanyuma yakamuwulaga Nadabu, lono Nadabu hamonga ne wasilikale wakwe, wali walipilima walihodanje likaya lya Gibetoni, mu yisi ye Wafilisiti. 28Na zizi zejela mu mwaka we kadatu wo wutemi wa Asa, mutemi wa Yuda. Na ku soko yiyo, Baasha yakawa yamusuma Nadabu u mutemi wa Isilayeli. 29Hobaho Baasha yakawa kuwawulaga wose we mhuga ya Yelobowamu, yakatyatya zinghani zono Muwaha Mulungu yazilonjela muli mwitumami wakwe u muwizi Ahiya munya Shilo. Holeka we mhuga yose ya Yelobowamu, wakawulagwa wose, hakawa hasina hamba monga mono yasigala yaye. 30Na zizi zikejela, vyono Yelobowamu yamukoza likuwo Muwaha Mulungu, u Mulungu wa Isilayeli, ku so wubi wono yetuma, na vyono, yawanoza ne Waisilayeli nawo wetume wubi.

31Ne zinghani zose ze metumo gono yetuma Nadabu, zandicigwe mu citabu ce zinghomo ze Metumo ge watemi wa Isilayeli. 32U mutemi Asa wa Yuda, no mutemi Baasha wa Isilayeli, wekalaga wakwihoma du wulugu, mu vilo vyose vya mu wuteme wawo.

Baasha u mutemi wa Isilayeli

33Na mu mwaka we kadatu wo mutemi Asa wa Yuda, Baasha u mwana wa Ahiya, yakawa mutemi wa Isilayeli, yakatema ku Tiliza myaka makumi mejete na mine. 34Ninga nayo Baasha yakamusutizya Muwaha Mulungu, kanyhi yakawanoza i wanhu wa Isilayeli wetume wubi, nha vyono yanoza mutemi Yelobowamu mono yamulongolela kutema.

Currently Selected:

1 Watemi 15: LLKWW

Highlight

Copy

Compare