1 Watemi 14

U wufwe wo mwana wa Yelobowamu

1Na mu mapango gago, Abiya u mwana wa Yelobowamu yakawa yatamwa. 2Nayo Yelobowamu yakamulonjela mugolece wakwe yakamutya, “Alu winozaje wuwe nha wuli yunji, wanhu ho walece kukumanya, wubite ku Shilo kono kekalaga muwizi Ahiya, mono yanonjela vyono ane nowa mutemi wa Isilayeli. 3Wumutegulilaje mikate yikumi na keki nyhefu, hamonga ne njilo yo wuci. Wubite wukamuwuze cono comwijelela mwana wetu Abiya, nayo kokulonjela.”

4Hodu yuyo mugolece wakwe, yakawa kumubitila Ahiya ku Shilo. Nayo Ahiya yali yakondya kubofula so wukombi wakwe. 5Ninga Muwaha Mulungu yali yakondya kumulonjela nha vyono, u mugolece wa Yelobowamu yakuza kumuwona, ku soko yo mwanagwe mono yatamigwe. Nayo Muwaha Mulungu yakamulonjela Ahiya zono kolonga.

Nayo mugolece wa Yelobowamu yali yeza kufika, yakawa yenozize nha munhu yunji. 6Ninga Ahiya yali yeza kuhulika sesele ha mulango, yakamanya vyono yo mweneco yaza, holeka yakamutya, “Wuhelele. Ane manyile vyono yo gwegwe mugolece wa Yelobowamu, alu nhawule wukwinoza nha wuli munhu yunji? Ninga ane nina nghani kuli'gwe yono si yokwendeza yaye. 7Wubite wukamuloloseze Yelobowamu nha vyono Muwaha Mulungu, u Mulungu wa Isilayeli yakumutya nhavi, ‘Ane nakuhagula muli wanhu, nghakunoza wuwe mutemi muli wanhu wangu Waisilayeli. 8Nghawuwusa wutemi kuli lulelo lwa Dawudi, nghawa kukupela agwe. Ninga nagwe si wasaka wihwane nho mwitumami wangu Dawudi, mono yali yahulicile muno muno, kanyhi yetuma zo wuhile wangu. 9Ninga agwe wakondya kwituma wubi kuciza wose wono wakulongolela kutema. Agwe wakondya kunema'ne, kanyhi wakondya kulisagala likuwo lyangu so wunoza vihwani viseswe, hamonga ne vihwani vyenjedulwe, no kvuihemba. 10Holeka nane ku soko yiyo, nokuletela wongomele munyumba yako, nowawulaga we cilume wose wa mu nyumba yako, i wana wadodo, hamonga ne wanhu mututu wose. Nane nowaleka wa mu mhuga yako wafwagulwe nhe matakataka. 11No munhu wo wose wa mu mhuga yako mono kofwila mwi'kaya, muwili wakwe woligwa ne mabwa, nayo mono kofwila mwi'hala, muwili wakwe woligwa ne zi'ndi. Nene no Muwaha Mulungu vyo nakondya kutya.’ ”

12Ahiya yakajendelela kumulonjela mugolece wa Yelobowamu, yakutya, “Alu mudala, wuwuye ku kaya, ninga vyono wukulikanyaga likaya du, baho baho no mwanago kofwa. 13Ne wanhu wa Isilayeli wose womuzika no kumulilila. Nayo kowa yo yuyo yumonga du wa mu mhuga ya Yelobowamu mono kozikwa, hambi nha yo yuyo du mono u Muwaha Mulungu, u Mulungu wa Isilayeli yendezwe nayo. 14U Muwaha Mulungu komwinulila mutemi yunji muli Waisilayeli mono kowudumizya lukulu wutemi wa Yelobowamu. 15Muwaha Mulungu kolowalipiciza Waisilayeli, kolowasinjisa nha vyono cikolongo cisinjisaga madete mu'gati yaco. Kowawusa Waisilayeli mu yisi yiyi swanu muno, yono yawapela walezi wawo. Nayo koloweyagaziza ku nhumbi ye likolongo lya Efulata, hambi nha walisagala likuwo lyakwe, so wusesa vihwani vyo mulungu we cicekulu Ashela. 16Nayo Muwaha Mulungu kolowaleka Waisilayeli vyono Yelobowamu yetuma wubi no kuwanoza Waisilayeli wetume wubi nhavivyo.”

17U mugolece wa Yelobowamu yakawa kutuluka, yakafika ku Tiliza. Ninga yali yeza kufika du ha mulango, nayo mwana yakawa kutajika. 18I wanhu wa Isilayeli wakamuzika, kanyhi wakamulilila muno, nha vyono Muwaha Mulungu yalonjela muli mwitumami wakwe, u muwizi Ahiya.

U wugwe wa Yelobowamu

19Ne zinghani zose zo mutemi Yelobowamu, zinghani zo wulugu wono yehomaga, na zo wuteme wakwe, zose zandicigwe mu citabu ce zinghomo ze Metumo go mutemi Yelobowamu wa Isilayeli. 20Nayo Yelobowamu yatema myaka makumi mejete na myejete. Yakafwa, yakazikwa. No mwanagwe mono yacemwaga Nadabu yo yakahala wutemi wakwe.

U mutemi Lehobowamu wa Yuda

(2Zin 11:5–12:5)

21Lehobowamu u mwana wa Solomona, yali yaficila myaka makumi mane na monga, lono yatemela mu Yuda. Nayo yakatema myaka yikumi na mupunghati mu Yelusalemi, mwi' kaya lyono Muwaha Mulungu yalihagula mu wulawa mu yisi yose ya Isilayeli, hawe ho hanhu hakwe hono kowa kuhembelwa. U nyina wa Lehobowamu yacemwaga Nama, munya Amoni.

22I wanhu wa Yuda nawo wakamusutizya Muwaha Mulungu, wakamusagahiza Mulungu likuwo lyakwe, yakawakolelwa likuwo muno ku soko yowubi wono wetuma kuciza ne walezi wawo. 23Hambi nha wazenga hanhu ho kuhembela milungu yo wulambi, wakasimya masumbili ga mabwe, hamonga ne cihwani co mulungu we cicekulu Ashela, no kucihemba mumo mu vigongo vitali, na mu mibeho hasi ye mibici. 24Ne nghani yono yali 'mbi muno, hakawa ho wali walume wono wagonaga ne walume wayawo, hamonga ne wacekulu wasenyha, wono wetumamaga mu wuhembelo we milungu yo wulambi. I wanhu wa Yuda waketuma makani ga cevu muno, gono wetumaga i wanhu wono Muwaha Mulungu yawawinga mu yisi, lono Waisilayeli wenjilaga mu yisi yiyo.

25Na mu mwaka we hano wo wutemi wa Lehobowamu, Shishaki u mutemi wa Misili, yakayihoma Yelusalemi. 26Yakayisola sawo yose ya mu Nyumba yo Mulungu, hamonga ne sawo yose ya mwi'kulu, hamonga ne zingula zose ze zahabu zono Solomona yazinoza. 27U mutemi Lehobowamu, yakanoza ngula zinji za shaba yakahaliza. Yakawalajiliza wetumami wakwe wawaha, walindilize milango ye likulu. 28Na mu mapango gose gono mutemi yenjilaga mu Nyumba yo Mulungu, i walindilizi nawo wazidinghulaga zingula, na hanyuma kanyhi wawa kuzigomola mu cinyumba co kuzikamisiza.

29Ne zinghani zose zono mutemi Lehobowamu yetuma, zandicigwe mu citabu ce zinghomo ze Metumo ga watemi wa Yuda. 30Na mu mapango gose gago, Lehobowamu na Yelobowamu, wekalaga wakwihoma du. 31Lehobowamu yakafwa, yakazikwa mu vitenjelo vye citemi, mu kaya ya Dawudi. Na Abiya u mwanagwe yakahala wutemi wakwe.

Currently Selected:

1 Watemi 14: LLKWW

Highlight

Copy

Compare