1 Watemi 13
13
1Nayo Muwaha Mulungu yakalajiliza muwizi ku wulawa ku Yuda, yakabita ku Beteli. Muwizi yakafika ku Beteli mwi'daha lono Yelobowamu yali yemile ha cikumbicilo yafuse wuvumba. 2Hobaho muwizi yakalonga ku so lilajilizo lyo Muwaha Mulungu, yakatya, “Gwe go cikumbicilo, go cikumbicilo, Muwaha Mulungu yakutya nhavi, ‘Kololelwa mwana we cilume mu nyumba ya Dawudi, litagwa lyakwe Yosiya.’ Na yuyo Yosiya, kolowawulajila muli gwegwe i wakohani wose wono wakwituma mu vigongo, mu makumbicilo ge milungu yo wulambi, wono wakulavya ne makumbiko muli gwegwe, ne mafupa gawo kologakongojela muli gwegwe.” 3Nayo muwizi yakamulonjela kanyhi Yelobowamu yakatya, “Ne citanjilo cayo cocino, i cikumbicilo cici, copanduka cilawe hejete, ne mavu gono gali mumo gomwajika geyagale caka. Nagwe baho ho komanyila nha vyono, mbeka Muwaha Mulungu kalonjela muli'ne.”
4Nayo mutemi Yelobowamu yali yeza kuzihulika zizi, hodu yakagolola muwoko wakwe, yakamusonha ne cidole, yakatya, “Ale, mwibatenyi munhu yuyo!” Hobaho baho u muwoko wo mutemi wukanyalilila vyo wugoloce du, hamba si yasuma kuwugomola kanyhi yaye. 5Cikumbicilo cikapanduka nhinicizo cikalawa hejete, ne mavu gayo gakamwajika hasi. Yikawa nha vyono muwizi yalonjela mwi'tagwa lyo Muwaha Mulungu. 6U mutemi Yelobowamu yakamulonjela muwizi, yakatya, “Dedede wunombele kuli Muwaha Mulungu, u Mulungu wako, yamhonye muwoko wangu!”
Nayo muwizi yakawa kumulomba Muwaha Mulungu, no muwoko wo mutemi wukawa kunoga. 7Hanyuma mutemi Yelobowamu yakamulonjela muwizi yakatya, “Alu cibitane nane ku kaya yangu, wukatuje ndigwa wulye, kanyhi nghupele ne cihumbilizwa ku soko ya zono wumhendeye.”
8Ninga muwizi yakamupitula yakatya, “Ane, hamba wumhele nusu ye sawo yako, hamba si cobitana nagwe, hamba si nolya, hamba kung'wa nagwe co cose. 9Hambi Muwaha Mulungu nha kandajiliza vyono ndecele lukulu kulya, hamba kung'wa co cose, hamba kuwuyila nzila yono nizize.” 10Holeka hamba si yawuyila kanyhi nzila yono yaziza, langa yakawuyila nzila yinji.
U muwizi mukombi munya Beteli
11Na mu mapango gago, kwali na muwizi yunji mukombi, mono yekalaga baho ha Beteli. I wana wo muwizi yuyo mukombi, wakaza wakamulonjela sogo yawo, zose zono muwizi mono yalawile ku Yuda yetumile mu Beteli mwi'zuwa lilyo, na zono yalonjile kuli mutemi Yelobowamu. 12Nayo u muwizi mukombi, yakawawuza wanagwe yakatya, “Alu kowa kakolela nzilaci lono yatuluciye?” Nawo wakamulajila nzila. 13Hobaho yakawalonjela wamuwikanizize ndogowe yakwe, nawo wakanoza nha vyono yawalonjela. 14Yakapanda mu ndogowe, yakawa kutuluka yatyatizye nzila, yakamulonda yu yulya muwizi mono yalawile ku Yuda, yakamwagana yacehile mu mubeho hasi yo mubici wo munghola. Yakawa kumuwuza yakatya, “Yo gwegwe go muwizi mono wulawile ku Yuda?” Nayo yakatya, “Heya yo nene.”
15U muwizi mukombi yakamutya, “Ale cibitane ku kaya yangu cikalizane zindigwa.”
16Ninga u muwizi mono yakalawa ku Yuda yakapitula yakatya, “Ane hamba si nosuma kubitana nagwe ku kaya yako, hamba kulizana nagwe ndigwa, hamba kung'wa co cose hamonga nagwe bahano. 17Hambi Muwaha Mulungu nha kandajiliza vyono, ndecele lukulu kulya, hamba kung'wa co cose, hamba kuwuyila nzila yono nizize.”
18Nayo u muwizi mukombi munya Beteli yakamupitula yakatya, “Gwe muyangu, ane nane nha nili muwuzi cinya gwegwe, na ko wulajilize wo Muwaha Mulungu, malayika kanonjela nize nghusole cibitane ku kaya yangu, nghakupele ndigwa wulye.” Ninga hamba nhavivyo, yuyo muwizi mukombi yalambaga du, hamba si zali za mbeka yaye.
19Hobaho, u muwizi mono yakalawa ku Yuda, yakawa kubitana no muwizi mukombi ku kaya yakwe, wakalizana zindigwa. 20Nawo lono wali wakali wekaye ha meza, i nghani yo Muwaha Mulungu yikamuziza u muwizi mukombi, 21yakamulonjela kwe lizi yiwaha u muwizi mono yalawa ku Yuda yakumutya, “Muwaha Mulungu yakukutya nhavi, alu wakondya kumubedegala, hamba si witumile nha vyono yakulajilize. 22Agwe kuwuya ne nyuma, kuwa kulya ndigwa i hanhu hono yali yakondya kukulajiliza nha vyono wulecele lukulu kuko kulya. Holeka ku soko yiyo, alu kowulagwa, no muwili wako, si kozikwa mu vitenjelo vya we mhuga yako yaye.”
23Nawo wali weza kukondya kulya, u muwizi mukombi yakamuwikaniziza ndogowe, u muwizi mono yalawa ku Yuda. 24Nayo yakayipanda, hodu yakawa kutuluka. Na mumo mu nzila, viketang'anila na simba yikamwibata yikamuwulaga. No muwili wakwe wukekala wugwiye baho mu nzila. Ninga ndogowe hamonga ne simba, vikawa vimile baho du ha mhelo viwulanjile muwili wo muwizi. 25Nawo wanhu wanji wapulutaga baho, wakawuwona muwili wo muwizi wugwiye mu nzila, ne lisimba nalyo limile behi baho. Wanhu wawo wakawa kubita ku Beteli, wakalolosa zose zono waziwene mu nzila.
26Nayo u muwizi mukombi yaza kuzihulika zizi, yakatya, “Ayo yo muwizi mono yalibedegala lilajilizo lyo Muwaha Mulungu! Holeka Muwaha Mulungu kamutumila lisimba limuwulaje, nha vyon Muwaha Mulungu yali yatemizye.”
27Hobaho u muwizi mukombi, yakawa kuwalonjela wanagwe yakawatya, “Ale, mumbikanizizaje ndogowe yangu.” Nawo wakanoza nha vyono yawatuma. 28Nayo yakatuluka yali mucanyha ye ndogowe, yakawagana muwili wo muwizi mono yakalawa ku Yuda, wuli mu nzila ne ndogowe hamonga ne simba, navyo vyo vimile baho du ha mhelo. Nalyo lisimba hamba si lyawulya u muwili wo muwizi, hamba kuyilya ndogowe yaye. 29Hobaho, u muwizi mukombi yakawusola muwili yakawupacila mu ndogowe, yakawugomola ku Beteli ho wakawuzice, no kumulilila. 30Yakawuzika mu citenjelo cakwe ca we mhuga yakwe. U mwene hamonga ne wanagwe wakamulilila, wakutya, “O 'gwe ndugu yangu, go ndugu yangu!” 31Nawo waza kukondya kumuzika, u muwizi mukombi yakawalonjela wanagwe yakawatya, “Anye wanangu, nane kolo nafwa, munzikaje nane mu citenjelo cicino du, muwuzice muwili wangu viwe vihegame no muwili wakwe. 32Hambi zinghani zono yazilonjela mwi'lajilizo lyo Muwaha Mulungu kuli cikumbicilo ca ku Beteli, na kuli ze hanhu hose ho wuhembelo wa mu vigongo mu makaya ga Samaliya, mbeka mbeka zoficilicila.”
U wubi wo wiyongomeze wo mutemi Yelobowamu
33Ninga hamba nhavivyo, u mutemi Yelobowamu u mutemi wa Isilayeli, hamba si yasuma kuzileka zi nzila zakwe zimbi, langa mwene ho yakacila kuwawika wakohani wanhu we caka, wono walawaga mu zimhuga zono si zo mulango wa Lawi, ho wetume mulimo mumo mu vigongo. Yakesolela munhu wo wose du mono mwene yamusakaga hodu kawa kumunoza kawa mukohani. 34No wubi wuwu, ku lubavu lwakwe yakeletela wuhodanjice no wongomele hamonga no kwiwembula ha meso ge yisi.
Currently Selected:
1 Watemi 13: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
