1 Watemi 12
12
We milango ya ku lubavu lwa kusumuka wakugaluka
(2Zin 10:1-19)
1Nayo Lehobowamu u mwana wa Salomona yakabita ku Shekemu, kono wali wehangulizize i wanhu wose wa Isilayeli, wa ku lubavu lwa kusumuka, ho wamutemye yawe mutemi. 2Ninga nayo Yelobowamu u mwana wa Nebati, mono yali yali ku Misili so kumutiza Solomona, yakazihulika zizo. 3Nawo i wanhu wose wa ku lubavu lwa kusumuka, wakatuma wanhu wabite ku Misili wakamuceme Yelobowamu. Wakawa kubitana wose hamonga na Yelobowamu kuli Lehobowamu, wakamutya, 4“U sogo Solomona yacitumyaga vibi muno muno, no kucipela mutegulo muzito. Holeka agwe, hono wucepule mutegulo wuwo, no kucitumya viswanu, nase cokwitumamila.”
5Lehobowamu yakawapitula yakatya, “Ale, nhondo muze kolo vyapuluta vilo vidatu, nane ho nomupenyi lipitulo.” Hodu nawo wakawa kwiyagala. 6Mutemi Lehobowamu yakawawuza i wanyamhala wono wamutazaga u sogwe Solomona mu zinghani lono yali yakali mumi, yakawatya, “Ale, ta, munhazaje lipitulo lyono nowapitula wanhu wawa.”
7Nawo wanyamhala wakamupitula wakatya, “Agwe hono wusace wuwetumamile wanhu wawa viswanu, ale, weze kuwapela mapitulo gono gowakwila mu visakwa vyawo, holeka nawo wojendelela nhondo zose kukuhulika.”
8Ninga mwene Lehobowamu, yakazibedegala zinghani ze wanyamhala, yakawa kuwawuza wazika wayagwe, wono luno wali wo watazi wakwe mu zinghani, yakawatya, 9“Alu wulenyi! Nanye mukutya wule? Mbite nghawapitule nhawule wanhu, vyono wene wakuhila niwacepulile mutegulo?”
10Nawo wazelelo, i wazika wayagwe wakamupitula wakamutya, “Alu nagwe wubite wukawalonjele wutye nhavi, ‘Cidole nene cangu ciwaha, cicizize ciwino ca baba Solomona.’ 11Holeka hono yawe baba yamudinghuzajenyi mutegulo muzito, ane nowonjeleza mutegulo wenyu, na hono baba yali kumukunenyi na mukotya, ane nomukunenyi muno muno no mujeledi.”
12Vyali vyeza kupuluta vilo vidatu, Yelobowamu hamonga ne wanhu wose wa Isilayeli, wakamubitila kanyhi mutemi Lehobowamu, nha vyono yali yawalonjeye. 13Ninga mutemi Lehobowamu vyono yazibedegala zinghani ze wanyamhala, yakawa kulongana ne wanhu ko wukali muno muno, yakagatyatya mahweso ge wazika wayagwe, yakawalonjela wanhu yakutya, 14“Baba Solomona yamudinghuzajenyi mutegulo muzito, ninga ane nowonjeleza mutegulo wenyu wuwe muzito muno muno. Mwene yali kumukunanjenyi na mukotya, ninga ane nomukunenyi muno muno no mujeledi!” 15Na wuwo wali wo wuhile wo Muwaha Mulungu ziwe nhavivyo, nha vyono Muwaha Mulungu yamulonjela Yelobowamu, mu nzila yo muwizi Ahiya wa Shilo. Na yiyi yo yaleka mutemi Lehobowamu si yasaka yazihulicize ze wanhu.
16Nawo wanhu waza kuwona vyono mutemi Lehobowamu hamba si yakuwahuliciza yaye, hodu, wakazozeza wose hamonga wakutya,
“Mwene nye, ase cina yigawo ne mhuga ya Dawudi!
Hamba wuhazici wono cina muli mwana wa Yese?
Nye nyo wanhu wa Isilayeli,
alenyi ciyagale ciwuye ku zikaya zetu.
Mulece kumutyatya kanyhi Lehobowamu mumulekaje yali wene!”
Hodu hobaho i wanhu wa Isilayeli wakawa kumugaluka mutemi Lehobowamu. 17Wakawa kumuleka mutemi Lehobowamu yawe mutemi kwe wanhu wono wekalaga mu yisi ya Yuda du.
18Hanyuma mutemi Lehobowamu, yakamutuma Adonilamu, mono yali yo mulanjilizi muwaha wa wetuma milimo wose, yabite kuli Waisilayeli, ninga Adonilamu yali yeza kufika kuko, Waisilayeli wakamutowanga ne mabwe sunga yakafwa. Na ku soko ya zizo, hodu Lehobowamu yakawa kupanda musunho mwi'tuka lyakwe lyo wulugu, yakawa kutiziza ku Yelusalemi. 19Na ku wulawa mwizuwa lilyo, i wanhu wa Isilayeli wo wutemi wa ku lubavu lwa kusumuka, wakawa kuyigaluka nyumba ya Dawudi sunga nalu.
20Nawo i wanhu wa Isilayeli waza kuhulika nha vyono Yelobowamu yakondya kuwuya ku wulawa Misili, wakawa kumulalika yaze ku wihangulize wawo wo mukung'ano, nawo wakawa kumunoza yawe mutemi wa Isilayeli. Langa wo mulango ya Yuda du, wo wasigala, wakayityatya nyumba ya Dawudi wali wene.
U wuwizi wa Shemaya
(2Zin 11:1-4)
21Nayo Lehobowamu yali yeza kufika ku Yelusalemi, yakawakonghola wasilikale vitungh'ati mu wulugu, waficile elufu yigana limonga na makumi munana, mu wulawa mu milango ya Yuda na Benyamini. Yakawa yena wuhile yabite vikehome na we milango ya Isilayeli wono wali wali ku lubavu lwa kusumuka, ho yawugomole kanyhi wutemi wakwe. 22Ninga Mulungu yakamulonjela muwizi Shemaya, 23yabite yakamulonjele Lehobowamu, hamonga ne wanhu wose we zimbeyu za Yuda na Benyamini, yakawatye, 24“Mulecele lukulu kubita muwahome wandugu zenyu, i wanhu wa Isilayeli. Holeka muwuye wose ku zikaya zenyu. Hambi zizi zose zono zijeye, nha wo wuhile wangu nene.” Nawo wakawa na cihuliko kuli nghani yiyo yo Muwaha Mulungu, hodu wakeyagala, wakawuya ku zikwawo.
Yelobowamu yakumuleka Muwaha Mulungu
25Mutemi Yelobowamu, wa Isilayeli yakazenga likaya lya Shekemu ya mu yisi ya mu matunda ya Efulayimu, yakekala kuko cipango. Hanyuma kanyhi yakahama kuko, yakazenga likaya lya Penuweli. 26Yakawa kwihwesa mu nhumbula yakwe yakutya, “Alu nha vyono yinha, 27hono niwaleceleze wanhu wangu, wawe kubita ku Yelusalemi kumulavizya Muwaha Mulungu makumbiko ku Nyumba yo Mulungu kuko, wopituka wamuwuyile Lehobowamu mutemi wa Yuda, hanyuma ane wambulaje.”
28Nayo yali yeza kwihwesa nhavivyo, hodu yakanoza vihwani vya ndama nyejete za zahabu, yakawalonjela wanhu wakwe yakutya, “Mwali kwikataza no muhinzo mutali muno wo kubita ku Yelusalemi, ku wuhembi. Ninga alu mulanje, 'nye nyo wanhu wa Isilayeli, ayi yo milungu yenyu yono yamuwusenyi ku Misili!” 29Nayo yakawika cihwani ca ndama monga ya zahabu ku Beteli, ne cihwani ce ndama nzagwe naco, yakaciwika ku Dani. 30Ne nghani yiyi, yikawenjiza wanhu mu wubi. Hambi wanhu nha wabitaga kuhemba hali cihwani cimonga ca muli zindama zizo, na wanji wabitaga ku Beteli, na wanji ku Dani. 31Yelobowamu yakazenga nhavivilya wuhembelo mu vigongo mucanyha. Yakawawika ne wakohani wanhu caka du, wono si wali wo mulango wa Lawi.
Wuhembi wa ku Beteli wukulemezwa
32Yelobowamu u mwana wa Nebali, yakanoza sikukuu ye cidini mwi'zuwa lye likumi ne 'hano lya mu mwezi wo munana, nha vyono yinha lizuwa lye sikukuu yono yili ku Yuda. Yelobowamu, yakavilavizya makumbiko mu vigongo ku Beteli i vihwani vye zindama vyono yayinoza, yakawika ne wakohani kuko ku Beteli wawe kwituma mulimo wo kulongoza wuhembi mu hanhu hono yahazenga. 33Na mwi'zuwa lye kumi ne hano, lya mu mwezi wo munana, lizuwa lyono mweneco yaliwaga, ale, yakabita ku Beteli, yakawa mweneco yakulavya likumbiko mu cikumbicilo, so wunoza sikukuu yono mweneco yayiwaga so wanhu wa Isilayeli.
Currently Selected:
1 Watemi 12: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
