1 Watemi 11

Solomona yakumuleka Mulungu

1Mutemi Solomona yakawa kwenda wacekulu wenji wono si Wayahudi. Hamonga no kuwa yali yamutolile u mwana we cicekulu wo mutemi wa Misili, ninga yakatola kanyhi ne wacekulu we nghungugo ye Wahiti, na ye Wamowabi na ye Waamoni, na ye Waedomu, na ye Wazidoni. 2Mwene yawatola du hamba yawe Mulungu yalajiliza nha vyono Waisilayeli walece kwitolanila ne wanhu wawa, hambi nha wowanoza Waisilayeli wahembe milungu yinji. 3Mutemi Solomona yali yatolile wacekulu magana mupunghati, kanyhi yakawa yena wajitulwa magana madatu. Ne wacekulu wawa, wakamunoza Solomona yamulece Mulungu. 4Na mu wukombi wakwe, wakamutonga mu wuhemba milungu yinji. Yakawa si mwihuwilwa kuli Muwaha Mulungu, u Mulungu wakwe, yakawa si yenho sogwe Dawudi mono yali mwihuwilwa. 5Solomona yahembaga Ashitoleti, mulungu mucekulu wa wanya Sidoni, hamonga na Moleki, mulungu we cevu ce Waamoni. 6Yakamusutizya Muwaha Mulungu, yakawa si mwihuwilwa, yakawa si yenha sogwe Dawudi mono yali mwihuwilwa. 7Solomona yakazenga hanhu ho kumuhembela mulungu Cemoshi, mu matunda, ku lubavu lwa kucilima lwa Yelusalemi, we cevu ce Waamoni. 8Kanyhi Solomona yakazenga hanhu henji ho kuhembela, hono i wagolece zakwe wono si Wayahudi wowa kufusiza wuvumba no kulavya makumbiko kuli milungu yawo.

9Ninga hamba yawe Muwaha Mulungu, u Mulungu wa Isilayeli yelajila kejete kose kuli Solomona, no 10kumukong'onheza yalece kuhembela lukulu milungu yinji, ninga Solomona si yamuhulika Muwaha Mulungu, mwene yakamuleka Mulungu. Holeka Muwaha Mulungu nayo yakamukolelwa likuwo Solomona, 11yakamutya, “Alu vyono wakondya kucibena ne nyono cilagane cangu nagwe, wagabedegala ne malajilizo gangu, nane nghwihuwiza nha vyono nokuwusiza wutemi, nimupele yumonga wa muli wetumami wako. 12Ninga hamba nhavivyo, ku soko yo sogo Dawudi, si nosuma kuzinoza zizi mu vilo vyako lono wukali mumi, langa mu cipango co wutemi wo mwanago. 13Nane si nowuwusa lukulu wutemi wose kuli mwene, langa nomusigaziza mwene likungugo limonga, ku soko ya Dawudi mwitumami wangu, na ku soko ye likaya lya Yelusalemi lyono nalihagula liwe lyangu.”

I walugu wa Solomona

14Hobaho, Muwaha Mulungu yakamunoza Hadadi wo lulelo lo wutemi wa Edomu, yamuhome Solomona. 15Baho katali, lono zizi zikali, lono Dawudi yayisumila Edomu, Yowabu u muwaha we wasilikale wakwe wo wulugu, yabita kuko yakazika wafu. 16Kanyhi mwene Yowabu hamonga ne wanhu, wakekala kuko ku Edomu myezi mutandatu, na mu vilo vivyo vyono yekalila kuko, yawawulaga i wanhu wose we cilume mumo mu Edomu, 17ninga Hadadi hamonga ne wetumami wo sogwe, i Waedomu watiziza ku Misili. (Na mwidaha lilyo, Hadadi yali yakali mudodo muno muno.) 18Wakawuka ku Midiyani, wakabita ku Palani, ne wanhu wanji wanya Palani wakelunza nawo. Wakawasoleleza ne wanhu wawo, wakajendelela sunga wakafika ku Misili ko mutemi Falawo. Wakamubitila u mutemi, nayo mutemi Falawo, yakamupela Hadadi ciwanza, hamonga ne kaya yo kwikala, yakawa kumulisa ne zindigwa. 19Nayo Hadadi vikehulika muno muno no mutemi Falawo, nayo mutemi Falawo yakamupela Hadadi u mulamuwe we cicekulu, u mwanakwawe wo mugolece wakwe Tapenesi ho yamutole. 20Nayo yuyo u mwanakwawe wa Tapenesi yakamulelela Hadadi mwana we cilume, yakacemwa litagwa, Genubati. U mwana yuyu yakawilusizwa baho mwi'kulu no mugolece wo mutemi Falawo, yakawa vikalane ne wana we cilume wo mutemi Falawo.

21Nayo Hadadi lono yali yali ku Misili, yakahulika nha vyono Dawudi yakondya kufwa, na vyono na Yowabu u muwaha we wasilikale, nayo yakondya kufwa. Hodu Hadadi yakamulonjela mutemi Falawo yakatya, “Alu nghukunena wunghombole mbuye ku yisi yangu.”

22Mutemi Falawo yakamuwuza yakutya, “Ku sokoci? Alo vyono ane nalemwa kukupela visakwa vyako, holeka alu weza kusaka kuwuya kwenyu?”

Hadadi nayo, yakamupitula mutemi Falawo yakatya, “Ane si nyanjiye cinji, langa nghukunena wunghombolaje mbite.” Hodu Hadadi yakawa kuwuya ku yisi yakwe. Alu yikawa, nha vyono mutemi wa Edomu yali yawasulile Waisilayeli, ale nhavivyo sunga na Hadadi, yali munhu mubi muno, yakawa mulugu muwaha Waisilayeli.

23Mulungu kanyhi yakamunoza Lezoni u mwana wa Eliyada, nayo yawe mulugu wa Solomona. Yuyo Lezoni, yatiza ko muwaha wakwe u mutemi Hadadezeli wa Zoba, 24yakawa mulongola we cipuga ce wanhu wagaluci. (Na zizi zejela lono Dawudi yamusumila Hadadezeli, yakawongomeza ne wanhu wa ku Siliya, wono wali vilunzize nayo.) Nayo Lezoni hamonga ne wanhu wakwe, wakabita kwikala ku Damesiki, i hanhu hono wanhu wakwe wakamunoza yawe mutemi wa Siliya. 25Nayo Lezoni yakawa mulugu muwaha we Waisilayeli mwipango lyose lyono Solomona yali yakali mumi.

Wihuwizo wo Mulungu kuli Yelobowamu

26Munhu yunji kanyhi, mono yamugaluka Solomona, yali Yelobowamu mwana wa Nebati, Mwefulayimu munya Seleda, mono yali muyagwe ne wetumami wakwe, u nyina yacemwaga zeluya. 27Ne nghani yiyi yali nghani 'mbi muno muno. Ne nghani yono yaleka Yelobowamu yakumugaluka Solomona yali yoyi.

Lono Solomona yamemyaga muhangha mu makombo ku lubavu lwa kucilima ye likaya lya Yelusalemi ku Milo, no kunozeleza majinji ge likaya lyo sogwe Dawudi. 28Nayo Yelobowamu lulo, yali muzelelo we vilungo viwaha. Nayo Solomona yali yeza kumuwona vyono yetumaga milimo ko wuhidimbazi, hodu yakawa kumuwika yawe mulanjilizi we wetuma milimo wose, mu yisi ye zimbeyu za ya Manase na Efulayimu. 29Na mwi'zuwa linji, lono Yelobowamu yali yali mu muhinzo, yakulawa ku Yelusalemi, viketang'anila yali wene no muwizi Ahiya mu nzila, yakulawa ku Shilo. 30Hobaho Ahiya, yakaciwopola civwalo cipya cono yali yavwalile, yakacidemulanga vitema yikumi na vyejete, 31yakamutya Yelobowamu, “Ale, wusole vitema yikumi viwe vyako, hambi Muwaha Mulungu, u Mulungu wa Isilayeli nha yakukutya, ‘Ane nowuwusa wutemi kuli Solomona, nokupela agwe we milango yikumi. 32Nayo Solomona, kosigala na wo mulango monga du, ku soko ya Dawudi u mwitumami wangu, na ku soko ya Yelusalemi, likaya lyono nalihagula liwe lyangu mu wulawa mu yisi yose ya Isilayeli. 33Nane nghwituma zizi, vyono Solomona yakondya kunema 'ne, alu yakuhemba milungu yinji, ye Asitalite, u mulungu mucekulu wa wanya Sidoni, hamonga no mulungu Cemoshi, u mulungu we Wamowabi, na Moleki u mulungu we Waamoni. Alu Solomona yakondya kungaluka, yetuma vibi, kanyhi hamba si yawibate no wulajilize wangu, hamonga ne malajilizo gangu, nha vyono u sogwe Dawudi yali yagebate. 34Ninga si nomuwusiza Solomona wutemi wose ng'o, langa nomuleka yajendelele kuwa mutemi, mu vilo vyose vyo wikale wakwe. Na zizi nozituma ku soko yo mwitumami wangu Dawudi mono namuhagula, nayo yakawa munhu mono yali yebate wulajilize wangu hamonga ne malajilizo gangu. 35Nane nowusola wutemi mu muwoko wo mwana wa Solomona, nghupele agwe milango yikumi. 36Langa nomulecela wo mulango monga du u mwana wa Solomona. Nane nhondo zose, ho niwe nina mwana wo mwitumami wangu Dawudi, mono kowa yatemile mwi'kaya lya Yelusalemi, likaya lyono nalihagula hawe ho hanhu hono nowa kuhembelwa. 37Nagwe Yelobowamu, nokunoza wuwe mutemi wa Isilayeli, nagwe kotema mu yisi yose yono kohila gwegwe. 38Hono wuhulice 'ne ko mutima wako wose, kanyhi hono wugakamise ne malajilizo gangu, witume nha vyono nowa kukulajiliza witume, nha vyono yanozaga mwitumami wangu Dawudi, ale, nane nowa nili hamonga nagwe vilo vyose. Nokunoza wuwe mutemi we Waisilayeli. Nane nolanjilila sunga mbone, vyono ne wanago wakuwuhala wutemi wako, nha vyono netuma kuli Dawudi. 39Langa nowalipiciza wo lulelo lwa Dawudi ku soko yo wubi wa Solomona, ninga si nowalipiciza vilo vyose yaye.’ ”

40Na ku soko yiyo Solomona yakajela yamuwulaje Yelobowamu, ninga Yelobowamu yakatiziza kuli mutemi Shishaki wa ku Misili, yakekala kuko sunga Solomona yakafwa.

Wufwe wa Solomona

(2Zin 9:29-31)

41Ne zinghani zose zono Solomona yetuma, ne mikalile yakwe, hamonga ne mahala gakwe, zose zandicigwe mu citabu ce Zinghomo ze Metumo ga Solomona. 42Solomona yali mutemi mu Yelusalemi mu Waisilayeli yose, myaka makumi mane. 43Nayo yakafwa, yakazikwa mu kaya ya Dawudi. Nayo Lehobowamu u mwanagwe, yo yakahala wutemi wo sogwe Solomona.

Currently Selected:

1 Watemi 11: LLKWW

Highlight

Copy

Compare