1 Watemi 10
10
U wulamuse wa Sheba u mutemi we cicekulu, kuli Solomona
(2Zin 1:1-12)
1No mutemi we cicekulu wa Sheba, yali yaza kuhulika zo lukumyo lwa Solomona, yakawa kubita kuli Solomona ku Yelusalemi ho yamujele mu mawuzo ge zinghani zinghamu. 2Yakaza ku Yelusalemi hamonga ne wetumami wakwe wenji muno, hamonga ne zingamiya zono zidinghuye hati ye zimboga, hamonga ne zahabu nyinji muno no wihambo we vibwe vyo wuguzi wukamu. Nayo yali yeza kwitang'anila na Solomona, yakaduwana nayo zose zono yali yena nazo mu nhumbula yakwe. 3Nayo Solomona yakamupitula zose, na hakawa hasina hamba nghani monga yono yamufutila ku wupitule. 4Mutemi we cicekulu wa Sheba, yakagawona mahala ga Solomona, hamonga ne likulu lyono yazenga. 5Yakayiwona ne ndigwa yono Solomona yatenjelagwa ha meza, ne zikaya ze wetumami wakwe, hamonga no wityatye wa zose zono zetumwaga ne wetumami wa mwi'kulu, e vivwalo vyono wavwalaga, ne wetumami wono wamutenjelaga zindigwa mu mapango ge zi sikukuu, hamonga ne makumbiko gono yalavyaga mu Nyumba yo Mulungu. Yali yeza kukondya kuziwona zizo zose, yakezina muno muno ne nhumbula yakwe yikazima. 6Hanyuma yakawa kumuwuza Solomona yakatya, “Kumbe zose za mu yisi yako, na ze mahala gako, zose za mbeka! 7Ane si nali kwihuwila yaye, sunga neza kuza no kwiwonelela zose nene no mweneco. Kumbe hamba nhavivyo, nali nghali sinazihulika zose yaye, hamba nusu yayo bwete, hambi mahala gako hamonga no wumoteswe wako, nha vicizize muno kuciza nha vyono nali nonjeywe. 8Wamoti wagolece zako! Kanyhi wamoti ne wetumami wako, wono wali hamonga nagwe vilo vyose, wakuhulika ze mahala gako! 9Yalumbwe Muwaha Mulungu, u Mulungu wako! Hambi nha yalajila nha vyono yendezwe nagwe, no kukunoza wuwe mutemi muli Isilayeli. Hambi wendo wakwe kuli Isilayeli, nha wa cibitilila, nayo yakakunoza wuwe mutemi wawo, ho wusume kunoza ling'ani ne mbeka.”
10Mutemi we cicekulu Sheba, yakawa kumupela Solomona vipegwa vyono yamuletela, navyo vyali vicizize kilo elufu yine za zahabu, hamonga no winji we hati ye zimboga, no wihambo we vibwe vyo wuguzi wukamu. No winji we hati ye zimboga wono yamupela, wali mwinji muno muno mu nghango yono Solomona yali yakali hamba si nawutuga mwi'zuwa linji lyolyose.
11(Ne zingalawa za Hilamu zono zategula zahabu wulawa Ofili, nazo zikaleta wulawa Ofili mabici ge minghulwa, hamonga no wihambo we vibwe vyo wuguzi wukamu. 12Solomona yaketumamila mabici gago ge minghulwa yikawa zo sito zo kuwopela lijinji lye luwa ye Nyumba yo Mulungu, hamonga ne likulu. Hanyuma kanyhi, yakayitumamila kunozeza ndonondo ne masumbi so kwaya. Nayo yali yo mibici ye minghulwa miswanu muno, yono yali yikali si naza hamba kamonga ku Isilayeli, hamba hasina kanyhi yono yolokwijela yinha yiyi.)
13Nayo mutemi Solomona, yakamupela mutemi we cicekulu wa Sheba, vinhu vyose vyono yavisakaga, hamonga na zizo, Solomona yakamupela kuciza na vyono yali yanojeye yamupele. Hanyuma ya zizo, u mutemi we cicekulu wa Sheba, hamonga ne wetumami wakwe, wakawa kuwuya ku yisi yawo ya Sheba.
Wugoli wo mutemi Solomona
(2Zin 9:13-28)
14Mutemi Solomona myaka yose, yabocelaga kilo za zahabu zono zicizize elufu makumi mejete na yidatu, 15hamonga ne kodi yono walavyaga wagoli, ne cambuzi cono walavyaga wasuluza, ne kodi yono walavyaga watemi we Calabu, hamonga ne wawaha we zi'si ze Waisilayeli.
16Solomona yakanoza ngula mbaha muno magana mejete za zahabu ngula monga yikawa nozezwe zahabu ya wuzito wono wucizize kilo mupunghati. 17Hanyuma kanyhi yakanoza ngula ndodo ndodo zificile magana madatu, za zahabu, ngula monga yikawa nozezwe zahabu ya wuzito wono wucizize kilo nyejete. Ne zingula zizino zose, yakaziwika mu “Nyumba ya mu mbago ya Lebanoni.”
18Hanyuma kanyhi mutemi, yakanoza ligoda lyo wutemi, lubavu yakalihiliwa na mbali za nhembo, no lubavu lunji, yakalihiliwa na zahabu nengu. 19Nalyo ligoda lilyo, lyali lina ngazi mutandatu, kanyhi likawa liwiciywe cihwani ciseswe ca simba mu zi mbavu zose ze zingazi akuno na akuno, nazo simba, zali yikumi na nyejete. 20Na ha mugongo we ligoda lyo wutemi, hali hocili cihwani ciseswe ca mutwe wa ng'ombe. Na mu zimbavu zose vyono nyejete ze miwoko ye ligoda, hali ho cili cihwani ciseswe ca simba. Hakawa hasina hamba ligoda linji kanyhi, lyono lyali lihwanile lilino, mu wutemi wunji wowose.
21Ne vikombe vyono Solomona yang'welaga, vyali vya zahabu vyose, sunga ne vitumamilwa vyono vyali viwice mu Nyumba ya mu Mbago ya Lebanoni, navyo vyali vya zahabu vyose. Hali hasina ciya co cose ca fweza, cono cetumamilwaga, vyono fweza mu vilo vya Solomona cali nha cinhu cono cisina cambuzi. 22Hambi mutemi Solomona, nha yali yena ngalawa zono zajendaga mwi'lenga hamonga ne zingalawa za Hilamu. Na mu myaka yose, mu mwaka we kadatu, ngalawa zakwe zawuyaga zidinghuye zahabu, fweza, meno ga nhembo, ne manyani, hamonga ne majedengwa.
23Nayo mutemi Solomona, yali mugoli muno muno, kanyhi yali munhu we mahala kuciza watemi wayagwe wanji. 24Sunga ne wanhu wose wa mononze, wendaga kuza wamuhulicize ze mahala gono Mulungu yamupela. 25No munhu wo wose mono yazaga kumulamusa, yakamuletela hamonga ne vipegwa vye vitumamilwa vya fweza na zahabu, ne vivwalo, ne vitwalo, ne zihati ze zimboga, ne zifwalasi, hamonga ne zinyumbu.
26Mutemi Solomona yakakonghola matuka go wulugu, gaficile elufu yikumi na yine, hamonga ne wapanda zifwalasi, waficile elufu yikumi na nyejete, yakawawika mu makaya mono yali yagawicile matuka go wulugu. Wanji yakawawika mu Yelusalemi hamonga no mutemi, na wanji yakawawika ako na ako au makaya ganji. 27Na mu mapango go wutemi wakwe, fweza yejelaga nha mabwe du mu Yelusalemi. Nago mabici go muhagata, gali menji gakehwana ne mabici ge mikuyu, gono gali menji mu mwalambalo we matunda ga Yuda. 28Ne wakwawi wo mutemi, wagulaga zifwalasi ku wulawa Misili na ku Kilikiya, 29no kuwaguziza i watemi wose we Wahiti, ne Wasiliya. Wa waguzizaga matuka go wulugu, fweza magana mutandatu kwe'tuka limonga, na fweza yigana limonga na makumi mahano kwa fwalasi monga.
Currently Selected:
1 Watemi 10: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
