1 Watemi 9
9
Mulungu yakwilajila kanyhi kuli Solomona
(2Zin 7:11-22)
1Mutemi Solomona, yali yeza kukondya kuyizenga Nyumba yo Mulungu, hamonga ne likulu, sunga na vyose vyono yasakaga yazenje, 2Muwaha Mulungu yakelajila kuli Solomona lwe kejete, nha vyono yelajila kuli mwene, lono yali yali ku Gibeyoni. 3Muwaha Mulungu yakamulonjela yakatya, “Nakondya kuwuhulika wulombe wako, kanyhi nakondya kuyisiwanula Nyumba yangu yiyi yono wanzenjela, yiwe ho hanhu hono nowa kuhembelwa cibitila. Nane noyilanjilila no kuyidima vilo vyose. 4Nagwe hono wunyitumamile kwe cogopo na ko wihuwilwa, nha vyono sogo Dawudi yanoza, na hono wuwukamise wulajilize wangu no kwituma zose nha vyono nakulajiliza, 5nane nowufisiliza wihuwizo wangu wono namwihuwiziza sogo Dawudi, lono namulonjela vyono, Isilayeli wowa kutemwa ne wanagwe cibitilila. 6Ninga gwegwe hambe wanago, hono mulece kunhyatya, na hono mulece kuwa na cihuliko kuli wulajilize wangu, hamonga ne malajilizo gangu gono nakupela, hanyuma muhembe milungu yinji, 7ale, nane nowahamya wanhu wa Isilayeli niwawuse mu yisi yono nawapela. Noyileka sunga ne Nyumba yangu yiyi yono nakondya kuyisiwanula hawe hanhu hangu ho kuhembelwa. Ne wanhu wose hohose wowaseka Isilayeli no kuwatendela ko wubedegazi. 8Sunga ne Nyumba yiyi yo Mulungu, yopituka yiwe yilundo lya matongo, ne wanhu wose wono wowa kupuluta baho, wowa kwiwuza wakutya, ‘Nhawule Muwaha Mulungu kayinoza nhavivi yisi yiyi ne Nyumba yiyi?’ 9Nawo wanhu wowa kupitula wakutya, ‘Ku soko vyono wamuleka Muwaha Mulungu u Mulungu wawo, mono yawawusa walezi wawo ku yisi ya Misili. Wakayipitucila milungu yinji no kuyitamamila no kuyihemba. Na yiyi yo soko yono yikuleka Muwaha Mulungu kawaletela wongomele wuwu.’ ”
Wilumbanize wa Solomona na Hilamu
(2Zin 8:1-2)
10Mutemi Solomona yayizenga Nyumba yo Mulungu hamonga ne likulu myaka makumi mejete. 11Nayo Mutemi Hilamu mutemi we yisi ya Tulo yo yamupela mibici yose yo muhagata, hamonga ne zahabu yose yono yasakaga so mulimo wo wuzenji. Ninga wuzenji wali weza kukondya, mutemi Solomona yakamupela Hilamu makaya gono gali gali mu yisi ya Galilaya. 12Nayo Hilamu yakabita kugalanga makaya gago, ninga si yagenda yaye. 13Hodu yakawa kumubitila Solomona yakamutya, “Alu ndugu yangu, aga go makaya mucici gono wukumhela!” Na ku soko yiyo, holeka hanhu baho hakali hakucemwa yisi ya Kabuli sunga nalu. 14Hilamu yali yakondya kumutegulila Solomona zahabu ya wuzito wono wucizize kilo elufu yine.
Milimo yinji miwaha yono yetuma Solomona
(2Zin 8:3-18)
15Mutemi Solomona, yewetumya kwe vilungo i wetuma milimo, mu wuzenji we Nyumba yo Mulungu hamonga ne likulu, no kumemya muhangha makombo gono gali gali kucilima ye likaya, hamonga no kuzenga magomawakali ge likaya. Kanyhi yakawetumamila so wuzenga makaya ga Hazoli, Megido hamonga na Gezeli. 16Ninga mutemi wa Misili, yali yakondya kuyihoma Gezeli no kuyisola, yakawawulaga Wakanani wose i wekazi wa mwi'kaya, yakalipembela likaya no moto, hanyuma, yakawa kumupela mwanagwe we cicekulu likaya lilyo, nha cipegwa ce halusi lono yatolelwa na Solomona. 17Nayo Solomona ho yakawa kulizenga kanyhi likaya lilyo lya Gezeli. Yaketumamila wanhu wakwe. Solomona yo yazenga ne Beti Holoni yono yili kusika 18na Balati, na Tamali, mu nyika ya Yuda, 19i makaya gono yagetumamilaga so wuwika vitumamilwa vyakwe. Go makaya gono yawikaga zifwalasi zakwe, ne matuka go wulugu, hamonga ne vitumamilwa vyose vyono yasakaga so wuzenjela mu Yelusalemi, hamba mu Lebanoni, ne hanhu hanji hose du mu wutemi wakwe. 20I wanhu wono wasigala, i Wakanani, wono Waisilayeli si wawawulaga lono wayisolela yisi yawo, 21hamonga ne Waamoli, ne Wahiti, ne Wapelizi, ne Wahivi, ne Wayebusi wono wasigala, wakajendelela du kuwa wetumami sunga nalu. Ale wawo wo Solomona yawetumamilaga. 22Ninga Solomona si yawanoza Waisilayeli wawe wetumami. Langa wene wetumaga mulimo wo wusilikale no kuwa walongola, ne wawaha we wasilikale, ne walongola we matuka go wulugu, hamonga ne wajendela zifwalasi.
23Hali ho wali wawaha walanjilizi we milimo ya Solomona yu wuzenji, wali waficile magana mahano na makumi mahano, wono wemilizaga milimo hayo.
24Solomona yakamemya muhangha, na mu makombo gono gali gali kucilima ye likaya, lono mugolece wakwe, u mwana we cicekulu wo mutemi wa Misili, yali yakondya kuhama mu kaya ya Dawudi, no kwinjila mwi'kulu lyono Solomona yamuzenjela. Hobaho ho yayizenjela na Milo.
25Nayo Solomona yalavyaga nghanghulo yidatu mu mwaka, vilavywa vinyanywe, hamonga ne vilavywa vyo mulamu, mu cikumbicilo cono yamuzenjela Muwaha Mulungu. Yakawa yakufusa no wuvumba ku so Muwaha Mulungu. Nayo yakawa yakondya kuyizenga Nyumba yo Mulungu.
26Mutemi Solomona, kanyhi yakanoza ngalawa ku Eziyoni-gebeli, yono yili behi na Eloti ha mhwani ya Agaba, mu yisi ya Edomu. 27Mutemi Hilamu, yakawategula wanhu wakwe kuli Solomona, wono wali wazoweye kujendya ngalawa mwi'lenga, ho waketaze ne wanhu wa Solomona. 28Wakajenda sunga wakafika ku Ofili, na kuko, wakasola zahabu yono yali yicizize wuzito wa kilo elufu yikumi na yine, wakamuletela Solomona.
Currently Selected:
1 Watemi 9: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
