VAFILIPI 2

Esemba hakete vumwe; he mburi ya kukuduisha

1Heicho, kakicha hena kutujwa he Kristo, kakicha hena luhembo lwa lukundo, kakicha hena vumwe vwa Mpeho, kakicha hena mbonea na mbazi, 2izujani kuizihirwa kwangu, nesa mukete madunganyo mamwe, vena mikundire mimwe, vena mpeho mwe, mwekigwia hamwe. 3Misironge kintu chochose kwa kukanana, neri kwa kukubaa; esire he kukuduisha, kila mntu namtare mghenji iti ni wedi kumvecha. 4Kila mntu asirerehe vyakwe mwenye, mira kila mntu arerehe vya vaghenji.

Mfwanano wakwe Yesu he kukuduisha na kukuinkija

5Ketani madunganyo ao ao he unywi, eo ekireho he Kristo Yesu; 6eye aho kuvoka ekina fwanyanyi ya Mrungu, naye tevonie iti kula kufwanana na Mrungu ni kintu cha kukuguranya nacho; 7mira akakuosha iti tena ngazo, akaghuha fwanyanyi ya mzoro, akaketa fwani ya vantu; 8kangi, ekinavoneke iti ena fwani sa ya mntu, akakuduisha, akaoka mresikia mhaka kufwa, yee, kifwa cha he msalaba. 9Heicho Mrungu akamghibika mno, akamunka izina levechije mazina ose; 10nesa he izina lakwe Yesu, kila ikunkuro lidunkute, la vintu vya uko wanga, na vya he masanga, na vya si ya masanga; 11na kila lumi luzumire iti YESU KRISTO NI MFUMWA, he ngazo ya Mrungu Vava.

Lukio luvonekie he miikarire

12Heicho vakunde vangu, sa vuntu mweokie varesikia misi yose, si igheri mi newaho du, mira iki muzike haiwa na ere aho mi nesiwaho, koloshani lukio lwenyu venye he kufoleka na kuzingiza. 13Ambu Mrungu niye eronga ndima he unywi, kuenda na kwenyu na kuronga kwenyu he kukolosha kila chedi ye erekere.

14Rongani vintu vyose hesina kudengereta kana nkani, 15nesa muidime kuoka vana va Mrungu vesina cho veshaghwa, neri kuisha, vesina idamaro ghati he lukolo lwena tiri, lwehotoke, hevo unywi muvoneka sa vianga he ii si, 16mwekigurisha kiteto cha nkalamo, nesa nivone kiusho cha kukukazia ula msi wakwe Kristo, iti sirekudundikira sutwa, neri sikurishije vwasi sutwa. 17Yee, neri nekikufutwa wanga he itasi na mtaso wa mwitikijo wenyu, niizihirwa; kangi niizihirwa hamwe na unywi vose. 18Na unywi nirehuvo, izihirwani, kangi izihirwani hamwe nami.

Timoteo

19Mira niarira he Mfumwa Yesu kumtuma Timoteo amangeza henyu, nesa nami nitundanywe nekimanya vuntu mweikee. 20Ambu sina mntu ungi ena madunganyo mamwe nami eveiwa kurereha mburi jenyu nezosha. 21Ambu vose veenda vyavo venye, si vila vyakwe Kristo Yesu. 22Esire iti mwemanyije nguma yakwe, iti eherire hantu hamwe nami he vuntu vwa Mburi Yedi, sa mwana na vavee. 23Heicho, niarira kumtuma uo hala indi, aho nekinemanya vuntu mburi yangu yeneoka. 24Nami niitikija he Mfumwa iti nami mwenye nineza iki hafuhi.

Epafradito

25Mira navona iti, kinitara kumtuma Epafradito henyu, mndughu wangu, mndima mghenji, msikari mghenji; kangi ni ntume wenyu na mndima wa vila nevienda. 26Ambu ekina nkwina na unywi vose, akasikia vukiva haiwa, kila mwekisikie iti ekiwaa. 27Ambu cha kididi ekiwaisha, hafuhi na kufwa; mira Mrungu akamvoneia; neri siye mwenye, mira hata mi; nisirevona vukiva wanga he vukiva. 28Heicho nikakudoka haiwa kumtuma, nesa muizihirwe mwekinemvona wa, nami niduishijwe vukiva vwangu. 29Mghuhieni ra, he Mfumwa, na kuizihirwa kwose, kangi muvatare vantu veikee saye iti ni vareshimiwa. 30Ambu ekizengelele kufwa he vuntu vwa ndima yakwe Kristo, ekigera ngoro yakwe he mpwasi; nesa akoloshe vila mweimije kuniharehia.

Currently Selected:

VAFILIPI 2: CHSUNT67

Highlight

Copy