VAFILIPI 3

Lumazo ludori he vintu vya kimwiri

1Cheshele, vandughu vangu, izihirwani he Mfumwa. Kumuandikia mburi jila mi tekunifikija, mira munemuveia unywi.

2Kucheieni he maguro, kucheieni he vala veketa vivivi, kucheieni he vala vekuchwa. 3Ambu uswi tu venye kitavani, twemtasa Mrungu he Mpeho, na kukukaza he Kristo Yesu, neri tetuarira mwiri. 4Mira mi nekiidima kuarira mwiri. Kakicha hena mntu edunganya iti ena cha kuarira mwiri, mi nekelile. 5Nekitavanwe msi wa kanane, mi ni mntu wa mbari ya Israeli, wa lukolo lwakwe Benyamini, Mwebrania wa Vaebrania, he kugurisha myomongwa, mi ni Mfarisayo, 6he kukudindija, mrarisha kanisa vwasi, he kitea chevonekia he viziomo, sekina nzune.

Ikuji lakwe Paulo kuketa vumwe ne Kristo

7Mira vila vyekiniokie lumazo, he vuntu vwakwe Kristo nevitarire iti ni lutesho. 8Yee, kuvecha ivyo, nitara vintu vyose ni lutesho, he vuntu vwa vwedi vwesina kiringanyo, vwa kummanya Kristo Yesu, Mfumwa wangu; eye he vuntu vwakwe neteshije vintu vyose, nekivitara iti ni sa mkuku, nesa nimmaze Kristo; 9kangi nivoneke hena ye, nisikete kitea changu mwenye chevonekia he viziomo, mira kila chevonekia he mwitikijo weho he Kristo; kitea kila chefuma he Mrungu, kwa mwitikijo; 10nesa nimmanye ye na nzinya ya kuvuka kwakwe he vefwie, na sanga yya mavwasi akwe, nekifwanana naye he kifwa chakwe; 11nesa kari kive niidime kufikia kuvuka he vefwie. 12Si iti nakenja kufika, kana iti nakenja kukoloka; hai! mira nisara, nesa niidime kugura kila echo cheshighie nekigurwa ni Kristo Yesu. 13Vandughu, sikudunganya mi mwenye iti nakenja kugura; mira nironga kintu kimwe du; nekiivaa vila vyeho nyuma, nekijotia vila vyeho mozya; 14nisara nifikie mginto wa kitumulilo cha mwitango m’baha wa Mrungu he Kristo Yesu. 15Heicho uswi twekoloke natudunganye ivyo; neri na mukatedunganya vingi, Mrungu enemufunukurira hata icho. 16Mira aho hantu twehafikie, natutongie aho aho.

Mfwanano wakwe Paulo uraterijwe

17Vandughu, okani varateri vangu, varereheni vala vetongia he kuratera fwanyanyi twemuinkie unywi.

Vanzo va msalaba wakwe Kristo

18Ambu vajinki veanga, evo nemuvwirire kantu kajinki mburi javo, na iki nimuvwirire kwa masoji, iti ni vanzo va msalaba wakwe Kristo; 19mginto wavo kukondika, mrungu wavo ni ndeni, vekukaza na vintu vya soni, vedunganya vya kiisanga. 20Ambu uswi kaa yetu iho uko wanga. kufuma uko tumwinda Mkija, Mfumwa Yesu Kristo; 21eye enegharusha mwiri wetu wa vusoka, uveiwe kufwanana na mwiri wakwe wa ngazo, he nzinya ila eyo eveiwa kuzima vintu vyose vimsikie.

Currently Selected:

VAFILIPI 3: CHSUNT67

Highlight

Copy