VAGALATIA 5

1He vukomboli uvu Kristo etutaririe nkombolwa; heicho imukani, neri musiregurijwa kangi ni igogolo la vuzoro.

Kitara vasaghure, Kristo kana myomongwa

2Rereha, mi Paulo nimutio: Mwekitavanwa, temuna lumazo he Kristo. 3Kangi nitetia vuonwa kila mntu ula etavanwa, iti kimtara kukolosha myomongwa yose. 4Mwatanywa ne Kristo unywi mweenda kutarirwa kitea kwa viziomo; mwagwa na kufuma he iyo mbonea. 5Ambu uswi he Mpeho turerehia ikuji la kitea he nzia ya mwwitikijo. 6Ambu he Kristo Yesu, kutavanwa kana kusatavanwa tekughenja kintu, esire mwitikijo weronga ndima kwa lukundo.

7Mwekidindika nezo; niani emukindie musisikie idi? 8Uku kukengereja tekufuma he ula emwitange unywi. 9Kachachu kadori kekararasha itonge lose. 10He Mfumwa nina kiariro he unywi iti temyukakete madunganyo a mbare ingi. 11Nami vandughu, kakicha nibirikira mburi ya kutavanwa, hanini ra nerishwa vwasi? Aho kikuvajo cha msalaba chaoka sutwa. 12Nanga avo vemugera maganganyi vekutema vo venye!

Vukomboli kitara vutetiwe ni lukundo

13Ambu unywi vandughu, mweitangwe nesa muvone nkomboli, mira kukombolwa kwenyu kusioke kwa kuratera mwiri, mira rongianani ndima kwa lukundo. 14Ambu myomongwa yose ikolokia he mburi mwe, nayo ni ii: “Mkunde mghenji wako sa we mwenye.” 15Mira mwekiumana na kulana, rerehani musirekenjana.

Kutonjwa kwa Mpeho Wedi

16Heicho niti: Tongani kwa Mpeho, niho mwesikakoloshe neri tama ja mwiri. 17Ambu mwiri una tama, ulwana na Mpeho, na Mpeho naye elwana na mwiri; ambu ivi vikanana, neri temuidima kuhira kila mweenda. 18Mira mwekirongorirwa ni Mpeho, temuho kijusi ya viziomo. 19Heicho mihiro ya mwiri yemanyike, niyo ii: Kushisha, ihani, tama, 20kutasa mirungu, vusavi, nzo, mavoo, kiru, oro, irenge, msopano, fwefwe, 21luiso, vuengeji, kuliisha, na vingi vyefwanane na ivyo; he ivyo nimuvwira hecheri, sa vuntu nekenjije kumuvwira, iti vantu veketa vintu sa ivyo, tevekapale vufumwa vwa Mrungu. 22Mira ntunda ja Mpeho ni: Lukundo, kuizihirwa, mporere, kugumirija, miikarire yedi, vwedi, kitengo, 23vuhoo, kiringanyo; he mburi sa ijo tehena kiziomo. 24Na vala e vakwe Kristo Yesu vevambie mwiri he msalaba hamwe na madunganyo awo mavivi na tama jawo. 25Twekiikaa na moo kwa Mpeho, natutonge kwa Mpeho. 26Tusikukaze sutwa, twekivambajijana na kusikiana lwiso.

Currently Selected:

VAGALATIA 5: CHSUNT67

Highlight

Copy