VAGALATIA 4

1Mira niteta iti, mpali igheri lose eremdori, tetekane na mzoro, nziaho ni m’baha wa vyose; 2mira eho kijusi ya vabaha na vareri, mhaka igheri lila levikiwe ni vavee. 3Nirehuvo nna uswi aho twe vana twekibinushwa ni misimo ya kuvoka ya ili isanga. 4Aho igheri lekinafike, Mrungu emtumie Mwanawe eye emoghiwe ni mche, emoghiwe kijusi ya viziomo, 5nesa avakombole vala veho kijusi ya viziomo, nesa uswi tuidime kughoshwa vana. 6Na kila unywi mwaoka vana, Mrungu emtumie Mpeho wa Mwanawe he ngoro jetu, eiagha: “Aba, Vava!” 7Kakicha ni huvo, we tu mzoro kangi, mira u mwana; na kakicha u mwana, u mpali he Mrungu.

Paulo evasingirija vala vegharuke vasihunduke na nyuma

8Mira igheri lila, kwa kuti temwekimmanyije Mrungu, mwekihirira ila eyo too aho kuvoka eseki mirungu. 9Mira iki mwekinakenje kummanya Mrungu, kana kukela kumanyika he Mrungu, hanini mwekihundukia kangi ila michejire ya kuvoka e misoka, yesikoloke, eyo mweenda kuhirira wa? 10Mugura misi na mieji na magheri na miaka. 11Nimufolekia, iti usiche hangi nekurishije vwasi sutwa he vuntu vwenyu.

12Vandughu, nimusemba, muoke sa mi, ambu mi nami nire sa unywi. Temunitunguluke neri. 13Mira mwemanyije iti nekimubirikira Mburi Yedi ka kuvoka he vuntu vwa vusoka vwa mwiri; 14na mghesho mwevonie he vuntu vwa mwiri wangu temuuberire neri kuusua, mira mwekinighuhiie sa malaika wa Mrungu, se Kristo Yesu. 15Uko kukuittanga varela vwedi kuohi? Ambu nimutetia vuonwa iti, kakicha chekive mweking’ola meso enyu muaninke. 16Kanao, naoka mnzo wenyu kila namuvwira vya idi? 17Avo vena nkwina na unywi, mira si kwa nzia yedi, mira veenda kumufingia nze, nesa unywi muvasikie vo nkwina. 18Nacho ni chedi kusikiwa nkwina he mburi yedi misi yose, neri si igheri mi neho na unywi du. 19Vujana vwangu, e unywi nemusikiwa lubegho mhaka Kristo arumbike kangi ndeni he unywi; 20nanga nekiho hamwe na unywi iki, na kugharusha izii langu! ambu nitatanya vuntu vwenyu.

Kivonyesho chefuma he kiaghano cha kae

21Nivwirani, unywi mweenda kuikaa kijusi ya viziomo, hamao, temutasikia viziomo? 22Ambu heandikwe iti: Abrahamu ekina vana veri, mmwezu he mgitu, na mmwe he mche wakwe mwenye. 23Mira ula wa mgitu emoghiwe kimwiri, ula wa mche wakwe mwenye, kwa kiravo. 24Mburi iji jitetwa kwa mfwanano; ambu ava nivo sa viaghano viri, kimwe kufuma he ntuvi ya Sinai chemogha kwa vuzoro, echo Hagari. 25Ambu Hagari ni sa ntuvi ya Sinai weho Arabia; weringane na Yerusalemu wa iki; ambu eho he vuzoro hamwe na vana vakwe. 26Mira Yerusalemu wa wanga ni mche wakwe mwenye, naye niye mlala wetu uswi. 27Ambu heandikwe:

“Zihirwa we we ntasa, wesimongha;

Lonzisha, ugere ngagha, we wesina lubegho;

Ambu vana va ula eshighiwe mwenye ni vajinki kuvecha va uo ena na mme.” 28Heicho, vandughu vangu, uswi se Isaki tu vana va kiravo. 29Mira sa vuntu misi ila ula emoghiwe he kimwiri emrierieshe ula emoghiwe kwa Mpeho, nirevwo vuntu cheikee na iki. 30Mira iandiko liti ze? “Mkinye mgitu na mwanawe, ambu mwana wa mgitu tekapale neri na mwana wa ula mche mwenye.” 31Ni huvo ra vandughu vangu, uswi tetu vana va mgitu, mira tu vana va ula mche mwenye.

Currently Selected:

VAGALATIA 4: CHSUNT67

Highlight

Copy