Wɔrɔmi ye 1
1
Fòów kéele
1Mii Pɔli, wi lè Kirisi Zyezu púlo, Kolocɔlɔɔ n mii yeri mii í pye woro pìituɔn àmɛɛ wi mii nyɛ́nɛ n wòlo lè mii í da woro Syɛɛnjóocǎnri nyuu.
2Syɛɛnjóocǎnri bee di nyɛ dee Kolocɔlɔɔ da joo n kaan lè booma ni wi kanyaajoobèle ma níì jo paa di nyuu syɛ́ɛnbèle ma, àmɛɛ di sɛ́bɛ lè wi syɛɛnsɛbɛcǎnri ni. 3Syɛɛnjóocǎnri bee i wi Jáaw kéele nyuu, woro wee wi nyɛ lè Zyezu Kirisi, wi lè wolo Kàfɔw, pe n baa wi see Davidi yòdaʔayi ni céri kàbaan na, 4kàjáa a Kolocɔlɔɔ gi tɛ̀ɛn ní fàngbɔʔɔ ní wi i nyɛ woro Jáa Pìicǎnni kàbaan na, lee li nyɛ lè tɛɛlɛ fun, àmɛɛ wi wi nyán n yirige lè kúbèle nínge ni. 5Woro bárigaw ni Kolocɔlɔɔ kpɔ́ʔɔri kaan wolo ma, ní wɔ́ɔ̀ wolo kpéʔele pìitunbéle wi mɛ́ɛgi kéele na, koro ga pye syɛ́ɛnbèle pèle í da tági syɛɛnfeleyi myɛ ni sáā lúro wi ma, 6yele si wɔ́ɔ i nyɛ bele bee pèle, yele bele Kolocɔlɔɔ yeri lè n kpéʔele Zyezu Kirisi wòolo.
7Mii i sɛ́bɛw naa sɛ́bɛ bi tórigo yele myɛ ma, yele bele ye nyɛ lè Wɔrɔmi ni, Kolocɔlɔɔ syɛɛn-nidaanmabèle, yele bele wi yeri lè n kpéʔele woro tiimaa syɛ̀ɛnnɛ. Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma!
Pɔli i caa bi kári sa Wɔrɔmi tágafɔbèle nyaa
8Mii i bariga kaangi mii Kolocɔlɔw ma gbɛnʔɛnɛ yele myɛ kéeli na Zyezu Kirisi bárigaw ni, àmɛɛ pe yele tágali kéele nyuu lè dulunyanw tɛ́ɛyɛ myɛ ni. 9Kolocɔlɔwee fáli mii kpéʔele lè ní mii fúngi myɛ ní ní i Syɛɛnjóocǎnri nyuu lè wi Jáaw kéele na, wi i nyɛ mii séera ncan mii i yele kéeli nyuu mii nyɛ́ɛriyi ni làla o làla. 10Mii i wi nyɛ́ɛri làrigèle myɛ ni níì jo, ki ga pye wi nyɛnɛ kéele ki n yɛlɛ mii sigemɔnni naa kàdoʔo í ba pye mii í gbǎn kanmaa taa bi kári yaà yele ma. 11Níì cán ki láagi tɔ̀nɔ́ i nyɛ mii na gbanʔama bi yele nyaa koro ga pye mii í sa Pìicǎnni yakaangaa kaan yele ma, jàngó yele í nìri tágali ni, 12wàlá mii í joo mii ga pye yele níngi ni lǎlee ni lè, wo myɛ í pínɛ fànʔa taa tágali báriga ni, lee li wo pínɛ lè, yele í gi taa mii wóli báriga ni, mii si wɔ́ɔ gi taa yele wóli báriga ni.
13 #
Kap 19:21
Ni senyɛ̀nnɛ, mii i caa yele í gi cán mii maa tée ni sɔ̀ngí gi na tɔlɔyɔ saʔa bi kári yaà yele ma koro ga pye mii í yasanra taa yele ni, àmɛɛ mii wɔ́ɔ̄ di taagi lè syɛɛnfeleyaa nínge ni. Kàjáa kérigèle kèle i mii sígi ni yéregi fwɔɔ n baa nan níjanʔa na. 14Syɛ́ɛnbèle myɛ fwɔ́ɔlɔ i nyɛ mii na, Girɛkibèle ní syɛɛnsanbèle myɛ wólo i nyɛ mii na, kacánbèle yoo, kanaa-sìnjánbèle yoo, pe myɛ fwɔ́ɔlɔ i nyɛ mii na. 15Gee bee na, yele bele ye nyɛ lè Wɔrɔmi ni, ki láagi tɔ̀nɔ́ i nyɛ mii na mii í sa Syɛɛnjóocǎnri joo yaà yele ma wɔ́ɔgēle.
Syɛɛnjóocǎnri fànʔa kéele
16 #
Mar 8:38
Níì cán Syɛɛnjóocǎnri mii nyuu lè, fɛ̀ɛrɛ o mii taagi di kéeli na í, ti i nyɛ Kolocɔlɔɔ fǎngi bàā syɛ́ɛnbèle syoo, bele myɛ be tági lè di na, wozelibèle be nyɛ Zyefubèle n náà fàra syɛɛnfeleyi wozanya na. 17#Hab 2:4 Níì cán Syɛɛnjóocǎnri di sínni tèé, lee li taagi lè Kolocɔlɔɔ ma, ní i taagi tágali yagana báriga ni, àmɛɛ Kolocɔlɔɔ syɛɛnsɛbɛri gi joo lè níì jo: «Syɛɛnsinw a sìi taa tágali báriga ni.»
Syɛ́ɛnbèle kolomɔ kéele
18Kolocɔlɔɔ i wi fundanʔari tèé, dee di yìrigí lè nyɛ̀ʔɛni na n ba ni tuun syɛ́ɛnbèle na, bele be lè pe o fɛ̀ɛgí Kolocɔlɔɔ na í, ní i kakolobyeri féleye myɛ kpéʔele, pe kakolobyeri báriga ni pe kányɛɛgi yéregi, ki o syée yɛʔɛ̀ ma í. 19Níì cán gee pe a gbǎn cán lè Kolocɔlɔɔ kéeli na, ki n fílige be ma. Ncan Kolocɔlɔɔ n gi fílige n tɛ̀ɛn be na. 20Níì cán nlaa wi dulunyanw faan lè, wi kánmi bi lè syɔɔn o bi nyaagi í, syɛ́ɛnbèle i bee bee nyaagi gbanʔama wi yafaanri báriga ni, ki kɔ́rɔw wi nyɛ wi bàngwɔɔ fǎngi, ní wi kolocɔlɔmi, kérigèle bee i cángi wi yafaanri báriga ni. Gee bee na tànʔa ní o nyɛ be ma í, 21#Efɛz 4:17-18 níì cán pe n Kolocɔlɔɔ cán, koro ní ki myɛ ní pe ga fɔ̀lɔ bàā wi kpɔ̀ʔɔrɔ́ àmɛɛ gi yɛlɛ paa wi kpɔ̀ʔɔrɔ́ lè í, pe ga wɔ́ɔ̀ fɔ̀lɔ ni bariga kaangi wi ma í. Fwɔɔ a be be sɔ̀nguri taʔa nyùngo fun kérigèle na, a be sícilimɛ fun fúnyi wɔ́ɔ baa nyìn yébilimi na. 22Pe maa ni peyɛɛ yiri kacanbèlē, kàjáa pe n baa pye nilabalabéle. 23#Làlw 4:16-18 Nìjangbɔɔri di nyɛ lè bànguu Kolocɔlɔw ma, pe ga fɔ̀lɔ ni dee bee córo í, ní i syɛ́ɛnbèle kɔ́yɔ yasamagara kpɔ̀ʔɔrɔ́ ti sìndɛɛgi ni, yasamagari bee i nyɛ syɔɔn niwirige wi lè yakuugo, ní féjɛɛnri, ní tɔlɔyɔ sicɛrɛ-jɛrɛ yaweeri niwiriye n fàra dee na di fulolo lè.
24Gee bee na Kolocɔlɔɔ be yaʔa paa kanɔnʔɔri kèlē kpéʔele bi yɛlɛ ní be tiimaa fundaayi ní, páā fɛ̀ɛrɛ fun kérigèle kpéʔele ní peyɛɛ ní pe céri kánma na, 25poro bele be Kolocɔlɔɔ kányɛɛgi fàli lè jànvaaw na. Yáriree Kolocɔlɔɔ faan lè, pe n ba ni dee bee kpɔ̀ʔɔrɔ́ ní i di fáliw kpéʔele. Pe si ga fɔ̀lɔ ni di Faanfɔw kpɔ̀ʔɔrɔ́ í, woro wee wi yɛlɛ lè ní kpɔ̀ʔɔrɔli ní làla o làla. Amiina!
26Gee bee si na Kolocɔlɔɔ be yaʔa pe fundaayi fɛ̀ɛfɔnmɔ kèlē ni, níì cán àmɛɛ cébèle yɛlɛ bàā sìnɛ́ ní pe nǎnbèle ní lè, a be gee bee yaʔa níì gi kàriga kanmaa na ni kpéʔele pe céri na, gee gi nyɛ lè ki ga yɛlɛ gi kpéʔele í. 27Kánmi bee wonijanma na, àmɛɛ nǎnbèle wɔ́ɔ̀ yɛlɛ bàā sìnɛ́ ní pe cébèle ní lè, a be gee bee yaʔa, á be céri láanitaʔa wári be na, a be i peyɛɛ jaa, ní i fɛ̀ɛfɔnmi kèlē kpéʔele ní peyɛɛ ní. Wɔʔɔgee pe yɛlɛ bi taa lè pe kolomi kéele na, pe i gee bee taagi peyɛɛ ni.
28Pe ga fɔ̀lɔ n Kolocɔlɔɔ kéeli yaʔa peyɛɛ fúnyi ni í, gee bee na Kolocɔlɔɔ be yaʔa be fɛ̀ɛfɔnmi sɔ̀ngurɔ kɔ́yɔ ni, koro ga pye paa kanaa-sìnbyeri kpéʔele. 29Kakolobyeri, ní kapeebyeri, ní fungboloyi, ní funbeeyi, n fàra nyabɛɛnni, ní syɛɛnkpoori, ní kàsiiw, ní fáanagi, ní zɔ̀nbeew na, kérigèle bee féleye myɛ be kpéʔele lè, gele bee ge be fúnyi nyìn. Pe wɔ́ɔ i nyɛ lóʔonjoobéle, 30ní mɛ́ɛkalagibéle, ní Kolocɔlɔɔ nígoobéle, ní syɛɛn-tɛʔɛlɛbéle, ní ní i nyɛ nɛ̀ɛnyɛnɛgɛ fɔɔlɔ, ní joogbɔɔmɔ fɔɔlɔ, ní i kanmaa caa wovɔnmɔ bàā kérigèle kpéʔele, gele ge pee n sɔ̀lɔ lè, pe wɔ́ɔ o lúro pe seefɔbèle ma í, 31ní ní i nyɛ sɔ̀ngumɔ-fùnvɔɔlɔ, ní nyɔɔfaliyi kálagifɔɔlɔ, ní tàmaga-fùnvɔɔlɔ, ní nyinimɛ-fùnvɔɔlɔ. 32Bi gi taa gee Kolocɔlɔɔ joo lè kérigèle bee na wi nyɔɔsyɛɛnri ni, pe n gee bee fílige n cán, níì cán wi n jo: Bele be kérigèle bee félege kpéʔele lè, pe n yɛlɛ ní kùu ní, a be sèʔê fala kérigèle bee kurugo ni kpéʔele, àlí bele be kérigèle bee wonijangéle kpéʔele lè, pe i bele bee sòoló ke kpéʔeleli na.
Currently Selected:
Wɔrɔmi ye 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
