Kapyegèle 28
28
Pɔli i nyɛ Maliti lǒgi nínge tátɛɛlɛ ni
1Wolo syɔɔli kàdoʔo ma, táree na wolo nan lè, a wolo gi nyaa pe i di yiri Maliti. 2A tári bee syɛ̀ɛnnɛ kacàngbɔʔɔ kpéʔele wolo na, gee félege gi taama bɛɛn lè. Níì cán pe maa naakpɔʔɔ le níì wolo myɛ yeri, a wolo sáà yére n gi màʔa àmɛɛ zěgi da ni tuun lè a wéeri kpɔ́ʔɔ gbanʔama. 3A Pɔli sáà kàjere fàari n koli n baa le náagi ni, a màátɔn yiri gi ni káfugi báriga ni n Pɔli nɔn n kóri n kòro wi ma kɔ́gi na. 4A tári bee syɛ̀ɛnnɛ ga yapeegi bee nyaa a gi tan wi ma kɔ́gi na, a be i gi nyuu peyɛɛ ma níì jo: «Kányɛʔɛ na nǎnw naa i nyɛ syɛɛnkpóō. Alí àmɛɛ wi wírè syɔɔ lè sólomi lòkpɔʔɔ ma, koro ní ki myɛ ní Sínni#28:4 Sínni: Mɔ ga lóʔo Sínni, ànbée tári bee syɛ̀ɛnnɛ da ni be kolocɔlɔwaa mɛ́ʔɛ yiri. ga fɔ̀lɔ wi kòro sìi na í.»
5Kàjáa Pɔli maa gi nyari n cáan náagi ni, yafyɛn si ga wi taa í. 6Syɛ́ɛnbèle bee si maa ni gi sɔ̀ngí wi a fɛɛ, wàlá wi a too bi kùu lǎli bee wonijanna ni. A pe ga gi nyaa a gi mɔn yarigaa ga wi taa í, a pe be sɔ̀nguri kàriga níìgēle n jo, kolocɔlɔwaa wii.
7Nànwaa séye si maa pye tɛ́ɛgi bee taana, pe i nǎnw bee yiri Pubiliyusi, wi maa pye tári bee syɛɛnkpolobéle myɛ nyúngo na, a wi wolo tìrige wi kpáagi ni níì wolo nibɔnrɔ sámaga n pye canya taanri nínge ni. 8Pubiliyusi tóow maa pye wozinɛɔ ní, ncan cefuuro maa pye wi na, wi láayi si wɔ́ɔ i wi fé. A Pɔli jée wi kpáagi ni n sáà Kolocɔlɔɔ nyɛ́ɛri, níì kɔ́yi taʔa wi na, a wi fala n pɔʔɔ. 9Amɛɛ gee bee kpéʔele lè, lǎli bee ni a tári bee yaazanbèlē wɔ́ɔ̀ fala ni maa Pɔli ma, a wi ba ni be poori. 10A be wɔ́ɔ̀ wolo kpɔ́ʔɔ gbanʔama, lǎli ni wolo ba ni jǐn bàtowaa ni bi kári lè, yariga o yariga láa gi pye wolo na lè, a be gi kaan wolo ma.
Pɔli n nan Wɔrɔmi na
11Yeye taanri wolo da kwɔ́ɔ Maliti tári ni, ní náà jée Alɛkisandirikaʔa ye bàtowaa ni ni syée, bàtow bee maa wéeri làla kwɔ́ɔ yaà Maliti ni, wi fɛ̀ɛ́w si i nyɛ Dosikuri.#28:11 Dosikuri: Mɔ ga lóʔo Dosikuri, ki kɔ́rɔw wi nyɛ ŋǎnbèle. Lǎli bee syɛ́ɛnbèle pèle maa ni sɔ̀ngí be kolocɔlɔwaa ŋǎnbéle i bàtobèle falipyebèlē kpáa wéle. Koro na pe ŋǎnbèle bee fɛ̀ɛ sámaga bàtow na yɛʔɛ̀ ma. 12A wolo ga nan Siirakuzi na, a wolo canya taanri kwɔ́ɔ yaà. 13A wolo ga yiri nɛɛ bee, a wolo i máari n sáà nan Erezyo na. A canʔa nibin ga kwɔ́ɔ, a káfalagaa yìri canʔa parima ma wòrogulo kàbangi na, canziin wógi na a wolo nan Puzɔli na. 14A wolo wolo senyɛnbèle pèle nyaa nɛɛ bee, a bele bee wolo nyɛ́ɛri níì jo wo canya kɔrɔsiin kwɔ́ɔ yaà ní poro ní. Wolo káriganmi pi da pye nya Wɔrɔmi ma. 15A kěgi bee senyɛ̀nnɛ ga wolo kéeli lóʔo a be pan n baa wolo fàra, a bele wolo fàra Apiyusi Cédaali ma, á bele wolo fàra Nibɔndirige-kpáayi Taanri Tɛ́ʔɛ ni. Lǎli ni Pɔli be nyaa lè, a wi bariga kaan Kolocɔlɔɔ ma pe kéeli na níì wi sɔ̀ngumi télege. 16A wolo ga jée Wɔrɔmi ni, [a sùlasiibèle dabata kàrigafɔlɔ kàsolebèle kaan sùlasiibèle pèle kàrigafɔlɔ ma,] á be Pɔli yaʔa a wi kòro wi nibin ní sùlasiiwaa nibin ní, wee wi da ni wi kɔ̀rɔsíi lè.
Pɔli n Kolocɔlɔɔ syɛ́ɛnri joo Wɔrɔmi ni
17A canya taanri ga kwɔ́ɔ, a Pɔli Zyefubèle syɛɛnkpolobéle yeri n kpóʔoro. Amɛɛ be peyɛɛ gbóʔoro lè, a wi gi joo be ma níì jo: «Ni senyɛ̀nnɛ, mii ga kapeele faala kpéʔele wolo felegefɔ-nyɛ́nwaa na í, mii ga wɔ́ɔ̀ wolo tóolɛɛbèle kalɛɛlaa kálagi í, a be si mii cò Zyerusalɛmi ni n kaan Wɔrɔmi ye ma. 18Lǎli ni bele bee mii yíbe lè, a be i caa bi mii yaʔa, níì cán pe ga mii nyaa a mii keelaa faala kpéʔele lee li yɛlɛ lè ní kùu ní í. 19#Kap 25:11 A Zyefubèle si jo gee bee a kɔ́ pye í, koro gi gi yaʔa a mii jo mii a kári Sezari ma wi sa mii kútiiw kéele cɔɔnri, ki si o nyɛ mɔ a jo mii i sɔ̀ngí bi sɔ́ɔn mii tári syɛ̀ɛnnɛ na wii í. 20Gee bee na mii yele yeri koro ga pye mii í yele nyaa bi joo ní yele ní. Níì cán Isirayɛli ye sɔ̀ngumi tɛɛtaʔaga kéele na pe mii pwɔɔ ní nyɔ̀ʔɔdirigi naa ní.»
21A be wi pye: «Sɛ́bɛ faala ga yìri yaà Zyude tári ma n baa kaan wolo ma mɔ kéeli na í, senyɛnwaa faala ga wɔ́ɔ̀ pan naa n baa syɛɛnpeere joo mɔ kéeli na nɛɛ naa í. 22Kàjáa gee gi lè mɔ fúngi ni, wolo i caa bi gee bee lóʔo mɔ nyɔ́ɔgi na, níì cán gee gi kólogi naa kwɔ́ɔ lè, wolo n gi cán syɛ́ɛnbèle tɔ̀nɔ́ i syɛɛnpeeri nyuu gi kéeli na tɛ́ɛyi myɛ ni.»
23A be cangaa kɔ̀rirɔ n tɛ́ʔɛ wi ma, a cángi bee ga nan, a pèle saʔa pan wi tɛɛ̀syɔɔngi ma a wi baa kólogi bee sámaga n tɛ̀ɛn be na, ní wɔ́ɔ̀ Kolocɔlɔɔ fǎngi kèlē joo n fílige be ma, ní i ŋàʔaná bi be fúnyi kàriga Zyezu kàbangi na Mowizi làlwaw sɛ́bɛ, ní kanyaajoobèle syɛ́ɛnrɛ báriga ni. Wi maa tɔ̀nɔ n syɛ́ɛnri bee fílige be ma nlaa nyǐngi nyɔ́ɔ na fwɔɔ n sáà nan cângwɔɔgi nyɔ́ɔ na. 24A be pèle tága wi syɛ́ɛnri joolo báriga ni, pèle si ga tága í. 25Amɛɛ gi nyɛ lè pe ga bɛ̀ɛ nibin na í, a be kári. Sáni be kári lè, a Pɔli níì syɛ́ɛnri naa joo be ma níì jo: «Gee Pìicǎnni joo yele tóolɛɛbèle ma lè kanyaajoow Ezayi nyɔ́ɔgi ni, ki tɔ̀nɔ i nyɛ kányɛʔɛ, li n jo:
26 #
Eza 6:9-10
‹Da syée syɛ́ɛnbèle yaa ma mi sa be pye:
Yele a kɔ́ ba ra gi lúro,
yele si a ra gi kɔ́rɔw cángi í,
yele a kɔ́ ba ra wéle,
yele si a ra nyaagi í.
27Níì cán syɛ́ɛnbèle naa fúnyo n tɔ́n,
a be líiweegèle wɔ́ɔ̀ pɛɛn,
á be wɔ́ɔ̀ be nyapiigèle tɔ́n,
koro ga pye poro a kɔ́ ra nyaagi ge ni í,
si wɔ́ɔ ra lúro be líiweegèle ni í,
si wɔ́ɔ kérigèle cán be fúnyi ni í,
si kɔ́ kàri, mii si be syɔɔ í.›
28Koro na gi yɛlɛ ye gi cán bi cán Kolocɔlɔɔ n wi syɔɔli naa tórigo syɛɛnfeleyi ma, yi si a ba li syɛ́ɛnri lóʔo.»
[ 29A wi ga syɛ́ɛnri bee joo n kwɔ́ɔ, a Zyefubèle fúlo n cariga, àmɛɛ gi nyɛ lè pe ga bɛ̀ɛ nibin na í.]
30Pɔli maa yɛɛbogéle siin kwɔ́ɔ kpaagaa ni ní i gi sàrá. Syɔɔn o syɔɔn wi kári yaà wi ma lè, wi n sáà wee bee sámaga n cò cama. 31Wi maa ni Kolocɔlɔɔ fǎngi kéele nyuu be ma, ní i be tama Kàfɔw Zyezu Kirisi kérigèle na ní nànzorodo ní, syɔɔn faala ga wi yérige í.
Currently Selected:
Kapyegèle 28: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
