Tɛ̀ɛnnɛ 10
10
Nyɛ̀ʔɛni tunduɔn ní sɛ́bɛpili kéele
1A mii nyɛ̀ʔɛni tundunwaa nikwɔɔ nyaa, báriga wóo, a wi yìri nyɛ̀ʔɛni na ni tíri, burogo maa pye wi na, ki maa pye àmɛɛ fàfanʔa nyɛ lè. Kùlobari si i nyɛ wi nyúngi ni, wi yɛ́ɛgi si i nyɛ àmɛɛ cángi nyɛ lè, wi tɔ́lɔyi si i nyɛ mɔ a jo naà gii, náagi bee si i nyɛ àmɛɛ tiipɔɔlɔ nyɛ lè. 2Sɛ́bɛpile maa pye wi kɔ́gi ni womúgulo ní. A wi fala n wi kàliige tɔ́lɔgi taʔa sólomi lɔ̀ʔɔ na, níì wi kàmɔnɔ wógi taʔa tári na, 3níì yákpogbɔɔlɔ wáa àmɛɛ càaraɔ fúlomɔ nyɛ lè. A wi ga wi yákpoli wáa, a nyɛ̀ʔɛvōlogéle kɔrɔsiin gi sogi n falaga. 4A nyɛ̀ʔɛvōlogèle kɔrɔsiin ga tìn n kwɔ́ɔ, a mii jo bi di sɛ́bɛ, a mii yákpolo lóʔo nyɛ̀ʔɛni na, a li jo: «Nyɛ̀ʔɛvōlogèle syɛ́ɛnrɛ kɔn miyɛɛ fúngi ni, mɔ a kɔ́ di sɛ́bɛ í.»
5 #
Yir 20:11; Làlw 32:40; Dan 12:7; Am 3:7 Nyɛ̀ʔɛni tunduɔn si mii da nyaa lè woyéreo ní sólomi lɔ̀ʔɔ ní tári na lè, a wi wi kàliige kɔ́gi yìrige ǹjogi ni 6níì kàli wee na wi nyɛ lè sìi na làla o làla kwɔ́ɔmɔ fun, ní si i nyɛ nyɛ̀ʔɛni ní li yáriri myɛ kpéʔelefɔlɔ, n fàra tári, ní di yáriri myɛ, ní sólomi lɔ̀ʔɔ, ní gi fúngi yárira myɛ na, wi n kàli níì jo: «Ki a ní mɔn í. 7Cángee na nyɛ̀ʔɛni tundun-kɔrɔsiin wów a ba wi búruw wìi lè, Kolocɔlɔɔ kalarali a ba foro lǎli bee ni, àmɛɛ wi da gi joo lè wi púlobèle ma, be lè kanyaajoobèle.»
8 #
Ezek 2:8—3:3
Yákpolee mii da sélì lóʔo lè nyɛ̀ʔɛni na, a mii níì li lóʔo, a li i nyuu ní mii ní níì jo: «Da syée mi sa sɛ́bɛw syɔɔ, wi lè womúguo ní nyɛ̀ʔɛni tunduɔn kɔ́lɔ ni, wee wi yére lè sólomi lɔ̀ʔɔ, ní tári na.» 9A mii kári nyɛ̀ʔɛni tunduɔn ma n sáà wi pye wi sɛ́bɛpili kaan mii ma. A wi mii yari: «Li syɔɔ, mi li káa mi jɔ́ɔ, li a soro mɔ fícɛnni ni, kàjáa li a tɛ́nɛ mɔ nyɔ́ɔgi na àmɛɛ sélɔʔɔ nyɛ lè.»
10A mii sɛ́bɛpili syɔɔ nyɛ̀ʔɛni tunduɔn ma n li káa n jɔ́ɔ, li maa tɛ́nɛ mii nyɔ́ɔgi na àmɛɛ sélɔʔɔ nyɛ lè, a mii ga li jɔ́ɔ n kwɔ́ɔ, a li soro mii fícɛnni ni. 11A be mii yari: «Fwɔɔ mɔ í ní kérigèle nyaa joo, gele ge joo lè dulunyanw syɛ̀ɛnnɛ, ní syɛɛnfeleyi, ní syɛɛnfeleri joofɔɔlɔ, ní fànʔafɔɔlɔ saʔa kéele na.»
Currently Selected:
Tɛ̀ɛnnɛ 10: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
